ᓄᓇᓕᒻᒥ ᑕᑯᑦᓴᐅᔪᑦ

ᑐᓚᑦᑕᕕᒃ ᖃᐅᔨᓴᑦᓯᐊᑐᖅ ᐃᓅᓱᑦᑐᐃᑦ ᓄᓇᓕᒻᒥ ᓯᕗᓕᕐᑎᓴᒫᖑᒋᐊᖏᓐᓂᒃ. ᑕᒪᓐᓇ ᐱᑦᔪᑕᐅᑎᓪᓗᒍ ᐊᒥᓱᑦ ᐱᑦᔪᔨᒍᑕᐅᓲᑦ ᐃᓅᓱᑦᑐᓂᒃ.

ᑐᓚᑦᑕᕕᐅᑉ ᐋᓐᓂᐊᓯᐅᕐᑎᖁᑎᖏᑦ, ᑭᒍᑎᓕᕆᔩᑦ, ᐃᓱᒪᓕᕆᔨᐅᑦᓱᑎᒃ ᐃᓕᓐᓂᐊᑎᑦᓯᔩᑦ ᐃᓄᓕᕆᔩᓐᓗ ᐃᓕᓐᓂᐊᕕᓐᓃᓲᖑᔪᑦ ᐱᒍᑦᔨᒋᐊᕐᑐᓯᒪᑦᓱᑎᒃ ᐃᓅᓱᑦᑐᓂᒃ.

ᐊᑦᔨᒌᖏᑐᓂᒃ ᐱᓇᓱᒐᓖᑦ ᐃᓄᓕᕆᓂᕐᒥᒃ ᐱᓇᓱᐊᕐᑎᑕᐅᓲᑦ ᐃᓅᓕᕐᖃᒥᓐᓄᐊᖓᔪᓂᒃ ᐱᐊᕌᕈᕐᓄᓗ (SIPPE) ᐊᒻᒪᓗ ᐊᑐᓂ ᐱᐊᕋᕐᓅᓕᖓᔪᓂᒃ ᐃᑲᔪᕐᓯᒪᐅᑎᖃᕐᓱᑎᒃ ᐱᕈᕐᐸᓕᐊᓂᖏᓐᓂ ᐱᒍᑦᔭᐅᒍᑎᒋᒐᔭᕐᑕᖏᓐᓂᒃ.

ᐃᓅᓕᕐᖃᒥᓐᓄᑦ ᑕᓪᓕᒪᓂᒃ ᐅᑭᐅᓕᓄᑦ ᑎᑭᑦᓱᑎᒃ ᐃᑲᔪᕐᓯᒪᔭᐅᒍᑎᖏᓂᒃ ᐱᓇᓱᐊᕐᑏᑦ, ᐱᒋᐅᕐᓴᑎᑦᓯᔨᐅᑦᓱᑎᒃ, ᐅᖃᕆᐅᕐᓴᑎᑦᓯᔨᐅᑦᓱᑎᓪᓗ, ᐃᖃᐃᓕᓴᕐᑎᓯᔩᑦ, ᐃᓱᒪᒃᑯᑦ ᐱᓇᐃᓗᑕᓕᓐᓂᒃ ᐱᒋᐅᕐᓴᑎᑦᓯᔨᐅᓲᑦ, ᐃᓕᓐᓂᐊᑎᑦᓯᔩᑦ ᐊᒻᒪᓗ ᐊᓯᖏᑦ ᐱᓪᓗᑯᒋᐊᓕᓕᕆᔩᑦ ᐱᐊᕌᕈᕐᓂᒃ ᐱᓇᐃᓗᑕᖃᕈᓇᐅᑉᒪᖔᑕ ᐱᕈᕐᐸᓕᐊᓂᕐᒥᓂ ᖃᐅᔨᒐᓱᐊᕐᑏᑦ ᐅᑭᐅᓕᓐᓂᒃ 0-ᓂᒃ 6-ᓄᑦ.

ᓄᓇᕕᒻᒥᐅᑦ ᐃᓄᖏᑦ ᐃᓅᓱᑦᑐᒪᕆᐅᒻᒪᑕ, ᑕᑉᐱᑯᐊᓕᒫᑦ ᐅᖃᕐᑕᐅᔪᑦ ᐱᒍᑦᔨᓂᖏᑦ ᐱᒻᒪᕆᐅᓂᖃᕐᑐᑦ ᑐᓚᑦᑕᕕᒻᒥ.

ᐅᑯᐊ ᐱᒍᑦᔨᒍᑕᐅᓲᑦ:

• ᐅᐃᒪᓇᕐᑐᓕᕆᓂᖅ

• ᐃᓱᒪᓕᕆᓂᒃᑯᑦ ᑲᒪᓂᖅ

• ᐃᓱᒪᓕᕆᓂᒃᑯᑦ ᐃᑲᔪᕐᓯᒪᓂᖅ

• ᐃᓘᓐᓈᒍᑦ ᐃᓄᓕᕆᔭᐅᔪᓂᒃ ᑲᒪᖃᑦᑕᓂᖅ

• ᐃᓱᒪᓕᕆᓂᒃᑯᑦ ᐱᓪᓗᑯᒋᐊᓕᓐᓂᒃ ᐱᒍᑦᔨᓃᑦ

ᐊᑦᔨᒌᖏᑐᑦ ᐃᓄᓕᕆᔩᑦ ᐃᑲᔪᕐᓯᒪᒍᓐᓇᓲᑦ, ᐃᑲᔪᕈᒪᓂᕐᒥᒍᑦ, ᐃᓄᓐᓂᒃ ᐱᓇᐃᓗᑕᓕᓐᓂᒃ ᐊᑦᔨᒌᖏᑐᓂᒃ ᐅᐃᕆᒪᓂᕐᒨᓕᖓᔪᓂᒃ, ᐃᐱᕋᐃᓐᓇᑕᐅᒪᓂᕐᒧᑦ, ᐱᓇᓱᒐᖃᖏᓂᕐᒧᑦ, ᐃᓱᒪᒥᒍᑦ ᐱᓇᐃᓗᑕᓕᓐᓂᒃ, ᐊᓯᖏᓐᓂᓗ.

ᐊᑦᔨᒌᖏᑐᓂᒃ ᐱᓇᓱᒐᓖᑦ ᐊᓂᕐᕋᓯᒪᔪᓂᒃ ᐱᒍᑦᔨᒋᐊᕐᑐᖃᑦᑕᓲᑦ ᑭᖒᒪᑦᓯᑐᐊᕐᒪᑕ.

ᐱᓇᓱᐊᕐᑎᒌᓲᑦ ᐃᓄᓕᕆᔩᑦ, ᐃᓱᒪᓕᕆᔩᑦ, ᐃᖃᐃᓕᓴᕐᑎᓯᔨᑦ, ᑎᒥᒃᑯᑦ ᐊᐅᓚᕐᖃᔭᑦᓯᐊᖏᑦᑐᓂᒃ ᐃᖃᐃᓕᓴᕐᑎᓯᔩᑦ, ᑐᓵᑦᓯᐊᖏᑦᑐᓕᕆᔩᑦ ᐊᒻᒪᓗ ᐊᓂᕐᑎᕆᐅᑎᓕᕆᔩᑦ.

ᑖᒃᑯᐊ ᐱᓇᓱᖃᑎᒌᓱᑦ ᐃᑲᔪᕐᑕᐅᒋᐊᓕᓐᓂᒃ ᐊᓂᕐᕋᓯᒪᔪᓂᒃ ᐃᓱᕐᕆᓕᕐᑎᓯᒐᓱᐊᕐᓱᑎᒃ ᐱᒍᑦᔨᓂᖃᓲᑦ ᐊᓂᕐᕋᓯᒪᖏᓐᓇᓗᑎᓪᓗᒋᑦ ᐃᓚᒥᓂᒃ ᖃᓂᑕᖃᖏᓐᓇᓗᑎᒃ.

ᐱᓇᓱᐊᖃᑎᒌᓲᑦ ᐃᒻᒥᓂᐊᕐᑕᐃᖖᒪᑎᑦᓯᒐᓱᐊᕐᑏᑦ ᐊᕐᖁᑎᓂ ᐱᓇᓱᐊᕐᑏᑦ ᐊᒻᒪᓗ ᖃᓄᐃᖏᓯᐊᕐᓂᓕᕆᔩᑦ, ᑖᒃᑯᐊ ᐱᓇᓱᐊᖏᓐᓇᓕᒫᓲᑦ ᐃᖃᔪᕐᓯᒪᓂᖃᒻᒪᕆᑦᓱᑎᓪᓗ ᐅᖓᕙᒥ ᓄᓇᓕᓐᓂ.

ᑖᒃᑯᐊ ᐱᓇᓱᐊᖃᑎᒌᑦᑏᑦ ᖃᓄᐃᓘᖃᑎᖃᐃᓐᓇᓲᑦ ᓄᓇᓕᐅᑉ ᑲᑎᖓᔨᖏᓐᓂᒃ ᐊᒻᒪᓗ ᖃᓄᐃᖏᓯᐊᕐᓂᓕᕆᔨᓂᒃ ᐊᓯᖏᓐᓂᓗ ᓄᓇᓕᒻᒥ ᐱᒍᑦᔨᔨᐅᔪᓂᒃ. ᑲᐃᓪᓗᐊᒍᑎᖃᓲᑦ ᐃᓅᓯᖃᑦᓯᐊᕆᐊᖃᕐᓂᒨᓕᖓᔪᓂᒃ ᐱᓇᐃᓗᑕᐅᒍᓐᓇᑐᓂᒃ ᑲᐃᓪᓗᐊᒐᓱᐊᕈᑎᖃᕐᓱᑎᒃ ᐅᖑᒪᑦᓯᓂᕐᒧᑦ ᒫᓐᓇ ᓄᓇᓕᓐᓂ ᐱᕉᑕᕆᔪᓂᒃ ᐅᐃᕆᒪᓂᕐᒨᓕᖓᔪᓂᒃ, ᐊᐃᑉᐸᕇᑦᓯᐊᕆᐊᖃᕐᓂᓄᑦ ᐊᒻᒪᓗ ᐱᒋᐊᖃᑦᑕᐅᑎᓂᕐᓄᑦ. ᐱᓇᓱᐊᖃᑎᒌᑦᑐᑦ ᐃᑲᔪᕐᑕᐅᒋᐊᖃᕐᑐᖃᓕᕐᒪᑦ ᐅᐸᒋᐊᓕᖏᓐᓄᑦ ᑐᕌᕐᑎᓯᓲᑦ.

ᑐᓵᔨᐊᐱᒃ ᐃᓄᑐᖃᐃᑦ ᐊᓂᕐᕋᖓ ᐃᓂᒋᔭᐅᓲᖅ ᐃᒻᒥᓂᕿᖃᔭᐃᕐᓯᒪᓕᕐᑐᓄᑦ ᐃᓱᒪᒥᒍᑦ ᑎᒥᒥᒍᓪᓘᓃᑦ ᐱᓇᐃᓗᑕᓕᓐᓄᑦ. 12-ᓂᒃ ᐃᓪᓕᖃᕐᓱᓂ ᑕᑯᒥᓇᕐᑐᕋᑕᕐᒥᒃ ᐃᓂᓕ ᓯᑦᔭᒦᑦᓱᓂ ᑰᑦᔪᐊᑉ ᑰᖓᑕ ᓯᓈᓃᑦᓱᓂ.

ᐃᓗᕐᖁᓯᕐᒨᓕᖓᔪᓂᒃ ᐱᓂᐊᕐᓂᖃᓲᖅ ᑕᐃᑲᓂᒥᐅᑦ ᓂᕿᑐᐃᓐᓇᓂᒃ ᓂᕿᖃᕐᑎᓱᒋᑦ ᐃᓗᕐᖁᓯᕐᒧᐊᓕᖓᔪᓂᓗ ᓱᖃᑦᓯᒍᑎᖃᕐᑎᓲᕆᑦᓱᒋᑦ ᐅᓪᓘᓕᕐᒪᓗ ᓇᔪᒐᐅᑦᓱᓂ ᐃᓄᑐᖃᕐᓄᑦ. ᐱᒍᑦᔭᐅᓂᖃᑑᑦ ᐋᓐᓂᐊᓯᐅᕐᑎᑐᐃᓐᓇᓄᑦ, ᐋᓐᓂᐊᓯᐅᕐᑏᓗ ᐃᑲᔪᕐᑎᖏᓐᓄᑦ, ᓱᖃᑦᓯᑎᑦᓯᔨᓄᓪᓗ ᐱᓇᓱᑦᑎᑐᐃᓐᓄᓗᓪᓗ ᐃᓄᑐᖃᐃ ᐊᓂᕐᕋᖓᓂ ᐱᓇᓱᐊᖃᑎᒌᑦᑐᓄᑦ.

ᐃᕐᓂᓱᑦᑎᓯᓂᒃᑯᑦ ᐱᒍᑦᔨᓂᑎᒍᑦ ᐊᕐᓇᐃᑦ ᐱᐊᕋᕐᑖᕈᓐᓇᓲᑦ ᓄᓇᕕᒻᒥ, ᒪᓐᑐᔨᐊᓪᓕᐊᕆᐊᑐᖏᓱᑎᒃ, ᑕᒪᓐᓇ ᐱᒻᒪᕆᐅᓂᖃᕐᑎᓪᓗᒍ ᓄᓇᓕᒻᒧᑦ,

ᑰᑦᔪᐊᒦᑦᓱᓂ, ᐱᐊᕋᕐᑖᑎᑦᓯᕕᒃ ᐱᒍᑦᔨᓲᖅ ᐊᕐᓇᓂᒃ ᐱᐊᕋᑦᓴᓕᓐᓂᒃ ᐃᓘᓐᓇᖏᓐᓂ ᐅᖓᕙᒥ 7-ᓂᒃ ᓄᓗᓕᐅᔪᓂ ᐱᓯᒪᔪᓂᒃ, 100-ᒥᑦᓵᓃᑦᑐᑦ ᐊᕐᓇᐃᑦ ᐊᕐᕌᒍᑕᒫᑦ ᐱᐊᕋᕐᑖᓲᖑᒻᒪᑕ ᑰᑦᔪᐊᒥ. ᐱᐊᕋᑦᓴᓖᑦ ᑲᒪᒋᔭᐅᒋᐊᕐᑐᕈᓐᓇᓲᑦ, ᐱᐊᕋᕐᑖᑎᑕᐅᒍᓐᓇᓱᑎᒃ ᐊᒻᒪᓗ ᐱᐊᕋᕐᑖᓯᒪᓕᕐᓱᑎᒃ ᑲᒪᒋᔭᐅᖏᓐᓇᕈᓐᓇᓲᖑᑦᓱᑎᒃ.

ᐃᕐᓂᓱᑦᑎᓯᔩᑦ ᐊᕐᕕᑕᓲᑦ ᓄᓇᓕᓐᓄᑦ ᐱᐊᕋᑦᓴᓕᓐᓂᒃ ᑲᒪᒋᐊᕐᑐᖃᑦᑕᓱᑎᒃ ᐊᒻᒪᓗ ᐱᒍᑦᔨᒍᑎᖃᓲᖑᑦᓱᑎᒃ ᐅᖑᒪᐅᑎᐅᒋᐊᓕᓐᓂᒃ ᑲᐃᓪᓗᐊᒍᑕᐅᒋᐊᓕᓐᓂᓗ ᐃᓕᓐᓂᐊᑎᑦᓯᒍᑎᖃᕐᓱᑎᒃ.

ᐃᕐᓂᓱᑦᑎᓯᓂᕐᒥᒃ ᐃᓕᓐᓂᐊᕈᓐᓇᓲᑦ ᐃᓄᐃᑦ ᐊᕐᓇᐃᑦ ᐱᒋᐅᕐᓴᑎᑕᐅᑦᓱᑎᒃ ᒪᓕᑲᑦᑕᕈᓐᓇᓲᑦ ᐃᕐᓂᓱᑦᑎᓯᔨᓂᒃ ᐱᓇᓱᐊᓕᕐᒪᑕ. ᐊᒥᓱᒍᓗᐃᑦ ᐊᕐᕌᒍᐃᑦ ᓈᒻᒪᑕ, ᖃᓄᑎᒋ ᐱᒍᓐᓇᓂᖃᓕᕐᒪᖔᑕ ᓇᐅᑦᓯᑐᕐᑕᐅᓯᓲᑦ ᐃᕐᓂᓱᑦᑎᓯᔨᖑᕈᓐᓇᓕᕐᒪᖔᑕ ᖃᐅᔨᓴᕐᑕᐅᓱᑎᒃ ᐃᓕᑕᕆᔭᐅᒍᑎᑖᕐᑎᑕᐅᒍᓐᓇᓂᐊᓕᕐᒪᑕ ᑯᐸᐃᒃᒥ ᐃᕐᓂᓱᑦᑎᓯᔩᓂᒃ ᐃᓕᑕᕆᔭᐅᒍᑎᑖᕐᑎᓯᔨᓄᑦ (Ordre des sages-femmes du Québec).