ᖁᕕᐊᑉᐳᒍᑦ ᓄᐃᑦᓯᒋᐊᖅ ᓀᓪᓕᑎᕐᓯᒪᔪᓂᒃ ᑲᑎᒪᔩᑦ ᑲᑎᒪᐅᑎᕕᓂᖏᓐᓂᒃ ᕕᕗᐊᕆ 2026-ᖑᑎᓪᓗᒍ ᑯᑦᔪᐊᒥ, ᓯᐱᓰ ᓈᓚᐅᑎᖓᒍᑦ ᐅᓂᒃᑳᑕᕕᓂᖏᓐᓂᒃ ᓛᔨ ᒍᐊᑦ, ᑲᒪᔨᒻᒪᕆᐅᑉ.
ᖁᕕᐊᑉᐳᖓ ᓄᐃᑦᓯᒋᐊᖅ ᓀᓪᓕᑎᕐᓯᒪᔪᓂᒃ ᑐᓚᑦᑕᕕᐅᑉ ᑲᑎᒪᔨᖏᑦᑕ ᑲᑎᒪᒍᑎᕕᓂᖏᓐᓂᒃ ᑯᑦᔪᐊᒥ ᕕᕗᐊᕆᐅᑎᓪᓗᒍ.
ᐊᓕᐊᑉᐳᖓ ᑐᓴᕐᑕᐅᑎᑦᓯᒋᐊᖅ ᐱᕙᓪᐊᕈᑎᒋᓯᒪᔭᖏᓐᓂᒃ ᑐᓚᑦᑕᕕᐅᑉ ᐱᓇᓱᐊᕐᑕᖏᑦᑕ ᐊᑐᐃᓐᓇᐅᑎᕙᑦᑕᖏᓐᓂᒃ ᐋᓐᓂᐊᓂᓕᕆᓂᒃᑯᑦ ᐃᓄᓕᕆᓂᒃᑯᓗ ᐱᒍᑦᔨᐅᑎᒋᑦᓱᒋᑦ 7-ᓄᑦ ᐅᖓᕙᐅᑉ ᓄᓇᓕᖏᓐᓄᑦ.
ᓯᕗᓪᓕᐸᒥ, ᐱᖓᓱᑦ ᐱᒻᒪᕇᑦ ᑐᕃᓐᓇᑐᒃᑯᑦ ᓱᕐᕃᔪᑦ ᑐᓚᑦᑕᕕᐅᑉ ᐱᒍᑦᔨᕙᑦᑕᖏᓐᓂᒃ ᐅᖓᕙᐅᓪᓗ ᓄᓇᓕᓕᒫᖏᓐᓂᒃ.
ᓯᕗᓪᓕᐹᖅ ᓄᐃᒍᒪᔭᕋ ᑐᓚᑦᑕᕕᐅᑉ ᐱᓇᓱᑦᑏᓂᐊᕐᓂᖓ. ᐃᑲᔪᕐᓯᒪᔭᐅᒍᒪᕗᒍᑦ , ᑐᓚᑦᑕᕕᒃ ᑭᖕᖒᒪᑦᓯᓚᕆᒻᒪᑦ ᐃᑲᔪᕐᓯᒪᔭᐅᓂᕐᒥᒃ ᐃᓄᓐᓄᑦ ᐃᑲᔪᕐᓯᒪᔭᐅᖁᓪᓗᒋᑦ ᐃᓚᒌᑦᑐᑦ, ᓄᓇᕐᖃᑎᕗᑦ ᐃᓄᓕᒫᑦᓯᐊᓗ ᓄᓇᓕᑦᑎᓂᒃ ᐊᓂᕐᕋᓖᑦ.
ᑐᓚᑦᑕᕕᒃ ᑭᖕᖒᒪᑦᓯᓚᕆᑦᑐᖅ ᐃᓄᓐᓂᒃ ᐱᓇᓱᑦᑎᐅᒍᓐᓇᑐᓂᒃ ᓄᓇᓕᓐᓂ. ᑐᓚᑦᑕᕕᒃ ᐱᓇᓱᑦᑎᓴᕐᓯᐅᓚᕆᑦᑐᖅ ᐃᓄᓐᓂᒃ ᐱᓇᓱᒐᔭᕐᑐᓂᒃ. ᐱᓇᓱᐊᕈᒪᒍᕕᑦ ᑐᓚᑦᑕᕕᒻᒥ ᐃᑲᔪᕐᓯᒪᒍᒪᓗᑎᑦ ᓄᓇᓕᓐᓂᒃ, ᐃᓚᑎᓐᓂᒃ, ᐱᖃᓐᓈᑎᓐᓂᒃ, ᖃᐅᔨᒋᐊᕐᕕᐅᖁᔨᕗᖓ ᑐᓚᑦᑕᕕᐅᑉ ᐱᓇᓱᑦᑎᓕᕆᔨᖏᓐᓂᒃ ᖃᓄᐃᑦᑐᐃᑦ ᐱᓇᓱᒉᑦ ᐊᑐᐃᓐᓇᐅᒪᖔᑕ ᐱᓇᓱᒍᒪᐅᑎᑎᓐᓂᓗ ᓄᐃᑦᓯᕕᒋᓗᒋᑦ.
ᐱᓇᓱᑦᑎᓕᕆᔩᑦ ᖃᐅᔨᒐᓱᐊᕐᕕᐅᒍᓐᓇᑐᑦ ᖃᕆᑕᐅᔭᒃᑯᑦ ᐊᓪᓚᕕᒋᓗᒋᑦ ᐅᕙᓂ: rh.ungava@ssss.gouv.qc.ca ᐅᖄᓚᐅᑎᒃᑯᓗᓐᓃᑦ ᐅᕗᖓ 819-964-2905 #2462.
ᑐᖓᓕᐊ ᐅᖃᕈᒪᔭᕐᒪ ᐃᓕᖓᔪᖅ ᐃᑲᔪᕐᓯᒪᒍᓐᓇᑐᓄᑦ ᒪᓕᑦᑎᐅᓂᒃᑯᑦ ᐃᓄᒻᒥ ᐋᓐᓂᐊᕕᒻᒦᒋᐊᖃᓕᕐᐸᑦ ᐅᕝᕙᓗᓐᓃᑦ ᒪᓐᑐᕆᐊᓕᐊᕆᐊᖃᓕᕐᐸᑦ ᑲᒪᒋᔭᐅᔭᕐᑐᓗᓂ. ᑐᑭᓯᒪᑦᓯᐊᑐᖓ ᑕᒪᓐᓇ ᐱᔭᕆᐊᑭᑦᑐᑐᐃᓐᓇᐅᖏᒋᐊᖓ ᑐᑭᓯᒪᔭᐅᒍᒪᑦᓱᖓᓗ ᑐᓚᑦᑕᕕᒃ ᐱᕕᓕᒫᒥᒍᑦ ᐃᑲᔪᕐᓯᒪᒐᓱᐊᕐᒪᑦ ᑲᒪᒋᔭᒥᓂᒃ, ᐊᑐᕐᑎᐅᔪᓂᒃ ᐃᓚᒌᓂᓪᓗ ᒪᓕᑦᑎᖃᕐᑎᓯᓂᒃᑯᑦ ᓇᓪᓕᑳᕈᓐᓇᓂᕐᒥᓗ ᐃᓄᒻᒥᒃ ᒪᓕᒍᓐᓇᑐᒥᒃ ᐋᓐᓂᐊᕕᓕᐊᕐᑐᒥ ᐃᑲᔪᕐᓯᒪᓚᖓᓗᓂ ᑖᑦᓱᒥ ᓇᔪᐃᓐᓇᓗᒍᓗ ᖃᖓᓕᒫᒃᑯᑦ ᑲᒪᒋᔭᐅᑦᓯᐊᕆᐊᖃᕐᓂᖓᓂ.
ᖃᐅᔨᒪᔭᐅᖁᔨᕗᖓ ᐱᒻᒪᕆᓐᓂᒃ ᑐᓚᑦᑕᕕᒻᒥᑦ ᐱᔪᓂ ᐊᐅᓪᓚᕆᐊᖃᕐᑐᓕᕆᔩᓂᓪᓗ ᐋᓐᓂᐊᕕᓕᐊᕆᐊᖃᕐᓂᐅᑉ ᒥᑦᓵᓄᑦ ᒪᓕᑦᑎᖃᕆᐊᖃᕐᓂᐅᓗ.
ᐋᓐᓂᐊᓯᐅᕐᑕᐅᔭᕆᐊᓕᒃ ᐊᐅᓪᓚᕆᐊᖃᓕᑐᐊᕐᒪᑦ ᓄᓇᓕᒥᓂᑦ, ᑐᑭᓯᒪᑦᓯᐊᑐᒍᑦ ᐅᖁᒣᑦᑑᒍᓐᓇᕆᐊᖓᓂᒃ. ᐊᓂᕐᕋᕆᔭᒥᑦ ᐅᖓᓯᑦᑑᒋᐊᖅ ᐱᔭᕆᐊᑭᑦᑑᖏᑦᑐᖅ. ᑌᒣᒻᒪᑦ ᑐᑭᓯᓇᑦᓯᐊᑐᒥᒃ ᓄᓇᕕᒻᒨᓕᖓᔪᒥᒃ ᒪᓕᒐᖃᓚᕿᔪᒍᑦ ᐃᑲᔪᕐᓯᒪᔭᐅᖁᓪᓗᒋᑦ ᐋᓐᓂᐊᕕᓕᐊᕐᑐᐃᑦ ᒪᓕᑦᑎᖃᕐᓂᑯᑦ.
ᒪᓕᑦᑎᐅᔪᖅ ᑲᒪᒋᔭᖃᕆᐊᓕᒃ, ᐃᑲᔪᕐᓯᒪᓗᓂ ᑐᖕᖓᓱᑦᑎᓯᓗᓂᓗ ᐊᐅᓚᒋᐊᖃᕐᑐᖃᓕᕐᐸᑦ ᐋᓐᓂᐊᓯᐅᕐᑎᓄᓪᓗ ᑕᑯᔭᐅᕕᑦᓴᓕᐊᕆᐊᖃᓕᕐᐸᑦ.
ᑌᒪᖕᖓᓕᒫᒐᓚᒃ, ᒪᓕᑦᑎᐅᒐᔭᕐᑐᖅ ᐊᖏᕐᑕᐅᓴᐅᑎᒋᓲᖅ ᒪᓕᓚᖓᓗᓂ ᐱᐊᕋᕐᓂᒃ, ᐃᓄᑐᖃᕐᓂᒃ 65-ᓂᒃ ᐅᑭᐅᓕᓐᓂᒃ ᐊᖓᔪᑦᓯᓂᓪᓗ, ᐱᐊᕋᑦᓴᓕᓐᓂᒃ ᐊᐅᓚᒋᐊᖃᓕᑐᐊᕐᒪᑕ ᑲᒪᒋᔭᐅᒋᐊᕐᑐᓗᓂᒃ ᐱᐊᕋᕐᑖᕆᐊᕐᑐᓗᑎᓪᓘᓃᑦ, ᑭᓇᑐᐃᓐᓇᑯᑦ ᐱᒻᒪᕆᒻᒥᒃ ᐋᓐᓂᐊᒍᑎᓖᑦ, ᑲᒡᒍᑎᓖᑦ ᑲᒡᒍᑎᖃᕐᓂᐊᖒᕆᔭᐅᔪᓪᓗ, ᑎᒥᒥᒍᑦ ᐃᓱᒪᒃᑯᓗᓐᓃᑦ ᐃᓗᓯᕐᓱᓯᐊᖕᖏᑐᑦ ᐱᕐᖃᔭᑦᓯᐊᖏᑦᑑᒍᑎᒋᓚᕿᑦᓱᒍ ᐊᒻᒪᓗ ᐋᓐᓂᐊᕕᓕᐊᕐᑐᑦ ᖃᓪᓗᓈᑎᑑᕐᖃᔭᕋᑎᒃ ᒍᐃᒍᐃᑎᑐᓪᓘᓃᑦ.
ᒪᓕᑦᑏᑦ ᐊᖏᕐᑕᐅᓲᖑᒻᒥᔪᑦ ᓇᐅᑐᐃᓐᓇᖅ ᑲᒪᒋᔭᐅᓪᓗᑯᐊᐱᒍᑎᖃᕆᐊᖃᑐᐊᕐᒪᑦ ᐋᓐᓂᐊᒥᒍᑦ ᐅᕝᕙᓗᓐᓃᑦ ᖃᓪᓗᓈᑦ ᓄᓇᖓᓐᓅᕆᐅᓚᖓᑐᐊᕐᒪᑦ.
ᒪᓕᑦᑎᐅᓚᖓᔪᖅ ᐋᓐᓂᐊᕕᓕᐊᕐᑐᒥᒃ 18-ᓂᒃ ᐅᑭᐅᖃᕆᐊᓕᒃ ᐊᖓᔪᑦᓯᐅᓗᓂᓗᓐᓃᑦ, ᑲᒪᑦᓯᐊᕈᓐᓇᑑᓗᓂ ᐃᑲᔪᕐᓯᒪᑦᓯᐊᕈᓐᓇᓗᓂ ᐊᐅᓚᓯᒪᓂᐅᔪᓕᒫᒥ. ᐃᑲᔪᕐᓯᒪᒍᓐᓇᕆᐊᓕᒃ ᑐᓴᐅᒪᑎᑦᓯᔨᐅᓂᒃᑯᑦ, ᑐᑭᓯᒪᓗᓂ ᐋᓐᓂᐊᓯᐅᕆᒍᑎᐅᔪᑦ ᖃᐅᔨᒪᔭᐅᒋᐊᖃᕐᓂᖓᓂᒃ, ᐊᑎᓕᐅᕐᑎᐅᓗᓂ ᑕᑕᕐᓴᒐᕐᓂᒃ ᕆᐊᖃᕈᓂ, ᑎᒥᒨᓕᖓᔪᑎᒍᑦ ᐃᑉᐱᓂᐊᕐᓂᑰᓕᖓᔪᑎᒍᓪᓗ ᐃᑲᔪᕐᓯᒪᔨᐅᓗᓂ.
ᐃᓚᖓᓂ ᐊᑐᓕᑭᑕᖕᖏᑑᒐᓗᐊᒃᑯᑦ, ᒪᓕᑦᑎ ᐁᑉᐸᖃᕐᑎᑕᐅᒍᓐᓇᒥᔪᖅ. ᑕᒪᑦᓱᒪ ᑐᑭᑖᕐᑕᐅᓂᖓ ᕿᒥᕐᕈᔭᐅᑦᓯᐊᒪᕆᓲᖅ ᐊᐅᓚᒋᐊᖃᕐᑐᓕᕆᔨᓄ ᐃᑉᐱᒋᓗᒋᑦ ᐋᓐᓂᐊᓯᐅᕐᑕᐅᒋᐊᓖᐅᑉ ᑭᖕᖒᒪᑦᓯᓂᖏᑦ ᑲᒪᒋᔭᐅᑦᓯᐊᖁᓪᓗᒋᓪᓗ.
ᐃᓚᒌᑦ ᒪᕐᕉᓂᒃ ᐅᖓᑖᓄᓪᓘᓃᑦ ᒪᓕᑦᑎᖃᕈᒪᑉᐸᑕ, ᑮᓇᐅᔭᕐᑐᕈᑎᒋᐊᓪᓓᑦ ᐃᒻᒥᒎᕐᓗᑎᒃ ᐊᑭᓕᕐᑕᐅᒍᑎᖃᕆᐊᖃᕋᔭᕐᑐᑦ. ᑐᑭᓯᒋᐊᕈᒪᒍᕕᑦ, ᖃᐅᔨᒐᓱᐊᕐᕕᖃᕈᓐᓇᑐᑎᑦ ᐊᐅᓪᓚᑐᑦᓴᓕᕆᔨᓂᒃ ᐅᖃᐅᑎᓂᐊᕋᕕᒃᑭᑦ ᐃᓕᓐᓅᓕᖓᔪᓂᒃ ᐋᓐᓂᐊᓯᐅᕐᑕᐅᒍᑎᒋᒋᐊᓕᓐᓅᓕᖓᔪᓂᓪᓗ
ᑐᓚᑦᑕᕕᒻᒥ, ᐱᓇᓱᐊᖃᑎᒌᑦᓯᐊᐳᒍᑦ ᐊᑦᑕᓇᖕᖏᑐᒦᖁᔨᒧᑦ, ᓲᓱᒋᔭᖃᑦᓯᐊᕈᒪᒧᑦ ᐃᓕᕐᕈᓯᒃᑰᓕᖓᔪᓂᓪᓗ ᑲᒪᒋᔭᐅᒍᓯᖃᖁᔨᒧᑦ ᐅᖓᕙᒥᐅᓂᒃ ᓄᓇᓕᓐᓂ.
ᑐᕌᒐᖃᕐᐳᒍᑦ ᐃᑲᔪᕐᓯᒪᔭᐅᖁᓪᓗᑎᑦ, ᑐᑭᓯᒪᑦᓯᐊᖁᓪᓗᑎᑦ ᑲᒪᒋᔭᐅᖁᓪᓗᑎᓪᓗ ᐱᒍᑦᔭᐅᓂᖃᓕᕈᕕᑦ ᐋᓐᓂᐊᕕᒻᒥ ᑯᑦᔪᐊᒥ ᐅᕝᕙᓗᓐᓃᑦ ᐊᐅᓪᓚᕆᐊᖃᓕᑐᐊᕈᕕᑦ ᑲᒪᒋᔭᐅᔭᕐᑐᓗᑎᑦ ᒪᓐᑐᕆᐊᒥ.
ᑐᕌᒐᖃᕐᐳᒍᑦ ᐃᑲᔪᕐᓯᒪᔭᐅᖁᓪᓗᑎᑦ, ᑐᑭᓯᒪᑦᓯᐊᖁᓪᓗᑎᑦ ᑲᒪᒋᔭᐅᖁᓪᓗᑎᓪᓗ ᐱᒍᑦᔭᐅᓂᖃᓕᕈᕕᑦ ᐋᓐᓂᐊᕕᒻᒥ ᑯᑦᔪᐊᒥ ᐅᕝᕙᓗᓐᓃᑦ ᐊᐅᓪᓚᕆᐊᖃᓕᑐᐊᕈᕕᑦ ᑲᒪᒋᔭᐅᔭᕐᑐᓗᑎᑦ ᒪᓐᑐᕆᐊᒥ.
ᓇᑯᕐᒦᕈᒪᕗᖓ ᒪᕆᐊᓐ ᐱᓕᓵᓐᒥᒃ, ᐋᓐᓂᐊᓯᐅᕐᑎᓂ ᐃᒫᙰᕐᑎ ᑯᑦᔪᐊᑉ ᐋᓐᓂᐊᕕᖓᓂ, ᑲᑎᒪᔨᓂᒃ ᑐᑭᓯᑎᑦᓯᒋᐊᕐᑐᓚᐅᔪᒻᒪᑦ ᐋᓐᓂᐊᓯᐅᕐᑏᑦ ᓄᓇᓕᓐᓂ ᐊᖏᓂᕐᓴᒋᐊᓪᓚᒥᒃ ᐋᓐᓂᐊᓯᐅᕆᒍᑎᖃᕐᓂᖓᓂᒃ.
ᑐᓚᑦᑕᕕᒻᒥ, ᐊᑦᔨᒌᖕᖏᑐᓂᒃ ᐋᓐᓂᐊᓯᐅᕐᑎᖃᕐᖁᒍᑦ ᐋᓐᓂᐊᕕᐊᐱᓐᓂ ᐋᓐᓂᐊᕕᒻᒥᓗᓐᓃᑦ ᐱᓇᓱᐊᓲᓂᒃ. ᐃᓚᖏᑦ ᓇᐅᓕᒫᓂᒃ ᖃᓄᐃᖕᖏᓯᐊᕆᐊᖃᕐᑐᓕᕆᓂᕐᒥᒃ ᐱᓇᓱᐊᕐᑐᑦ, ᐊᓂᕐᕋᓯᒪᔪᓂᒃ ᐋᓐᓂᐊᓯᐅᕆᔩᑦ, ᐃᓱᒪᓕᕆᔭᐅᔪᓂᒃ ᐋᓐᓂᐊᓯᐅᕆᔩᑦ ᓄᓇᓕᐅᓪᓗ ᐱᑦᔪᔭᐅᒍᑎᖏᓐᓂ ᐋᓐᓂᐊᓯᐅᕐᑏᑦ. ᐊᖏᓂᕐᓴᒋᐊᓪᓚᒥᒃ ᐋᓐᓂᐊᓯᐅᕆᒍᓯᓕᓐᓂᒃ ᐋᓐᓂᐊᓯᐅᕐᑎᖃᕐᒥᔪᒍᑦ
ᐊᖏᓂᕐᓴᒋᐊᓪᓚᒥᒃ ᐋᓐᓂᐊᓯᐅᕆᒍᑎᓖᑦ ᐱᓇᓱᐊᓕᓂᐅᒍᑎᖃᕐᓱᑎ ᐱᓪᓗᑯᒋᐊᓕᕐᑎᒍᑦ ᐃᓕᓐᓂᐊᑎᑕᐅᓂᖃᕆᐊᓪᓚᓲᑦ. ᐃᓕᓐᓂᐊᑎᑕᐅᒪᔪᑦ ᖃᐅᔨᓴᕆᐊᓪᓚᕈᓐᓇᓂᕐᒥᒃ ᐋᓐᓂᐊᓯᐅᕐᑕᒥᓂᒃ, ᐊᐱᕆᐅᑎᖃᕈᓐᓇᓱᑎᓪᓗ ᑐᑭᓯᒋᐊᓪᓛᕈᑎᑦᓴᓂᒃ ᐋᓐᓂᐊᓯᐅᕆᓂᒃᑯᓗ ᕿᒥᕐᕈᕈᓐᓇᑎᑕᐅᑦᓱᑎᒃ. ᑲᒪᒋᔭᖃᕈᓐᓇᑐᐃᑦ ᐊᑦᔨᒌᖕᖏᑐᓂᒃ ᐋᓐᓂᐊᒍᑎᐅᔪᓂᒃ ᒪᓕᑦᓱᑎᒃ
ᑐᑭᖃᑦᓯᐊᒪᕆᑦᑐᓂᒃ ᐋᓐᓂᐊᓯᐅᕆᔪᖃᓕᕈᓂ ᒪᓕᑦᑕᐅᔭᕆᐊᓕᓐᓂ ᑕᒪᒃᑯᐊ ᑌᔭᐅᔪᑦ ᐃᓗᐃᒃᑲᐅᓱᑎᒃ ᑎᓕᔨᒍᑎᐅᓯᒪᔪᑦ. ᐃᓗᐃᒃᑲᐅᓱᑎᒃ ᑎᓕᔨᒍᑎᐅᓯᒪᔪᑦ ᐃᓕᖓᔪᑦ ᐋᓐᓂᐊᓯᐅᕆᔪᖃᓕᕈᓂ ᒪᓕᒐᐅᒋᐊᓕᓐᓄᑦ ᐊᑐᐃᓐᓇᕈᕐᑎᑕᐅᓯᒪᔪᓄᑦ ᐊᖏᕐᑕᐅᒪᑦᓱᑎᓪᓗ ᐋᓐᓂᐊᓯᐅᕐᑎᒪᕆᓐᓄᑦ ᐄᕐᖃᒐᓕᕆᔨᓄᓪᓗ. ᑐᑭᓯᓇᕐᑎᓯᔪᐃᑦ ᓇᓪᓕᐊᖏᓐᓂᒃ ᐋᓐᓂᐊᓯᐅᑎᓂᒃ ᐱᑎᑦᓯᒍᓐᓇᒪᖔᑦ ᐋᓐᓂᐊᓯᐅᕐᑎ ᖃᓄᕐᓗ ᑲᒪᒋᔭᖃᕈᓐᓇᒪᖔᑦ ᖃᓄᐃᑦᑐᒦᓐᓂᐅᔪᖅ ᓇᓪᓕᐊᒍᑦ. ᑕᒪᒃᑯᐊ ᒪᓕᒐᐅᔪᑦ ᑐᑭᓯᓇᕐᑎᓯᑦᓯᐊᒥᔪᑦ ᐋᓐᓂᐊᓯᐅᕐᑎᐅᑉ ᐱᓇᓱᐊᕆᐊᓕᒥᑕ ᐅᖓᑖᓄᕐᖃᔭᖕᖏᐅᑎᖏᓐᓂᒃ.
ᖃᓄᐃᒍᑕᐅᔪᖅ ᐱᒻᒪᕆᐅᓗᐊᑐᐊᕐᐸᑦ ᑖᒃᑯᐊᓗ ᐱᔪᓐᓇᐅᑎᐅᑎᑕᐅᔪᑦ ᐅᖓᑖᓄᕐᓯᒪᓗᐊᕐᐸᑦ, ᐋᓐᓂᐊᓯᐅᕐᑎ ᐅᖄᓚᕕᖃᓕᕋᔭᕐᑐᖅ ᐋᓐᓂᐊᓯᐅᕐᑎᒪᕆᒻᒥᒃ. ᖃᖓᑐᐃᓐᓇᓕᒫᒃᑯᑦ, ᐋᓐᓂᐊᓯᐅᕐᑕᐅᔪᖅ ᐅᖄᖃᑎᖃᕈᒪᑐᐊᕐᐸᑦ ᐋᓐᓂᐊᓯᐅᕐᑎᒪᕆᒻᒥᒃ, ᑌᒣᒍᓐᓇᑎᑕᐅᔪᖅ. ᐊᑦᑕᓇᖕᖏᑐᒦᒋᐊᖃᕐᓂᓯ ᖃᓄᐃᖕᖏᓯᐊᕆᐊᖃᕐᓂᓯᓗ ᓯᕗᓪᓕᐸᐅᑦᔭᐅᖏᓐᓇᓕᒫᕐᑐᖅ.
ᐊᖏᓂᕐᓴᒋᐊᓪᓚᒥᒃ ᐋᓐᓂᐊᓯᐅᕆᒍᓯᓖᑦ ᐋᓐᓂᐊᓯᐅᕐᑏᑦ ᐃᓕᓐᓂᐊᑎᑕᐅᓲᑦ ᑯᑦᔪᐊᒥ ᓄᓇᓕᒻᒨᕆᐊᓚᐅᕋᑎᒃ. ᒪᕐᕉᒍᓐᓇᑑᒃ ᑕᓪᓕᒪᐅᓗᑎᓪᓘᓃᑦ ᑌᒣᑦᑐᑎᒍᑦ ᐋᓐᓂᐊᓯᐅᕆᒍᓐᓇᑎᑌᑦ ᐊᑐᓂ ᓄᓇᓕᓐᓂ.
ᐋᓐᓂᐊᓯᐅᕐᑎᕗᑦ ᐊᒥᓱᒋᐊᓪᓚᓂᒃ ᐱᒻᒪᕆᓐᓂᒃ ᐱᓇᓱᐊᓲᖑᒻᒥᔪᐃᑦ: ᐃᓂᓪᓚᑎᕆᑦᓱᑎᒃ ᐋᓐᓂᐊᓯᐅᑎᓂᒃ, ᐋᓐᓂᐊᓯᐅᕐᑕᐅᒋᐊᓕᐅᓪᓗ ᐊᐅᓪᓚᕆᐊᖃᕐᓂᖓᓂ ᐸᕐᓇᓱᑎᒃ, ᑎᑭᓭᔨᐅᑦᓱᑎᓪᓗ ᓱᓇᒃᑯᑕᐅᒋᐊᓕᓐᓂᒃ ᐋᓐᓂᐊᕕᐊᐱᒻᒥᓗ ᐊᐅᓚᑦᓯᓯᐊᕋᓱᐊᕐᑎᐅᓱᑎᒃ.
ᐊᖏᓂᕐᓴᒋᐊᓪᓚᒥᒃ ᐋᓐᓂᐊᓯᐅᕆᒍᓯᓖᑦ ᐋᓐᓂᐊᓯᐅᕐᑏᑦ ᐃᓕᓐᓂᒃ ᐃᑲᔪᕆᐊᕐᓯᒪᔪᑦ, ᐊᑦᑕᓇᖕᖏᑐᒃᑯᓗ ᑲᒪᒋᔭᖃᕐᓱᑎᒃ ᐱᓇᓱᐊᖃᑎᖃᑦᓯᐊᑐᑦ ᐋᓐᓂᐊᓯᐅᕐᑎᒪᕆᓐᓂᒃ ᓈᒻᒪᓈᑦᓯᐊᑐᒃᑯᑦ ᑲᒪᒋᔭᐅᓂᖃᖁᓪᓗᑎᑦ ᕆᐊᖃᕐᕕᒋᓕᕐᑕᓂ.
ᐅᖃᕐᖃᐅᒥᒐᒪ , ᖁᕕᐊᕐᐳᖓ ᖃᐅᔨᔭᐅᑎᑦᓯᒋᐊᖅ ᐃᓚᖏᓐᓂᒃ ᑲᑎᒪᔨᑦᑕ ᑐᓴᓚᐅᔭᖏᓐᓂᒃ ᓄᓇᕕᒻᒥ ᐃᓗᓯᓕᕆᔨᒃᑯᓂᑦ ᐱᓯᒪᑦᓱᑎᒃ. ᐅᑯᐊ ᐱᖓᓱᐃᑦ, ᑲᔪᓯᑎᑕᐅᓂᖓ Nuka Sysytem in Nunavik ᓄᑲᐅᓂᕋᕐᑕᐅᑉ ᐱᓇᓱᒍᑎᐅᑉ ᓄᓇᕕᒻᒥ, ᐅᐃᕆᒪᓇᕐᑐᓕᕆᓂᖅ ᓄᓇᕕᒻᒥᓗ ᐃᓚᒌᑦ ᐸᐸᑕᐅᕕᖓᑕ ᐱᕙᓪᓕᐊᕈᑎᒋᕙᓪᓕᐊᓂᐊᕐᑕᖓᑕ ᐸᕐᓇᑕᐅᒪᒍᑎᖓ ᑐᕃᓐᓇᑐᒥᒃ ᓱᕐᕃᓂᖃᓪᓚᕆᓚᖓᔪᑦ ᐅᖓᕙᐅᑉ ᓄᓇᓕᖏᓐᓂᒃ ᑐᓚᑦᑕᕕᐅᓪᓗ ᑲᒪᒋᕙᑦᑕᖏᓐᓂᒃ ᐊᑐᕐᑎᐅᔪᓂᓪᓗ.
ᐅᖃᐅᓯᕆᓯᒻᒥᔭᕋ ᐱᕙᓪᓕᐊᑎᑕᐅᓂᖓ NUKA system ᓄᓇᕕᒻᒥ ᐱᓇᓱᒍᑎᐅᑦᓱᓂ ᓄᑲᐅᓂᕋᕐᑕᖅ.
ᖃᐅᔨᔭᐅᑎᑦᓯᒍᒪᕗᖓ ᐱᒻᒪᕆᐅᑦᓱᓂ ᓂᕆᐅᓐᓇᓯᐊᑐᒥᓪᓗ ᐱᒋᐊᕐᑎᑕᐅᓯᒪᔪᒥᒃ ᐃᓕᖓᓚᖓᓗᓂ ᑐᓚᑦᑕᕕᐅᑉ ᑲᒪᒋᕙᑦᑕᖏᓐᓄᑦ ᐊᑐᕐᑎᓄᓪᓗ: ᑲᔪᓯᑎᑕᐅᕙᓪᓕᐊᑐᐃᓐᓇᕆᐊᖃᕐᓂᖓ ᓄᑲᐅᓂᕋᕐᑕᐅᑉ ᐱᓇᓱᒍᑎᐅᑉ ᐅᖓᕙᒥ ᐋᓐᓂᐊᓂᓕᕆᓂᐅᔪᑎᒍᑦ.
ᑖᓐᓇ ᓄᑲ ᐱᓇᓱᐊᕈᑎᑦᓴᔭᖅ ᓄᐃᑕᐅᓯᒪᔪᖅ ᐊᓛᓯᑲᒥ. ᐊᓐᓂᐊᓂᓕᕆᒍᓯᐅᑦᓱᓂ ᐃᓂᓪᓚᑎᕐᑕᐅᒍᑎᖃᕐᓯᒪᔪᖅ ᐃᓄᐃᑦ ᐃᓱᒪᒍᓯᖏᑎᒍᑦ, ᓄᐃᑕᐅᑦᓱᓂ ᐃᓄᓐᓄᑦ ᐃᓄᓐᓅᓕᖓᓚᖓᓗᓂ.
ᑖᓐᓇ ᐋᓐᓂᐊᓯᐅᕆᓂᕐᒥᒃ ᑲᒪᒍᓯᐅᔪᖅ ᓄᐃᑕᐅᒪᒍᓯᓕᒃ ᐅᑎᕐᑎᓯᒍᒪᓂᕐᒥᒃ ᐊᐅᓚᑕᐅᓂᖓᓂᒃ ᐋᓐᓂᐊᓂᓕᕆᓂᐅᑉ ᑕᒪᒃᑯᓄᖓ ᐃᓄᓐᓄᑦ ᐱᒍᑦᔨᔭᒥᓄᑦ. ᑐᖕᖓᕕᖃᓪᓚᕆᑦᑐᖅ ᐱᔭᕆᐊᑭᑦᑐᒥᒃ ᐊᑦᑕᓀᑦᑐᓚᕆᒻᒥᓗ: ᐃᓄᒻᒥᒃ ᐃᓚᖏᓐᓂᓗ ᕿᑎᖓᓃᑦᑎᓯᑦᓯᐊᓱᓂ ᑲᒪᒋᔭᐅᕕᐅᑉ, ᓲᓱᖏᔭᖃᕐᓱᓂ ᐃᓕᕐᕈᓯᒃᑯᑦ ᐱᒻᒪᕆᖁᑕᐅᔪᓂᒃ , ᓇᒻᒥᓂᕐᓱᕈᓐᓇᓂᕐᒥᒃ ᓄᓇᓕᐅᓪᓗ ᓲᖑᓂᕆᔭᖏᓐᓂᒃ.
ᑖᓐᓇ ᐱᓇᓱᒍᓯᐅᔪᖅ ᐃᒻᒥᒎᓈᕐᑎᑐᓂᒃ ᐃᓚᒌᓂᓪᓗ ᕿᑎᖓᓃᑦᑎᓯᑦᓯᐊᑐᖅ ᑲᒪᒍᓯᐅᔪᐃᑦ. ᑲᑎᑎᑦᓯᒍᑎᐅᔪᖅ ᐋᓐᓂᐊᓯᐅᕐᑎᓂᒃ, ᐃᓄᓕᕆᔨᓂᒃ, ᐃᓱᒪᓕᕆᔨᓂᒃ ᐊᓯᖏᓐᓂᓗ ᑲᒪᔨᐅᔪᓂᒃ ᐱᓇᓱᐊᖃᑎᒌᓲᓂᒃ, ᐋᓐᓂᐊᒥᒃ ᑕᑯᓐᓇᕋᓱᑦᑕᑐᐊᖃᕈᓐᓀᓗᑎᒃ, ᑭᓯᐊᓂᓕ ᐃᓗᓐᓈᒍᑦ ᖃᓄᐃᖕᖏᓯᐊᕐᓂᒥᒃ ᑕᑯᓐᓇᖔᕐᓗᑎᒃ - ᑎᒥᒃᑯᑦ, ᐃᑉᐱᓂᐊᕐᓂᑯᑦ, ᐃᓱᒪᒃᑯᑦ ᐅᑉᐱᓂᒃᑯᓗ. ᐃᓄᑐᙯᑦ ᖃᓄᐃᓘᕐᑎᓚᕆᐅᔪᑦ ᑕᒪᑐᒨᓇ, ᖃᐅᔨᒪᒍᓯᕐᒥᓂᒃ ᑐᑭᓯᒪᔭᐅᑎᑦᓯᓂᒃᑯᑦ ᐱᐅᓕᐊᕐᑎᐅᓂᒃᑯᓗ ᐃᓕᕐᕈᓯᕐᒥᒃ ᐱᕐᖁᓯᕐᓂᓗ.
ᐋᓐᓂᐊᓯᐅᕆᒍᓯᑐᙯᑦ ᒪᒥᓴᕈᑎᑦᓴᔦᓪᓗ ᐃᓕᑕᕐᓯᒪᔭᐅᒻᒥᔪᑦ ᐱᒻᒪᕆᐅᒋᐊᖏᑦ ᖃᓄᐃᖕᖏᓯᐊᕐᓂᒧᑦ.
ᖃᐅᔨᔭᐅᖃᑦᑕᓯᒪᔪᐃᑦ ᐊᓛᓯᑲᒥ ᐱᐅᔪᕋᑕᐅᓯᒪᔪᐃᑦ: ᐋᓐᓂᐊᕕᓕᐊᕆᐊᑐᖕᖏᓂᕐᓴᐅᓃᑦ, ᐋᓐᓂᐊᓯᐅᕐᑕᐅᔪᐃᓪᓗ ᐱᓇᓱᑦᑎᒐᓭᑦ ᐃᓱᕐᕆᓂᕐᓴᐅᓕᕐᓱᑎᒃ, ᓯᕗᕐᖐᓯᒪᒐᓱᐊᕈᑏᓪᓗ ᓱᖑᓂᕐᓴᐅᓱᑎᒃ ᐊᕗᖓᐅᓕᔪᒥᓪᓗ ᐱᑦᓯᐊᓂᕐᓴᐅᒍᑎᐅᑦᓱᓂ.
ᐱᒻᒪᕆᐅᓂᕐᐹᖅ, ᑖᓐᓇ ᐱᓇᓱᐊᕈᑎᒃ ᓱᖑᓰᒋᐊᓪᓚᓯᒪᔪᖅ ᐅᑉᐱᕆᐅᑎᒍᓐᓇᓂᖓᓂᒃ ᓄᓇᓕᐅᑉ ᐋᓐᓂᐊᓯᐅᕆᒍᓯᐅᔫᓪᓗ.
ᑐᓚᑦᑕᕕᒃ ᐃᓱᒪᒋᔭᖃᕐᑐᖅ ᓄᑲᐅᓂᕋᕐᑕᒥᒃ ᐃᓕᖓᑎᑦᓯᒋᐊᒥᒃ ᑲᒪᒋᕙᑦᑕᒥᓄᑦ ᐊᑐᕐᑎᐅᔪᓄᓪᓗ, ᐃᓕᖓᓪᓚᕆᓐᓂᑯᖓᓄᑦ ᐃᓄᐃᑦ ᐱᒻᒪᕆᖁᑎᒋᔭᖏᓐᓄᑦ ᐅᑭᐅᕐᑕᑐᒥᓗ ᐱᐅᓯᐅᔪᒧᑦ. ᐱᐅᓯᐅᒥᑎᑦᓯᒍᑎᐅᒍᓐᓇᑐᖅ ᐊᑐᐃᓐᓇᖃᕐᓂᒥᒃ ᐱᑦᓯᐊᓂᕐᓴᑯᓪᓗ ᑲᒪᒋᔭᐅᒍᑎᓂᒃ, ᓱᖑᓯᐅᒥᑎᑦᓯᓗᓂᓗ ᓄᓇᓕᐅᑉ ᐃᒻᒥᓂᕿᓂᕐᓴᐅᓗᓂ ᑲᒪᒍᓇᓂᕆᔭᖓᓂᒃ ᐋᓐᓂᐊᓂᓕᕆᓂᕐᒥ ᐃᓄᓕᕆᓂᕐᒥᓗ ᐱᒍᑦᔨᐅᑎᓂᒃ.
ᑕᒪᓐᓇ ᐊᓯᑦᔨᑎᕆᕙᓪᓕᐊᓂᖅ ᐊᑯᓂᕆᑦᓯᒍᓐᓇᑐᖅ, ᐃᓕᓐᓂᐊᓂᕐᑕᖃᕆᐊᖃᕐᓱᓂᓗ ᐅᖓᕙᐅᓪᓗ ᓄᓇᓕᖁᑎᖏᑦ, ᐋᓐᓂᐊᓯᐅᕆᔩᑦ ᐃᓄᓕᕆᔩᓪᓗ ᐱᓇᓱᐊᖃᑕᐅᕙᑦᑐᐃᓗ ᓱᖑᔪᑦᓯᐊᒥᒃ ᐊᖏᕐᓯᒪᓂᖃᕆᐊᖃᕐᓱᑎᒃ. ᐱᓇᓱᐊᕐᑕᐅᓂᖓ ᐊᕐᕌᒍᕐᑐᕋᔭᕐᑐᓴᐅᔪᖅ ᐊᒥᓱᓂᒃ, ᑭᓯᐊᓂ ᓄᑲᐅᑉ ᐱᓇᓱᐊᕈᑕᐅᓂᖓ ᑐᑭᓕᑦᓯᐊᑯᑦ ᐱᐅᔪᕐᑎᒍᓪᓗ ᐊᓯᑦᔨᑎᕆᒍᓐᓇᑐᖅ ᑲᔪᓯᕙᓪᓕᐊᑎᑕᐅᓂᕐᒥᓂ.
ᑐᓚᑦᑕᕕᒃ ᐱᓇᓱᐊᕈᒪᓂᖃᕐᒥᔪᖅ ᓄᑲᐅᑉ ᐱᓇᓱᐊᕈᑕᐅᓂᖓᑕ ᓲᖑᓂᖓ ᐃᓚᒋᔭᐅᑎᒐᔭᕐᓗᒍ
IQI ᐱᓇᓱᐊᕈᑕᐅᓂᖓᓄᑦ (ᐃᓗᓯᕐᓱᓯᐊᕐᓂᖅ, ᐃᓅᖃᑎᒌᑦᓯᐊᓂᖅ ᖃᓄᐃᖕᖏᓯᐊᕐᓂᖅ) ᐊᑐᐃᓐᓇᐅᑎᑦᓯᒍᑎᐅᒐᔭᕐᓗᓂ ᓵᖕᖓᓯᒍᑎᑦᓯᐊᓂᒃ ᐃᓕᕐᕈᓯᒃᑯᓗ ᐊᑦᑕᓇᖕᖏᑐᓂᒃ ᐋᓐᓂᐊᓯᐅᕆᒍᓯᕐᓂᒃ ᐃᓄᓕᕆᒍᓯᕐᓂᓗ. ᓄᓇᐅᓕᒻᒥᐅᑦ ᐱᒍᓐᓇᓯᓕᐅᒥᑎᑕᐅᒋᐊᖃᕐᓂᖓ ᐃᓚᒋᔭᐅᓪᓚᕆᑦᑐᖅ ᑕᑯᓐᓇᕋᓱᐊᕐᑕᐅᔪᓂ - ᐃᓕᓐᓂᐊᑎᑦᓯᓂ, ᐱᓇᓱᑦᑎᖃᕐᓂᖅ ᓄᓇᓕᒻᒥᐅᓂᒃ ᐅᑦᑑᑎᒋᓗᒍ ᐋᓐᓂᐊᓯᐅᕐᑏᑦ, ᑭᒍᑎᓕᕆᔨᓂᒃ ᐃᑲᔪᕐᑏᑦ ᐊᓯᖏᓪᓗ ᐋᓐᓂᐊᓯᐅᕆᓂᕐᑎᒍᑦ ᐱᒍᓐᓇᐅᑎᓕᒻᒪᕇᑦ.
ᓀᓪᓕᑎᕐᓗᒍ, ᑎᑭᐅᑎᒐᓱᐊᕐᑕᕗᑦ ᑐᑭᖃᑦᓯᐊᑐᖅ: ᐊᑐᐃᓐᓇᐅᑎᑦᓯᓂᖅ ᓈᒻᒪᓈᑦᓯᐊᑐᓂᒃ, ᐃᓕᕐᕈᓯᕐᒨᓕᖓᔪᓂᒃ ᐊᑐᐃᓐᓇᐅᓯᐊᕐᑐᓂᓪᓗ ᐊᓂᕐᕋᒧᑦ ᖃᓂᓐᓂᓴᐅᔪᓂᒃ ᐱᒍᑦᔨᐅᑎᖃᕐᓂᖅ, ᓴᐳᒻᒥᔭᐅᓂᖃᑦᓯᐊᓗᑎᒃ ᐱᓇᓱᒍᑎᑦᓴᔭᐅᒋᐊᓕᓐᓄᑦ ᑮᓇᐅᔭᖃᕐᑎᑕᐅᓂᐅᔪᓄᓪᓗ. ᐊᑕᐅᑦᓯᑯᑦ ᐱᓇᓱᐊᖃᑎᒌᓪᓗᑕ ᓲᓱᒋᔭᖃᑦᓯᐊᓗᑕᓗ ᐃᓄᐃᑦ ᐱᒻᒪᕆᖁᑎᖏᓐᓂᒃ, ᐱᕈᕐᓭᒍᓐᓇᓯᐊᕐᖁᒍᑦ ᐋᓐᓂᐊᓯᐅᕆᒍᓯᐅᔪᓂᒃ ᓄᐃᑕᑎᑦᓯᓯᐊᕐᑐᓂᒃ ᓄᓇᓕᑦᑎᓂᒃ ᐃᑲᔪᕐᓯᒪᓗᑎᓪᓗ ᖃᓄᐃᖕᖏᓯᐊᕆᐊᖃᕐᓂᖓᓂᒃ ᐃᓅᖃᑎᑦᑕ.
ᑐᓚᑦᑕᕕᒃ ᑐᓴᐅᒪᔭᐅᖁᔨᒋᕗᖅ ᐱᒻᒪᕆᒻᒥᒃ ᓄᐃᑦᓯᒍᑎᐅᔪᒥᒃ ᓂᕆᐅᓐᓂᖃᑦᓯᐊᓂᕐᒥᒃ, ᐃᑲᔪᕐᓯᒪᒍᑎᐅᔪᒥᒃ ᒪᒥᓴᕐᓂᐅᔪᒥᓪᓗ. ᐊᑦᓱᕈᕐᓇᑐᒃᑰᕈᕕᑦ ᓇᓪᓕᒋᔦᓪᓘᓃᑦ ᐊᑦᓱᕉᑎᖃᕐᐸᑦ ᐃᒥᐊᓗᒻᒥᒃ, ᐋᖓᔭᓐᓇᑐᓂᒃ, ᓴᕙᑕᓕᒐᕐᓂᒥᒃ ᐊᓯᖏᓐᓂᓗᓐᓃᑦ ᐅᐃᕆᒪᐅᑎᓂᒃ, ᖃᐅᔨᒪᒋ ᐃᒫᒃ: ᐃᓄᑑᖕᖏᓚᑎᑦ, ᐃᑲᔪᑕᐅᒍᑎᑦᓭᑦ ᐊᑐᐃᓐᓇᐅᓯᐊᕐᖁᑦ ᐅᖓᕙᒥ.
ᑐᓚᑦᑕᕕᒻᒥ, ᐅᐃᕆᒪᓇᕐᑐᓕᕆᐅᓰᑦ ᐃᓄᒻᒪᕆᓐᓅᓕᖓᔪᑦ ᐊᑐᐃᓐᓇᐅᔪᑦ. ᑯᑦᔪᐊᒥ, ᐃᑲᔪᕐᓯᒪᔭᐅᒍᓐᓇᑐᑦ ᐃᓄᑑᓇᕐᑎᑐᑦ, ᐁᑉᐸᕇᑦ , ᐃᓚᒌᑦ ᐊᒥᓱᐃᓪᓗ ᑲᑎᒪᑎᑕᐅᓂᖓᒍᑦ - ᑕᒪᓐᓇ ᐊᑐᐃᓐᓇᐅᔪᖅ ᑭᖕᖑᒪᑦᓯᓂᖓᑦ ᒪᓕᓪᓗᒍ. ᐊᓯᖏᓐᓂ ᐅᖓᕙᐅᑉ ᓄᓇᓕᖏᓐᓂ, ᐃᓄᓕᕆᔩᑦ ᐊᑐᐃᓐᓇᐅᒥᔪᑦ ᐃᑲᔪᕐᓯᒍᓐᓇᓱᑎᒃ ᑕᓯᐅᕐᓯᒍᓐᓇᓱᑎᓪᓗ.
ᐅᖓᕙᓕᒫᑦᓯᐊᒥ, ᓯᕗᕐᖐᓯᒪᐅᑎᐅᒍᓐᓇᑐᑦ ᖃᓄᐃᖕᖏᓯᐊᕐᑎᓯᒐᓱᐊᕈᑏᓪᓗ ᐊᑐᐃᓐᓇᐅᔪᑦ ᐅᕕᒐᕐᑐᓄᑦ, ᐃᓄᒻᒪᕆᓐᓄᑦ ᐃᓚᒌᓄᓪᓗ. ᑐᓴᐅᒪᑎᑦᓯᒐᓱᐊᕈᑏᑦ ᓱᓇᓱᐊᕐᑎᓯᓂᒃᑯᑦ, ᓈᓚᐅᑎᒃᑯᑦ, ᐃᓕᓐᓂᐊᕕᑦᑎᒍᑦ ᓄᓇᓕᒻᒥᓗ ᖃᓄᐃᓘᕈᑕᐅᔪᑎᒍᑦ ᐊᑑᑎᕙᑦᑐᐃᑦ ᐃᓅᓯᖃᑦᓯᐊᓂᕐᒨᓕᖓᑦᓱᑎᒃ , ᐅᐃᕆᒪᓇᕐᑐᓂᓪᓗ ᐊᑐᕐᓂᐅᑉ ᐅᖄᒍᑕᐅᓂᖓ ᐅᒃᑯᐃᖔᑦᓯᐊᓂᒃᑰᑎᓪᓗᒍ.
ᑕᒪᒃᑯᓄᖓᓕ ᐃᓂᓪᓚᖓᓂᕐᓴᑯᑦ ᐃᑲᔪᕐᓯᔭᐅᔭᕆᐊᓕᓐᓄᑦ, ᐃᓱᐊᕐᓯᕕᒃ ᑯᑦᔪᐊᒥ ᐊᑐᐃᓐᓇᐅᔪᖅ 8-ᓂᒃ ᐱᓇᓱᐊᕈᓯᕐᓂᒃ ᒪᒥᓴᕐᑎᓯᓂᖃᓲᖑᑦᓱᓂ. ᐃᑲᔪᕐᓯᒪᒍᑎᖃᕐᒥᔪᐃᑦ ᐃᓱᐊᕐᓯᕕᐅᑉ ᓯᓚᑖᓂ ᐱᒍᑦᔨᓂᑦᑎᒍᑦ, ᐃᓱᐊᕐᓯᕕᓕᐊᓚᐅᕋᓂᓗ ᑲᒪᒋᔭᐅᒍᓯᕐᑎᒍᑦ ᐃᓱᐊᕐᓯᕕᒻᒦᒋᕐᓯᒪᓕᕐᑐᓗ ᐃᑲᔪᕐᓯᒪᔭᐅᕙᒻᒥᑎᓪᓗᒋᑦ, ᒪᒥᓴᕐᑎᓯᓃᓪᓗ ᓄᓇᒥ ᐊᑐᐃᓐᓇᐅᒥᔪᑦ. ᑕᒪᕐᒥᒃ ᐱᒍᑦᔨᐅᑎᖏᑦ ᐊᑐᐃᓐᓇᐅᓲᑦ ᑕᒃᑯᒧᑦ ᐅᖓᓯᑦᑐᒦᑦᑐᒐᓗᐊᒧᓪᓗ, ᑭᓇᑐᐃᓐᓇᑯᑦ ᐊᑐᐃᓐᓇᖃᖁᓪᓗᒋᑦ ᐃᑲᔪᕐᑕᐅᒍᑎᓂᒃ ᐊᑦᔨᒌᖕᖏᑐᑎᒍᑦ.
ᓂᑦᓯᖅ+ ᐱᑕᖃᕐᒥᔪᖅ, ᐱᓇᓱᒍᑎᐅᑦᓱᓂ ᐊᑐᐃᓐᓇᐅᔪᖅ ᑎᒍᔭᐅᓂᑐᐃᓐᓇᐅᑉ ᓯᓚᑖᒍᕐᑎᓯᒍᑎᐅᑦᓱᓂ ᓇᐅᑐᐃᓐᓇᓄᑦ ᐅᐃᕆᒪᐅᑎᓄᑦ ᐱᖁᔭᒥᒃ ᓯᖁᑦᑎᕆᓚᕿᔪᕕᓂᐅᒍᑎᓕᓐᓄᑦ, ᐃᑲᔪᕐᓯᒪᔪᖅ ᐃᓄᓐᓂᒃ ᒪᒥᓴᕐᑎᖔᕋᓱᐊᕐᓱᒋᑦ ᑎᒍᔭᐅᒪᑐᐃᓐᓇᓂᒃᑰᖏᓐᓂᓴᐅᓗᑎᒃ.
ᑕᒪᒃᑯᐊᓕᒫᑦ ᐱᒍᑦᔨᐅᑏᑦ ᐱᑐᑦᓯᒪᐅᑎᔪᑦ ᓯᕗᓕᕐᑕᐅᓱᑎᒃ ᓄᓇᕕᒻᒥ ᐃᓗᓯᓕᕆᔨᒃᑯᓄᑦ ᓄᐃᑦᓯᒍᑎᐅᒐᓱᐊᕐᓱᑎᒃ ᓱᕐᖁᐃᓯᐊᕐᑐᒥᒃ, ᓲᖑᓂᕐᓴᒥᒃ ᓄᓇᕕᒻᒥᐅ ᑲᒪᒋᔭᐅᒍᓯᖃᖁᓪᓗᒋᑦ ᑲᔪᓯᑦᓯᐊᑐᒃᑯᑦ - ᑲᒪᒍᓯᖅ ᓲᓱᒋᔭᖃᑦᓯᐊᑑᑎᓗᒍ ᐃᓕᕐᕈᓯᕐᒥᒃ, ᐊᑦᑕᓇᖕᖏᑑᓗᓂ, ᓱᖑᓯᓭᓗᓂᓗ ᐱᓇᓱᐊᖃᑎᒌᓐᓂᐅᔪᓂᒃ.
ᐃᑲᔪᕐᓯᒪᔭᐅᒍᒪᓂᖅ ᐱᔭᕆᐊᑐᔫᔭᕈᓐᓇᑐᖅ. ᑭᓯᐊᓂ ᐃᑲᔪᕐᓯᒪᔭᐅᒍᒪᓂᖅ ᑕᑯᑦᓴᐅᑎᑦᓯᕗᖅ ᓲᖑᓂᕐᒥᒃ. ᒪᒥᓴᕐᓂᖅ ᐱᕕᖃᕐᐳᖅ. ᐊᓯᑦᔨᒋᐊᕐᓂᖅ ᐱᕕᖃᕐᐳᖅ. ᐱᒍᑦᔨᐅᑏᓪᓗ ᐊᑐᐃᓐᓇᐅᕗᑦ ᐃᓕᓐᓄᑦ ᑕᒫᓂ - ᐊᓂᕐᕋᒧᑦ ᖃᓂᑦᑑᓱᑎᒃ, ᐅᖃᔭᕈᑎᑦᓴᔭᐅᖕᖏᑐᑎᒍᓪᓗ ᐱᓇᓱᐊᕐᓂᑕᖃᕐᓱᓂ ᓲᓱᒋᔭᖃᑦᓯᐊᓂᕐᑕᖃᕐᓱᓂᓗ.
ᖃᓄᐃᖕᖏᓯᐊᖁᔨᒧᑦ - ᐃᓕᓐᓂᒃ, ᐃᓚᑎᓐᓂᒃ ᓄᓇᓕᓐᓂᓗ - ᑕᒪᒃᑯᐊ ᐱᒍᑎᑦᔨᐅᑏᑦ ᐊᑐᕐᑕᐅᖁᔭᕗᑦ. ᐅᖄᖃᑎᖃᕈᓐᓇᑐᑎᑦ ᓄᓇᓕᑦᓯ ᐋᓐᓂᐊᕕᐊᐱᐊᖓᓂ ᐱᓇᓱᑦᑐᒥᒃ ᐅᕝᕙᓗᓐᓃ ᑯᑦᔪᐊᑉ ᐋᓂᐊᕕᖓᓂ. ᐅᖄᓚᒋᑦ. ᐅᐸᐅᑎᓗᑎᑦ ᐃᑎᕆᑦ. ᐅᖄᖃᑎᖃᕐᓂᖅ ᐱᒋᐊᕐᑎᓗᒍ.
ᓇᑯᕐᒦᕈᒪᕗᖓ ᒣᓇ ᐴᓐᒥᒃ, ᑲᒪᔨᒻᒪᕆᖓᓂ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑕ, ᐅᓂᒃᑳᕆᐊᕐᑐᓚᐅᔪᒻᒪᑦ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑕ ᐱᕙᓪᓕᐊᕈᑎᑦᓴᕆᓂᐊᕐᓗᒍ ᐸᕐᓇᓯᒪᐅᑎᖓᓂᒃ. ᑐᓚᑦᑕᕕᐅᑉ ᑲᑎᒪᔨᖏᓐᓄᑦ ᑐᓴᕐᑕᐅᑎᑦᓯᓚᐅᔪᖅ ᐱᒻᒪᕆᕋᑕᕐᓂᒃ ᐃᓕᖓᔪᓂᒃ ᐃᓚᒌᑦ ᐅᕕᒐᕐᑐᐃᓗ ᐱᒍᑦᔭᐅᒍᑎᖏᓐᓅᓕᖓᔪᓂᒃ ᓄᓇᕕᒻᒥ.
2013-ᒥᓂᑦ, ᓄᓇᕕᐅᑉ ᐃᓄᓕᕆᒍᓯᕆᔭᖓ ᐊᓯᑦᔨᕙᓪᓕᐊᓚᕆᑦᓯᒪᕗᖅ ᐃᑲᔪᕐᓯᒪᓕᐅᒥᒐᓱᐊᕐᓱᓂ ᐃᓄᓐᓂᒃ ᐃᓚᒌᓂᒃ. ᓄᓇᓕᓐᓂᒃ ᑐᑭᓯᓴᕐᓂᖅ ᓄᐃᑦᓯᒍᑎᐅᓯᒪᕗᖅ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓂᒃ 2019-ᒥ. ᐊᕐᕌᒍᓂ ᐊᓂᒍᕐᑐᓂ, ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ ᓄᐃᑎᕆᓯᒪᓕᕐᑐᖅ ᐃᓕᕐᕈᓯᒃᑰᓕᖓᔪᓂᒃ ᐱᓇᓱᐊᕈᑎᓂᒃ, ᐊᑕᐅᓯᐅᓕᑎᑦᓯᓱᓂ ᐱᒍᑦᔭᐅᒐᓱᐊᕈᑎᓂᒃ, ᓱᖑᓯᒋᐊᕆᑦᓱᓂ ᐱᓇᓱᐊᖃᑎᒌᓐᓂᒥᒃ ᑎᒍᓯᓕᐅᒥᑦᓱᓂᓗ ᐊᐅᓚᑦᓯᓂᕐᑎᒍᑦ ᐱᓇᓱᐊᕈᑎᐅᔪᓂ. 2025-ᖑᓕᕐᑎᓗᒍ, ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ ᓄᐃᓯᓕᓚᐅᔪᖅ ᓇᒻᒥᓂᖅ ᓯᕗᓕᕐᑎᓕᐅᕐᓂᒥᒃ, ᐱᓇᓱᐊᖃᑕᐅᓂᐊᕐᑐᓂᒃ ᐃᓂᓪᓓᓂᕐᒥᒃ ᐱᒋᐊᕐᑎᓯᑦᓱᑎᓪᓗ ᐊᕗᖓᐅᓕᔪᒧᑦ ᐱᕙᓪᓕᐊᓂᐅᒋᐊᓕᐅᑉ ᐸᕐᓇᓯᒪᐅᑎᖓᓂᒃ. ᑕᒪᓐᓇ ᐊᓯᑦᔨᐸᓪᓕᐊᓂᖅ ᐱᒍᑦᔨᐅᑏᑦ ᐃᓗᐊᓃᑦᑎᓯᑦᓯᐊᑐᖅ ᐃᓄᐃᑦ ᐱᒻᒪᕆᖁᑎᖏᓐᓂᒃ, ᐱᕐᖁᓯᖏᓐᓂᒃ ᐃᓚᒌᓂᓪᓗ.
ᐱᕙᓪᓕᐊᓂᕐᒧᑦ ᐸᕐᓇᓯᒪᐅᑎᒃ ᐊᖏᕐᑕᐅᒪᓕᕐᑐᖅ ᐱᕈᕐᓭᒍᑎᐅᓂᐊᕐᓗᓂ ᐃᓄᓐᓄᑦ ᓯᕗᓕᕐᑕᐅᔪᒥᒃ ᐱᓇᓱᒍᓯᕐᒥᒃ ᐃᑲᔪᕐᓯᒪᔭᐅᖁᓪᓗᒋᑦ ᕿᑐᕐᖓᕗᑦ, ᐃᓅᓱᑦᑐᕗᑦ ᐃᓚᒌᓪᓗ. ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑕ ᐱᕙᓪᓕᐊᓂᖓᑕ ᐸᕐᓇᑕᐅᓯᒪᒍᑎᖓ ᐊᑑᑎᓚᖓᔪᖅ 2026-ᒥᑦ 2035-ᒧᑦ.
ᐊᕐᕌᒍᓂ ᐊᒥᓱᓂ, ᐱᒍᑦᔨᐅᑏᑦ ᐃᓄᐃᑦ ᐱᒻᒪᕆᖁᑎᒋᔭᖏᓐᓅᓕᒪᓯᒪᖕᖏᓚᑦ. ᒫᓐᓇᐅᓕᕐᑐᓕ, ᑲᒪᒍᓯᕐᒨᐸᓪᓕᐊᓕᕐᖁᒍᑦ ᐃᒣᓕᖓᔪᒧᑦ:
ᑕᒪᓐᓇ ᐊᓯᑦᔨᐸᓕᐊᓂᐅᓚᖓᔪᖅ ᐊᓪᓗᕆᐊᕐᐸᓕᐊᓂᕐᑎᒍᑦ, ᐱᑦᓯᐊᕋᓱᐊᕐᓗᒍ ᐊᑦᑕᓇᖕᖏᑑᑎᓗᒍ, ᐃᓚᒌᑦ ᐃᑲᔪᕐᑕᐅᓂᖃᑦᓭᓇᖁᓪᓗᒋᑦ ᑲᔪᓯᓕᒫᑦᓯᐊᑐᒥᒃ.
ᐃᓚᖏᑦ ᐱᒻᒪᕇᑦ ᐊᓯᑦᔨᓂᐅᓚᖓᔪᑦ ᐅᑯᐊ:
ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑕ ᑐᕌᒐᖓ ᐱᕙᓪᓕᐊᑎᑦᓯᒍᒪᓂᖅ ᓄᑖᓂᒃ ᐃᓚᒌᓂᒃ ᐱᒍᑦᔨᕕᐅᓂᐊᕐᑐᓂᒃ ᓄᓇᕕᓕᒫᒥ ᐱᓇᓱᑦᑎᑖᕐᓂᓗ ᐊᒥᓲᒋᐊᓪᓚᓂᒃ ᐃᓄᑐᐃᓐᓇᓂᒃ. ᑖᓐᓇ ᐸᕐᓇᓯᒪᐅᑎᖓ ᓇᒻᒥᓂᕐᓱᕈᒪᓂᕐᒨᓕᖓᔪᖅ, ᑲᒪᒋᔭᖃᕐᓂᒧᑦ ᕿᑐᕐᖓᑎᓐᓂᒃ ᓄᐃᑕᑎᑦᓯᓯᐊᕐᑐᒥᒃ ᑭᓇᐅᓂᑦᑎᓂᒃ ᐃᓅᑐᐃᓐᓇᐅᓱᑕ.
ᐊᓯᑦᔨᑎᕆᕙᓪᓕᐊᓂᖅ ᓱᖑᔪᑦᓯᐊᒥᒃ ᐱᓇᓱᐊᖃᑎᒌᓐᓂᑕᖃᕆᐊᖃᓚᖓᔪᖅ, ᐱᖁᔭᑎᒎᕐᑐᓂᒃ ᐊᖏᖃᑎᒌᒍᑎᑕᖃᕐᓗᓂ ᑮᓇᐅᔭᕐᑕᓯᔭᐅᓂᖃᑦᓯᐊᓗᓂᓗ. ᑭᓯᐊᓂ ᑕᓯᐅᕐᓯᔭᐅᔪᖅ ᐊᑕᐅᓯᕐᒧᑦ ᑐᕌᒐᕐᒧᑦ: ᖃᓄᐃᖕᖏᓯᐊᖁᓪᓗᒋᑦ ᕿᑐᕐᖓᕗᑦ. ᓲᖑᔪᑦᓯᐊᖑᖁᓪᓗᒋᑦ ᐃᓚᒌᑦ. ᓲᖑᔪᑦᓯᐊᖑᖁᓪᓗᒋᑦ ᓄᓇᓖᑦ.
ᑐᓚᑦᑕᕕᒃ ᑲᔪᖏᕐᓭᓚᕆᑉᐳᖅ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᑕ ᐱᓇᓱᐊᕐᓂᖓᓂᒃ ᐅᐱᓐᓇᕋᓂ ᑐᕌᒐᖃᓪᓚᕆᒻᒪᑕ ᐃᓂᓪᓚᑎᕆᒋᐊᑦᓯᐊᓂᕐᒥᒃ ᐃᓚᒌᑦ ᐱᒍᑦᔭᐅᒍᑎᒋᕙᑦᑕᖏᓐᓂᒃ ᓄᓇᕕᒻᒥ ᐃᓗᓕᖃᑦᓯᐊᑎᓪᓗᒋᑦ ᐃᓄᐃᑦ ᐱᒻᒪᕆᖁᑎᖏᓐᓂᒃ ᕿᑐᕐᖓᑎᓐᓅᓕᖓᔪᓂᒃ, ᐃᓅᓕᓕᕐᓂᒪᓂᑦ ᐃᓄᒻᒪᕆᖕᖑᓂᕐᒧᑦ.
ᓇᑯᕐᒦᒋᐊᓪᓚᕈᒪᕗᖓ ᐃᓗᓯᓕᕆᔨᒃᑯᑦ ᐱᓇᓱᑦᑎᖏᓐᓂᒃ ᑐᓚᑦᑕᕕᐅᑉ ᑲᑎᒪᔨᖏᑦᑕ ᑲᑎᒪᓂᖓᓐᓄᑦ ᙯᓚᐅᕐᑐᓂᒃ ᑐᓴᕐᑕᐅᑎᑦᓯᒋᐊᕐᑐᓱᑎᒃ ᐱᓇᓱᐊᕐᑕᐅᓚᖓᔪᒥᒃ ᐃᑲᔪᕐᓯᒪᓂᐊᕐᑐᓂᒃ ᖃᓄᐃᖕᖏᓯᐊᕐᖁᓪᓗᒋᑦ ᐅᖓᕙᒥᐅᑦ ᓄᓇᕕᒻᒥᐅᓗ.
ᑖᒃᑯᐊ ᐅᓂᒃᑳᑕᒃᑲ ᕕᕗᐊᕆᒥ ᑲᑎᒪᔨᑦᑕ ᑲᑎᒪᓂᕆᓚᐅᔭᖓᓂᒃ ᑐᑭᓯᔭᐅᓕᐅᒥᑎᑦᓯᖁᓇᕐᑐᑦ ᑐᓚᑦᑕᕕᐅᑉ ᐊᐅᓚᑦᔭᕈᑎᒋᕙᑦᑕᖏᓐᓂᒃ ᐱᓇᓱᐊᕐᑕᖏᓐᓂᓗ ᐱᕙᓪᓕᑎᑦᓯᒐᓱᐊᕈᑎᒋᑦᓱᒋᑦ ᐃᓄᓐᓂᒃ ᐃᓚᖃᕋᓗᐊᕐᒥᑎᓪᓗᒋᑦ ᐱᔭᕆᐊᑐᔪᑎᒍᑦ ᓵᖕᖓᒋᐊᖃᕐᐸᑕᑦᑎᓂᒃ ᑌᒪᖕᖓᓕᒫᖅ. ᑐᓚᑦᑕᕕᒃ ᓇᕝᕚᕋᓱᐊᖏᓐᓇᐸᑉᐳᖅ ᐋᕐᕿᒋᐊᕈᑎᑦᓴᓂᒃ ᐋᓐᓂᐊᓯᐅᕆᓂᐅᔪᓂ ᐃᓄᓕᕆᓂᐅᔪᓂᓪᓗ ᓈᒻᒪᓈᕐᑎᒐᓱᐊᕐᓱᒋᑦ ᑭᖕᖑᒪᒋᔭᖏᓐᓄᑦ ᐃᓄᐃᑦ.
ᐊᐱᕆᐅᑎᑦᓴᖃᕈᑦᓯ ᐅᖃᐅᓯᑦᓴᖃᕐᑐᕕᓂᐅᒍᑦᓯᓗᓐᓃᑦ ᐱᒍᑦᔨᐅᑎᖏᑦᑕ ᑐᓚᑦᑕᕕᐅᑉ ᒥᑦᓵᓄᑦ, ᖃᐅᔨᒋᐊᕐᕕᖃᖁᓇᕐᐳᓯ ᓄᓇᓕᑦᓯ ᑭᒡᒐᑐᕐᑎᖓᓂᒃ ᓄᐃᑦᓯᒍᓐᓇᓯᐊᕐᒪᑕ ᐅᖄᔭᑦᓴᕈᐃᓗᑎᒃ ᑐᓚᑦᑕᕕᐅᑉ ᑲᑎᒪᔨᖏᓐᓄᑦ.
ᓄᓇᓕᓐᓂ ᖃᐅᔨᒋᖃᕐᕕᓴᖅ:
ᐊᐅᐸᓗᒃ - ᐋᓂ ᐊᒃᐹᖃᑦᑕᖅ ᐃᑦᑐᒃ
ᑲᖏᕐᓱᐊᓗᑦᔪᐊᖅ - ᓲᕕ ᑮᓚᓐ
ᑲᖏᒃᓱᔪᐊᖅ - ᐃᔪᒃᑲ ᐱᖕᖑᐊᑐᖅ ᓴᑭᐊᒐᖅ
ᑯᑦᔪᐊᖅ - ᓲᓕ ᒍᐁᑦ-ᑐᐳᐃ
ᑕᓯᐅᔭᖅ - ᐹᓴ ᐴᑎ
ᖃᖓᑐᐃᓐᓇᓕᒫᒃᑯᑦ ᓄᓇᓕᑦᓯᓂᒃ ᑭᒡᒐᑐᕐᑎᒥᒃ ᑐᑭᓯᒐᓱᐊᕐᕕᖃᕈᓐᓇᓯᐊᕐᑐᓯ. ᐊᑐᐃᓐᓇᐅᕗᒍᑦ ᐃᓕᓐᓄᑦ ᓄᓇᓕᓐᓄᓗ!
ᑐᓚᑦᑕᕕᒃ ᕿᓂᕐᐳᖅ ᖁᐊᕐᑕᐅᑉ ᑭᒡᒐᑐᕐᑎᓴᖓᓂ ᑲᖏᕐᓱᒥᓪᓗ ᑭᒡᒐᑐᕐᑎᓴᒥᒃ.
ᑐᕃᓐᓇᕈᓐᓇᑐᑎᑦ ᐅᕙᓐᓄᑦ ᑭᒡᒐᑐᕐᑎᖑᒍᒪᒐᔭᕈᕕᑦ ᓄᓇᓕᓐᓂᒃ ᑐᓚᑦᑕᕕᐅᑉ ᑲᑎᒪᔨᖏᓐᓂ.
ᑲᑎᒪᔨᐅᓂᒃᑯᑦ, ᐃᑲᔪᕐᓯᒋᑦ ᑐᓚᑦᑕᕕᒻᒥ ᐃᓅᖃᑎᕗᑦ ᐃᒣᑦᑐᖃᖁᓪᓗᒋᑦ:
ᑐᓚᑦᑕᕕᒃ ᓇᕝᕚᕋᓱᐊᖏᓐᓇᓕᒫᕐᐳᖅ ᐋᕐᕿᒋᐊᕈᑎᑦᓴᐅᔪᓂᒃ ᐋᓐᓂᐊᓯᐅᕆᓂᒃᑯᑦ ᐃᓄᓕᕆᓂᒃᑯᓗ ᐃᓄᐃᑦ ᑭᖕᖑᒪᒋᔭᖏᓐᓅᓕᖓᓂᕐᓴᐅᑎᒐᓱᐊᕐᓱᒋᑦᓗ. ᐃᓚᒋᔭᐅᒋᑦ ᐋᕐᕿᒋᐊᕆᖃᑎᐅᓗᑎᑦ, ᖁᐊᕐᑕᒥᒃ ᑭᒡᒐᑐᕐᑎᕈᒋᑦ ᑲᖏᕐᓱᒥᓪᓗ ᑭᒡᒐᑐᕐᑎᕈᓪᓗᑎᑦ ᑐᓚᑦᑕᕕᐅᑉ ᑲᑎᒪᔨᖏᓄᑦ.
ᑐᓚᑦᑕᕕᒃ ᑭᖕᖒᒪᑦᓯᕗᖅ ᓄᓇᓕᒻᒥ ᑭᒡᒐᑐᕐᑎᓴᒥᒃ ᑲᑎᒪᔨᑦᑎᓂ. ᐃᑲᔪᕈᒪᒍᕕᑦ ᓄᓇᓕᓐᓂᒃ, ᐃᓚᑎᓐᓂᒃ, ᐱᖃᓐᓈᑎᓐᓂᒃ, ᐃᓇᑦᓯᕗᒍᑦ ᓄᓇᓕᓐᓄᑦ ᑭᒡᒐᑐᕐᑎᖑᖁᓪᓗᑎᑦ. ᐃᑲᔪᕐᑎᒍᑦ ᑐᓚᑦᑕᕕᒃ ᖃᐅᔨᒪᔭᐅᓕᐅᒥᑎᒐᓱᐊᕐᓗᒍ ᓄᓇᓕᒻᒥᓗ ᐱᓇᓱᒐᐅᒍᓐᓇᑐᑦ ᐃᓐᓄᐸᓪᓕᐊᖁᓪᓗᒋᑦ.
ᐊᐱᕆᐅᑎᑦᓴᖃᕈᑦᓯ, ᐅᕙᓐᓄᑦ ᐅᖄᓚᒋᑦᓯ ᑐᕃᓐᓇᓗᓯ (ᓛᔨ ᒍᐊᑦ) ᐅᕙᓂ 819 964-2905 ᓯᕙᓂᖓ 2211.
ᐊᓪᓚᒍᓐᓇᒥᔪᓯ ᖃᕆᑕᐅᔭᒃᑯᑦ ᐅᕗᖓ: dgsecretariat.cstu@ssss.gouv.qc.ca
ᓇᑯᕐᒦᒃ ᖃᐅᔨᒪᒐᓱᐊᕈᒪᓂᑦᓯᓄᑦ ᑐᓚᑦᑕᕕᐅᑉ ᐱᕙᓪᓕᐊᑎᑦᓯᓂᖓᓂᒃ ᐋᓐᓂᐊᓂᓕᕆᓂᕐᒥ ᐃᓄᓕᕆᓂᕐᒥᓗ ᑲᒪᒋᔭᐅᒍᓯᐅᔪᓂᒃ.
ᐊᑦᑕᓇᖕᖏᑐᑦᓯᐊᒦᒋᑦᓯ ᖃᓄᐃᖕᖏᓯᐊᕐᓗᓯᓗ!
ᓇᖁᕐᒦᒃ.
ᓛᔨ ᒍᐊᑦ, ᑲᒪᔨᒻᒪᕆ
