ᖁᕕᐊᓱᑉᐳᒍᑦ ᑐᓴᕐᑕᐅᑎᓯᒋᐊᒥᒃ ᓀᓪᓕᑎᕐᓯᒪᔪᓂᒃ ᔫᓂ 2026-ᒥ ᑲᑎᒪᓂᒻᒪᕆᒻᒥ ᑲᑎᒪᐅᑎᕕᓂᕐᓂᒃ ᑯᑦᔪᐊᒥ, ᐅᓂᒃᑳᑕᐅᔪᑦ ᓛᔨ ᒍᐊᑦᒧᑦ, ᑲᒪᔨᒻᒪᕆᖓᓄᑦ ᑐᓚᑦᑕᕕᐅᑉ ᓯᐱᓰᑉ ᓈᓚᐅᑎᖓᒍᑦ
ᐁ,
ᓛᔨ ᒍᐊᑦᖑᕗᖓ ᑲᒪᔨᒻᒪᕆ ᑐᓚᑦᑕᕕᒻᒥ ᐅᖓᕙᐅᑉ ᐋᓐᓂᐊᕕᖓᓂ
ᐅᓪᓗᒥ ᑐᓴᕐᑕᐅᑎᓯᒍᒪᕗᒍᑦ ᐱᒻᒪᕆᓐᓂᒃ ᐋᓐᓂᐊᓂᓕᕆᓂᒃᑯᑦ ᐃᓄᓕᕆᓂᒃᑯᓗ ᐱᒍᑦᔨᒍᑎᐅᔪᓂᒃ ᐊᑐᐃᓐᓇᐅᑎᑕᐅᕙᑦᑐᓂᒃ ᑐᓚᑦᑕᕕᒻᒧᑦ
ᓯᕗᓪᓕᐹᒥ, ᓇᑯᕐᒦᕈᒪᕗᖓ ᓄᓇᓕᒻᒥᐅᓂᒃ ᐱᓇᓱᑦᑎᓂᓪᓗ ᐃᓚᐅᓚᐅᕐᑐᓂᒃ ᐊᕐᕋᒍᑕᒫᕐᓯᐅᑎᑦᑎᓄᑦ ᑲᑎᒪᓂᒻᒪᕆᒻᒧᑦ, ᑖᓐᓇ ᐊᑑᑎᓚᐅᕐᓱᓂ ᑯᑦᔪᐊᒥ ᔫᓂ 17-ᒥ 18-ᒥᓗ. ᓂᐱᓯ, ᐊᐱᕐᓲᑎᓯ ᐃᓱᒪᒋᔭᑦᓯᓗ ᐃᑲᔪᕐᓯᒪᒻᒪᑕ ᐅᕙᑦᑎᓂᒃ ᐱᐅᓯᐅᒥᑎᑦᓯᒋᐊᓪᓛᕈᑎᒋᑦᓱᒋᑦ ᐱᒍᑦᔨᒍᑎᑦᑎᓂᒃ ᑭᓇᓕᒫᒃᑯᓂᒃ.
ᐅᐱᒍᓲᑎᖃᕈᒪᕗᖓ ᓲᓯ ᐋᓐ ᑲᓪᓚᒥᒃ ᐊᖏᕐᑎᑕᐅᓂᖃᓚᐅᔪᒥᒃ ᑲᑎᒪᔨᖕᖑᑎᑕᐅᓂᕐᒧᑦ ᑐᓚᑦᑕᕕᒻᒥ, ᑭᒡᒐᑐᕐᑎᑖᕐᖃᒥᐅᓂᐊᓕᕐᓗᓂ ᑲᖏᕐᓲᑉ ᓄᓇᓕᖓᓂᒃ. ᓄᓇᓕᒻᒥ ᑭᒡᒐᑐᕐᑎᐅᓗᓂ ᑲᖏᕐᓱᒥᐅᓂᒃ , ᐋᓐᓂᐊᓯᐅᕐᑕᐅᕙᑦᑐᓂᒃ ᐱᑦᔪᔭᐅᕙᑦᑐᓂᓪᓗ ᓂᐱᖃᕐᑎᓯᔨᐅᓚᖓᔪᖅ ᑲᑎᒪᔨᓂ. ᐃᑲᔪᕐᓯᓚᖓᔪᖅ ᑐᓚᑦᑕᕕᒃ ᑲᔪᓯᖏᓐᓇᓯᐊᖁᓪᓗᒍ ᐱᐅᓯᓕᑎᕆᒋᐊᒥᒃ, ᐊᑐᐃᓐᓇᐅᑎᑦᓯᒋᐊᒥᒃ ᐊᑦᑕᓇᖕᖏᑑᑎᑦᓯᓂᕐᒥᓗ ᐱᒍᑦᔨᒍᑎᑦᑎᓂᒃ, ᐅᖃᐅᓯᖃᖃᑦᑕᓗᓂ ᐃᓱᒪᒋᔭᒥᓂᒃ, ᐃᓱᒫᓘᑎᒋᔭᒥᓂᒃ ᓇᓗᓀᕐᓯᖃᑦᑕᓗᓂᓗ ᐱᕕᑦᓴᐅᒐᔭᕐᑐᓂᒃ ᐱᐅᓯᓕᑎᕆᒍᑎᑦᓴᐅᓗᑎᒃ ᓱᖑᓯᓭᒍᑎᐅᓗᑎᓪᓗ ᐋᓐᓂᐊᓂᓕᕆᓂᒃᑯᑦ ᐃᓄᓕᕆᓂᒃᑯᓗ ᐱᒍᑦᔭᐅᒍᑎᖏᓐᓂᒃ ᑭᓇᓕᒫᒃᑯᑦ.
ᓄᓇᓕᓐᓄᑦ ᐊᕐᕕᑕᕐᓃᑦ
ᑐᓚᑦᑕᕕᒃ ᓄᓇᓕᓐᓂᒃ ᑭᒡᒐᑐᕐᑕᑎᓐᓂᒃ ᑐᓵᔭᐅᑦᓯᐊᖁᔨᕗᖅ. ᑕᒪᓐᓇ ᐱᒻᒪᕆᐊᓗᒃ. ᑐᓂᒪᑦᓯᐊᐳᒍᑦ ᓇᓚᑦᓯᐊᓚᖓᒋᐊᖅ ᐃᓄᐃᑦ ᐃᓱᒫᓘᑎᖏᓐᓂᒃ ᐅᖃᐅᓯᕆᔭᖏᓪᓗ ᐃᓚᐅᑎᖃᑦᑕᓗᒋᑦ ᑐᑭᑖᕐᑐᐃᒍᓯᑦᑎᓄᑦ. ᑕᒪᓐᓇ ᑲᔪᓯᑦᓯᐊᖁᓪᓗᒍ, ᑲᔪᓯᓚᖓᔪᒍᑦ ᐅᖓᕙᐅᑉ ᓄᓇᓕᖏᓐᓂᒃ ᐅᐸᐅᑎᖃᑦᑕᓂᐊᕐᓗᑕ ᑕᕐᕿᓂ ᙯᔪᓂ, ᐱᕈᕐᓭᓗᑕ ᑲᔪᓯᔪᒥᒃ ᐅᖄᖃᑎᒌᓐᓂᒥᒃ ᑐᑭᓕᑦᓯᐊᑯᓪᓗ ᖃᓄᐃᓘᖃᑎᒌᓐᓂᒥᒃ.
ᓯᑎᒻᐱᕆᒥ, ᑲᖏᕐᓱᔪᐊᓕᐊᖕᖑᓱᑦᑐᒍᑦ. ᑐᓴᐅᑎᓯᓐᓂᒃ ᓈᓚᓛᕐᖁᓯ ᕿᑎᕋᓕᕐᓯᒪᓕᕐᐸᑦ ᐊᓪᓕᕇᕐᑐᓂ, ᓯᑎᒻᐱᕆ 14, ᖃᐅᔨᒋᐊᓪᓚᓯᐊᓛᕋᑦᓯ ᑐᓚᑦᑕᕕᐅᑉ ᐱᕙᓪᓕᐊᓂᖓᓂᒃ, ᐅᕙᑦᑎᓂᒃ ᐅᖄᖃᑎᖃᕐᓗᓯ ᐃᓱᒪᒋᔭᑦᓯᓂᓪᓗ ᑐᓴᕐᑕᐅᑎᑦᓯᓗᓯ.
ᐱᓇᓱᐊᖃᑎᒌᓐᓂᖅ
ᑐᓚᑦᑕᕕᒃ ᐱᕙᓪᓕᑎᑕᐅᕙᑦᑐᑦ ᓱᖑᔪᑦᓯᐊᑎᒍᑦ ᐱᓇᓱᐊᖃᑎᖃᓕᕋᒥ ᑎᒥᐅᔪᓂᒃ ᐅᑦᑑᑎᒋᓗᒋᑦ ᒪᑭᕝᕕᒃ, ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓ ᐃᓄᐃᑦ ᖃᖓᑦᑕᔫᖏᓪᓗ. ᐊᔪᐃᓐᓇᕈᑎᖃᕐᐳᒍᑦ ᑕᒪᒃᑯᐊ ᐱᓇᓱᐊᖃᑎᖃᕐᓂᕗᑦ ᑲᔪᓯᑎᑦᓯᐊᓚᖓᓗᒋᑦ ᓱᖑᓯᑎᒋᐊᓪᓛᓗᒋᓪᓗ, ᑐᕌᒐᖃᕐᓗᑕ ᐱᕈᕐᓭᒋᐊᓪᓚᓂᕐᒥᒃ ᐱᑦᓯᐊᑑᒋᐊᖃᕐᓂᖓᓂᒃ, ᐊᑐᐃᓐᓇᐅᓯᐊᕆᐊᖃᕐᓂᖓᓂᒃ ᖃᓂᓪᓕᐅᒥᓂᑦᓴᖓᓂᓪᓗ ᐋᓐᓂᐊᓂᓕᕆᓂᒃᑯᑦ ᐃᓄᓕᕆᓂᒃᑯᓗ ᐱᒍᑦᔨᓂᕆᔭᑦᑕ ᐃᓄᓐᓂᒃ.
ᑲᔪᓯᔪᒃᑯᑦ ᐱᓇᓱᐊᖃᑎᖃᕐᓂᖅ ᓄᓇᕕᒻᒥ ᐃᓗᓯᓕᕆᔨᒻᒪᕆᒃᑯᓂᒃ ᐱᒻᒪᕆᐅᕗᖅ. ᐊᔪᐃᓐᓇᓚᖓᔪᒍᑦ ᓄᐃᑕᑎᑦᓯᓯᐊᕋᓱᐊᕐᓗᑕ ᓂᐱᖃᕈᑎᖃᕐᓗᑕᓗ ᑭᖕᖒᒪᒋᔭᑦᑎᓂᒃ, ᐱᓗᐊᕐᑐᒥᒃ ᑯᐯᑉ ᐱᖁᑎᒻᒪᕆᓕᐅᕐᓂᒧᑦ ᐃᓪᓗᒪᕆᓐᓂᒃ ᐸᕐᓇᓯᒪᐅᑎᓕᐊᕆᓯᒪᔭᖓᒍᑦ ᐱᒻᒪᕆᐅᔪᓂᓪᓗ ᓇᐅᓕᒫᑦ ᖃᓄᐃᖕᖏᓯᐊᕆᐊᖃᕐᓂᖓᓅᓕᖓᔪᑦ ᓯᕗᓪᓕᐸᐅᑦᔭᐅᔪᑦᓴᐅᓂᖓᓂᒃ.
ᐃᓕᕐᕈᓯᒃᑯᑦ ᐊᑦᑕᓇᖕᖏᑐᒦᓐᓂᖅ
ᐃᓕᕐᕈᓯᒃᑯᑦ ᐊᑦᑕᓇᖕᖏᑐᒦᓐᓂᒃ ᐱᒻᒪᕆᐊᓘᑎᑕᐅᔪᖅ ᑐᓚᑦᑕᕕᒻᒧᑦ. ᐱᔪᕆᐅᑎᖃᕐᐳᒍᑦ ᑐᖕᖓᓱᑦᑎᓯᒋᐊᖅ ᐄᒪᓕ ᔫᓇᓯᒥᒃ ᐊᔪᖀᒋᐊᕐᑎᕈᕐᖃᒥᐅᔪᒥᒃ ᐃᓕᕐᕈᓯᒃᑯᑦ ᐊᑦᑕᓇᖕᖏᑐᒦᒋᐊᖃᕈᓯᕐᓂᒃ. ᐄᒪᓕ ᐱᓇᓱᐊᕐᑐᖅ ᑲᒪᔨᒻᒪᕆᐅᑉ ᐱᓇᓱᐊᕐᕕᖓᓂ ᓴᐳᑦᔨᓯᒪᔨᐅᖃᑎᐅᑦᓱᓂ ᑕᒪᑦᓱᒥᖓ ᐱᒻᒪᕆᐅᑦᓱᓂ ᐱᓇᓱᐊᕐᑕᐅᔪᒥᒃ. ᓯᕗᓂᕐᒧᑦ ᑕᑯᒋᐊᕐᓗᑕ, ᓱᖑᓯᑎᑦᓯᒋᐊᓪᓛᓚᖓᕗᒍᑦ ᐱᕙᓪᓕᐊᑎᑕᐅᓂᑦᓴᖓᓂᒃ ᖃᓄᐃᓘᕐᑎᐅᔪᐃᑦ ᐊᐅᓚᑦᔭᕆᐊᕈᑎᐅᔪᐃᓪᓗ ᐃᓕᖓᔪᑦ ᐃᓕᕐᕈᓯᒃᑯᑦ ᐊᑦᑕᓇᖕᖏᑐᒦᓐᓂᒧᑦ.
ᐊᓕᐊᓱᒃᑯᖓ ᑐᓴᕐᑕᐅᑎᑦᓯᒋᐊᖅ ᐱᕙᓪᓕᐊᑕᐅᓯᒪᒍᑎᖏᓐᓂᒃ ᑐᓚᑦᑕᕕᐅᑉ ᐱᒍᑦᔨᐅᑎᖏᑦᑕ ᐊᓐᓂᐊᓂᓕᕆᓂᕐᒥᒃ ᐃᓄᓕᕆᓂᕐᒥᓗ. ᐅᖓᕙᓕᒫᒥ, ᐱᓇᓱᐊᕐᑎᕗᑦ ᑲᔪᓯᔪᑦ ᐱᓇᓱᐊᒻᒪᕆᑦᓱᑎᒃ ᐱᐅᓯᓕᑎᕆᒐᓱᐊᕐᓱᑎᒃ ᑲᒪᒍᓯᐅᔪᓂᒃ ᐃᓄᓕᕆᓂᐅᔪᓂᓪᓗ ᐃᓗᓐᓀᓂᒃ.
ᓱᕗᓪᓕᐹᒥ ᐱᒋᐊᕐᕕᖃᓚᐅᕐᑕ ᖃᓂᑕᕇᓐᓂᖓᓂᒃ ᐋᓐᓂᐊᕕᐊᐲᑦ ᐋᓐᓂᐊᓯᐅᕆᔩᓪᓗ ᐱᒍᑦᔨᐅᑎᖏᓐᓂᒃ ᐱᓇᓱᐊᕐᑕᐅᕙᑦᑐᓂᒃ ᑐᓚᑦᑕᕕᒻᒧᑦ ᐅᖓᕙᐅᑉ ᓄᓇᓕᖏᓐᓂ. ᐅᖃᐅᓯᖃᕈᒪᕗᖓ ᐱᒻᒪᕆᕋᑕᕐᒥᒃ ᐱᓇᓱᐊᕐᑕᐅᔪᒥᒃ ᑲᖏᕐᓱᐊᓗᑦᔪᐊᑉ ᐋᓐᓂᐊᕕᖓᓂ. ᖃᐅᔨᒪᒐᑦᑕ ᐊᑦᓴᓗᐊᓕᒻᒦᑐᐃᑦ ᐊᕐᖁᑎᖓ ᐊᑐᕆᐊᖓ ᐃᓱᐃᑦᑑᕙᑦᑎᓗᒍ. ᓯᑐᕐᖃᔮᖑᓗᐊᕐᑐᐊᓗᑦᓱᓂ ᓄᓇᓗ ᐊᑖᖓᓃᑦᑐᖅ ᐊᑦᑕᓇᕐᓯᓯᒪᓕᕐᓱᓂ ᐊᑯᓂᐅᓕᕐᑐᖅ. ᐋᓐᓂᐊᓯᐅᕐᑕᐅᒋᐊᕐᑐᔨᐊᕗᑦ, ᐃᓚᒌᓪᓗ ᐱᓇᓱᑦᑏᓗ ᓯᕗᓪᓕᐸᐅᑎᒋᐊᖃᕋᑦᑎᒋᑦ, ᑕᒪᒃᑯᐊ ᐃᑎᕆᐊᕐᕖᑦ ᐱᒻᒪᕆᐊᓘᑎᑕᕗᑦ ᐊᑦᑕᓇᖕᖏᑐᒦᖁᔨᒐᑦᑕ. ᑌᒣᒻᒪᑦ ᐱᓇᓱᐊᕐᑕᐅᒋᐊᖃᕐᑐᓕᐊᕆᓕᓚᐅᔭᕗᑦ ᑖᓐᓇ, ᑮᓇᐅᔭᕐᑐᕈᑎᒋᒋᐊᓕᖏᑦ ᐊᖏᕐᑕᐅᓯᒪᕋᑕᖕᖏᑲᓗᐊᕐᑎᓗᒋᑦ. ᓄᑖᒥᒃ ᐊᑦᑕᓇᖕᖏᓂᕐᓴᒥᒃ ᐊᑦᓴᓗᐊᓕᓐᓄᑦ ᐊᕐᖁᑎᒥᒃ, ᓄᑖᒥᓗ ᐃᑎᕆᐊᕐᕕᒥᒃ ᐊᕐᖁᑎᐅᓪᓗ ᐱᐅᓯᓕᑎᕐᑕᐅᓂᖓᓂᒃ ᐱᓇᓱᐊᓕᕐᑐᒍᑦ. ᑲᔪᓯᔪᖅ ᑕᒪᓐᓇ ᐱᔭᕇᕐᑕᐅᒐᔭᕐᓂᐊᖒᕐᑐᖅ ᑖᓐᓇ. ᐊᕐᕌᒍᒃ ᐃᓱᓕᓚᐅᕐᑎᓇᒍ. ᖃᐅᔨᒪᒐᑦᑕ ᐱᒻᒪᕆᐊᓘᒋᐊᖓᓂ ᐃᓄᐃᑦ ᐊᑦᑕᓇᖕᖏᑐᒥᒃ ᐃᑎᕆᐊᑭᑦᑐᒥ ᐱᑦᔪᔭᐅᕕᖃᕆᐊᖃᕐᒪᑕ. ᐊᓕᐊᑉᐳᒍᑦ ᐱᐅᓯᓕᑎᕆᓕᕋᑦᑕ ᑲᖏᕐᓱᐊᓗᑦᔪᐊᑉ ᓄᓇᓕᖓᓂ. ᐊᒻᒪᓗᑦᑕᐅᒃ, ᑖᕙᓂ ᐋᓐᓂᐊᓯᐅᕐᑎᑖᕐᑎᓯᒋᐊᓪᓚᓯᒻᒥᔪᒍᑦ ᑕᓪᓕᒪᖕᖑᓱᒋᑦ ᐋᓐᓂᐊᓯᐅᕐᑏᑦ ᐱᒍᑦᔨᓯᐊᓕᐅᒥᒍᒪᒧᑦ, ᑲᒪᒋᔭᐅᒍᓰᑦ ᑲᔪᓯᑦᓯᐊᖁᓪᓗᒋᑦ ᐃᑲᔪᕐᓯᒪᔭᐅᒋᐊᓪᓚᖁᓪᓗᒋᓪᓗ ᑲᖏᕐᓱᐊᓗᑦᔪᐊᒥ ᐋᓐᓂᐊᓯᐅᕐᑎᐅᓕᕇᕐᑐᑦ. ᑕᓯᐅᔭᒥᓕ ᒪᓐᓇᓯᐅᑎᐅᓚᖓᔪᒥᒃ ᐱᖓᑦᓯᐅᑎᒥᒃ ᐋᓐᓂᐊᓯᐅᕐᑎᒋᐊᓪᓚᒥᒃ ᑖᕙᓃᑦᑎᓯᓕᕐᒥᔪᒍᑦ , ᐃᑲᔪᕐᓯᒪᒋᐊᕐᑐᑎᑦᓱᒍᑦ ᐱᓇᓱᐊᒐᑦᓴᖃᓗᐊᖃᑦᑕᓕᕐᑐᓂᒃ ᑲᒪᒋᔭᐅᑦᓯᐊᖁᔨᒧᓪᓗ ᑕᓯᐅᔭᒥᐅᓂᒃ. ᑯᑦᔪᐊᒥ, ᐱᔪᕆᐅᑎᖃᕐᐳᒍᑦ ᓴᐳᑦᔨᓯᒪᓚᖓᓕᕆᐊᒥᒃ ᐋᓐᓂᐊᓯᐅᕆᓂᕐᒥ ᐱᓇᓱᐊᕐᑎᕈᕐᐸᓕᐊᔪᓂᒃ. ᑲᕆᓇ ᑯᐊᑕ, ᐃᓅᑦᓱᓂ ᐋᓐᓂᐊᓯᐅᕐᑎᐅᒋᐅᕐᓴᑐᖅ ᐅᐱᕐᖔᖅ ᐱᓇᓱᐊᕆᐊᓪᓚᕆᐊᕐᑐᓯᒪᓚᐅᕐᑐᖅ ᑯᑦᔪᐊᑉ ᐋᓐᓂᐊᕕᖓᓂ ᐃᓕᓐᓂᐊᑕᒥᓂᒃ ᐱᔭᕆᕐᐸᓕᐊᑦᓱᓂ. ᓂᕆᐅᑉᐳᒍᑦ ᑐᖕᖓᓱᑦᑎᓛᕆᐊᖓ ᐱᔭᕆᕐᓯᒪᓕᕐᓗᓂ ᐋᓐᓂᐊᓯᐅᕐᑎᕈᓚᕐᓂᖓᓂᒃ ᓯᕗᓂᑦᑎᓂᒃ. ᐊᓯᒋᐊᓪᓚᖓ ᐱᒻᒪᕆᐅᒻᒥᔪᖅ, ᐱᓇᓱᑦᑎᑖᓚᐅᕋᑦᑕ ᖁᓪᓕᒃ ᑕᕐᕿᐊᐱᒻᒥᒃ, ᓯᕗᓪᓕᐸᐅᑦᓱᓂ ᐃᓄᒃ ᐱᔭᕆᕐᓯᒪᓕᕐᑐᖅ ᑕᕐᕋᑐᐃᔨᐅᓂᕐᒥᒃ Dawson ᐃᓕᓐᓂᐊᕕᖓᓂ. ᑯᑦᔪᐊᑉ ᐋᓐᓂᐊᕕᖓᓂᓕᕐᓂᖓ ᐃᑲᔪᕐᓯᒪᕆᓚᖓᔪᖅ ᐊᕐᕋᒍᓕᒫᒥ ᑕᕐᕋᑐᐃᓂᒃᑯᑦ ᐱᒍᑦᔨᔨᐅᓂᐊᕐᓗᓂ ᑯᑦᔪᐊᒥ ᒪᓐᑐᐊᓕᐊᕆᐊᑐᖕᖏᓂᕐᓴᐅᖃᑦᑕᓂᐊᕐᒪᑕ ᑕᕐᕋᑐᕐᑕᐅᒋᐊᓖᑦ.
ᐅᑯᐊ ᑐᑭᓯᓇᕐᑎᓯᓯᐊᕐᕈᑏᑦ ᐱᒍᑦᔨᐅᑎᒋᓯᒪᔭᖏᓐᓂᒃ ᑐᓚᑦᑕᕕᐅᑉ ᐁᕆᓕ 1,2025 ᒫᑦᔨ 31, 2026 ᐊᑯᓐᓂᖓᓂ. ᑯᑦᔪᐊᑉ ᐋᓐᓂᐊᕕᖓ 1,226-ᓂᒃ ᐊᓪᓚᓯᒪᔪᓅᕆᔪᕕᓂᒃ ᐋᓐᓂᐊᕕᒻᒨᑕᐅᔪᓂᒃ. 58-ᓄᑦ ᐃᑭᓐᓂᓴᐅᓕᕐᑐᕕᓃᑦ ᐊᕐᕌᒍᓚᐅᔪᒥᓂᑦ. ᐃᓪᓕᐅᒥᕙᓪᓕᐊᓂᕆᓯᒪᔭᖓ ᐱᒋᐊᕐᓯᒪᔪᖅ 2023-ᒥ, 200-ᒐᓛᓄᑦ ᐋᓐᓂᐊᕕᒻᒨᑎᑕᕕᓃᑦ ᐃᑭᓕᐅᒥᓯᒪᔪᑦ ᐃᓗᓐᓈᒍᑦ. ᑕᒪᓐᓇ ᐃᑭᓕᐅᒥᓯᒪᓂᖓ ᓄᐃᑕᑎᑦᓯᒍᑎᐅᑦᔭᖏᑦᑐᖅ ᐱᒻᒪᕆᐅᑎᒋᓂᖓᓂᒃ ᑲᑉᐱᐊᓇᕐᓯᔪᕕᓂᐅᓂᖓᓂᓪᓗ ᑲᒪᒋᔭᐅᕙᑦᑐᐃᑦ. ᑲᑎᑦᓱᒋᑦ, 823 ᐋᓐᓂᐊᓯᐅᕐᑕᐅᔪᑦ ᐊᐅᓪᓚᐅᔭᐅᒋᐊᖃᕐᓯᒪᔪᑦ ᐅᐃᒪᓇᕐᓱᑎᒃ, ᑕᒪᓐᓇᓗ ᓄᐃᑕᑎᑦᓯᓱᓂ ᑕᑎᖃᖏᓐᓇᕆᐊᖃᕐᐸᓂᑦᑎᓂᒃ ᓯᓚᑖᓂ ᐱᓪᓗᑯᒋᐊᓕᕐᑎᒍᑦ ᐱᒍᑦᔭᐅᒋᐊᖃᕐᐸᓂᕐᒥᒃ. ᐱᑦᔪᑎᐅᓂᕐᐸᐅᓯᒪᔪᑦ ᐅᐃᒪᓇᕐᓯᓱᑎᒃ ᐊᐅᓚᐅᔭᐅᔪᓄᑦ ᐃᕐᕋᕕᓗᓯᓂᖅ, ᐊᕐᖁᓇᕐᓂᖅ ᐳᕙᒃᑯᓗ ᖃᓄᐃᒍᑎᓕᓐᓄᑦ. ᑖᑯᐊ ᑐᑭᓯᓇᕐᑎᓯᔪᑦ ᑲᔪᓯᔪᒥᒃ ᐊᑦᓱᕈᑎᖃᕐᐸᒋᐊᑦᑎᓂᒃ ᐅᖓᓯᑦᑐᒥᐅᖑᓂᕐᒧᑦ, ᐊᑐᐃᓐᓇᖃᑦᓯᐊᖏᓐᓂᒧᑦ ᐱᓪᓗᑯᒋᐊᓕᕐᑎᒍᑦ ᑲᒪᒋᔭᐅᒍᓯᕐᓂᒃ ᐊᐅᓪᓚᑎᑦᓯᒍᑏᓪᓗ ᐃᓂᙯᓐᓇᖃᔭᖕᖏᓂᖓᓂᒃ. ᐃᓗᓐᓇᑎᒃ ᑕᒪᒃᑯᐊ ᐱᑦᔪᑏᑦ ᐃᓱᒪᒋᔭᐅᒋᐊᖃᕐᐸᑐᑦ ᐱᑦᔪᔨᒍᑎᓂᒃ ᐸᕐᓇᕆᐊᖃᕐᓂᒧᑦ ᐱᓇᓲᑎᓂᓪᓗ ᐊᑐᐃᓐᓇᖃᕆᐊᖃᕐᓂᒧᑦ. ᑐᓚᑦᑕᕕᒃ ᐱᓇᓱᐊᕐᒥᔪᖅ ᓄᑖᓂᒃ ᐋᓐᓂᐊᓯᐅᕆᒍᑎᓪᓚᕆᓐᓂᒃ ᖃᓂᓪᓕᑎᕆᒋᐊᒥᒃ ᑲᒪᒋᔭᖃᑦᓯᐊᓕᐅᒥᒍᑎᑦᓴᐅᒐᔭᕐᑐᓂᒃ ᐃᓄᓐᓂᒃ. |
ᐅᖃᐅᓯᖄᑲᐱᒍᒪᕗᖓ ᐱᐅᓯᓕᑎᕆᕙᓪᓕᐊᒍᑎᑦᑎᓂᒃ ᐋᓐᓂᐊᓂᓕᕆᓂᕐᒥ ᐱᒍᑦᔨᐅᑎᑦᑎᓂᒃ ᑐᓚᑦᑕᕕᒻᒥ.
ᖃᐅᔨᒪᒐᑦᑕ ᐊᑐᐃᓐᓇᖃᕈᓐᓇᓂᖅ ᐋᓐᓂᐊᓯᐅᕐᑕᐅᒍᑎᓂᒃ ᓄᓇᕕᒻᒥ ᐱᔭᕆᐊᑭᑦᑑᖏᒻᒪᑦ. ᐅᖓᓯᑦᑐᒥᐅᖑᓂᖅ, ᐊᐅᓚᒋᐊᖃᕐᓂᖅ ᐅᑕᕐᕿᕆᐊᖃᕐᓂᓗ ᐱᓇᓲᑎᖃᑦᓯᐊᖏᓐᓂᓗ ᐱᔭᕋᓕᑎᑦᓯᒍᓐᓇᕆᐊᖓ ᑲᒪᒋᔭᐅᔭᕆᐊᓕᓐᓂᒃ ᐃᓚᒌᓂᓪᓗ. ᑕᒪᓐᓇ ᐱᓇᓱᐊᕐᑕᕗᑦ ᖃᐅᑕᒫᑦ ᐱᐅᓯᓕᑎᕋᓱᐊᕐᓱᒍ.
ᐊᑕᐅᓯᓗᐊᖕᖑᐊᖅ ᐱᒻᒪᕆᐅᑦᓱᓂ ᐱᐅᓯᓕᑎᕆᐊᖃᕐᓯᒪᔪᖅ ᑭᒍᑎᓕᕆᔭᐅᓂᖅ. ᐊᕐᕌᓂ, ᒪᕐᕉᓂᒃ ᑭᒍᑎᓕᕆᔨᖃᓚᐅᔪᒍᑦ. ᐅᓪᓗᒥ ᓯᑕᒪᐅᓕᕐᑐᑦ. ᐃᓄᐃᑦ ᑭᒍᑎᓕᕆᔭᐅᒍᓐᓇᓂᕐᓴᐅᓕᕐᑐᑦ ᐊᓂᕐᕋᒥᓄᑦ ᖃᓂᓐᓂᓴᒥ, ᑲᔪᓯᔪᒥᓪᓗ ᕿᒥᕐᕈᖏᓐᓇᓱᑕ ᐱᐅᓯᐅᒥᒋᐊᕆᒐᓱᐊᕐᓂᒥᒃ ᐊᑐᐃᓐᓇᖃᕐᓂᖓᓂᒃ ᓄᓇᓕᖁᑎᑦᑕ.
ᐱᕙᓪᓕᐊᒥᔪᒍᑦ ᐱᓪᓗᑯᒋᐊᓕᕐᑎᒍᑦ ᐋᓐᓂᐊᓯᐅᕐᑕᐅᓂᒃᑯᑦ ᐱᒍᑦᔨᐅᑎᓂᒃ. ᐅᑕᕐᕿᕆᐊᖃᕐᐸᑐᑦ ᐃᕐᕋᕕᓕᕆᔭᐅᒋᐊᓖᑦ ᐃᑭᓕᐅᒥᓯᒪᓕᕐᑐᑦ. ᑯᑦᔪᐊᒨᕐᑎᓯᕙᓕᕋᑕ ᐃᓄᐃᑦ ᑲᒪᒋᔭᐅᒍᓐᓇᖁᓪᓗᒋᑦ ᖃᓪᓗᓈᓕᐊᖕᖏᓂᕐᓴᐅᓗᑎᒃ.
ᐄᕐᖃᒐᓕᕆᔨᕗᑦ ᐱᓇᓱᐊᕐᒥᔪᖅ ᐋᓐᓂᐊᓯᐅᑎᓕᕆᓂᒃᑯᑦ ᐱᑦᔪᔨᒍᑎᐅᔪᓂᒃ ᐊᑦᑕᓇᖕᖏᓂᕐᓴᐅᖁᔨᑦᓱᑎᒃ ᐃᓱᐊᕐᓂᓴᐅᖁᔨᑦᓱᑎᓪᓗ ᑲᒪᒋᔭᐅᔪᓄᑦ. ᓄᑖᑦ ᐱᓇᓱᒍᑏᑦ ᖃᕆᑕᐅᔭᒃᑰᑐᓪᓗ ᐃᑲᔪᕐᓯᒪᔪᑦ ᐱᓇᓱᑦᑎᑎᓐᓂᒃ ᑲᒪᒋᔭᖃᑦᓯᐊᓕᐅᒥᑎᑦᓱᒋᑦ ᐋᓐᓂᐊᓯᐅᑎᓂᒃ ᐊᑦᑕᓇᖕᖏᓂᕐᓴᑯᑦ ᐃᓚᖏᓪᓗ ᐱᑦᔪᔭᐅᒋᐊᓖᑦ ᐊᑐᐃᓐᓇᓯᒍᓐᓇᓂᕐᓴᐅᑎᑦᓱᒋᑦ ᐃᒻᒥᓂᕿᓗᑎᒃ.
ᓯᕗᓂᑦᓴᕆᓂᐊᕐᑕᑎᓐᓂᒃ ᐱᕙᓪᓕᐊᑎᑦᓯᒐᓱᐊᕐᒥᔪᒍᑦ. ᐱᓇᓱᐊᕐᓱᑕ ᖃᕆᑕᐅᔭᒃᑰᑎᑕᐅᒋᐊᖃᕐᓂᖓᓂᒃ ᐋᓐᓂᐊᓯᐅᕐᑕᐅᒍᑏᑦ ᐊᓪᓚᑕᐅᓯᒪᒍᑎᖏᓐᓂᒃ, ᐋᓐᓂᐊᓯᐅᕆᔩᑦ ᐊᑐᐃᓐᓇᖃᕐᓂᓴᐅᖁᓪᓗᒋᑦ ᖃᐅᔨᒪᒋᐊᓕᒻᒥᓂᒃ, ᑲᔪᓯᑦᓯᐊᓂᕐᓴᐅᖁᓪᓗᒋᓪᓗ ᐊᑦᑕᓇᖕᖏᓂᕐᓴᐅᓗᑎᒃ ᑕᒪᒃᑯᐊ. ᑕᒪᓐᓇ ᐱᒻᒪᕆᐊᓗᒃ ᐊᓪᓗᕆᐊᕐᓂᐅᓱᓂ ᓱᖑᓂᕐᓴᖑᐃᓚᖓᒐᒥ ᐱᑐᑦᓯᒪᑦᓯᐊᓕᐅᒥᑎᑦᓯᓗᓂᓗ ᐋᓐᓂᐊᓯᐅᕆᓂᒃᑯᑦ ᐱᒍᑦᔨᐅᑎᓂᒃ ᓄᓇᕕᓕᒫᒥ.
ᑐᖕᖓᓱᑦᑎᓯᓕᕐᒥᔪᒍᑦ ᓄᑖᓂᒃ ᐋᓐᓂᐊᓯᐅᕐᑎᒪᕆᓐᓂᒃ ᑲᔪᓯᑦᓱᑕᓗ ᐋᓐᓂᐊᓯᐅᕐᑎᒪᕆᖕᖑᒋᐅᕐᓴᑐᓂᒃ ᐱᓪᓗᑯᒋᐊᓕᕐᑎᒍᓪᓗ ᐋᓐᓂᐊᓯᐅᕐᑎᒪᕆᖕᖑᕋᓱᐊᕐᑐᓂᒃ ᐃᓕᓐᓂᐊᕆᐊᕐᑐᕕᐅᓯᒪᑦᓱᑕ. ᐃᓕᓐᓂᐊᑎᓂᒃ ᐅᕕᒃᑲᐅᓱᑎᓪᓗ ᐋᓐᓂᐊᓯᐅᕆᔨᐅᒋᐅᕐᓴᑐᓂᒃ ᐃᓕᓐᓂᐊᑎᑦᓯᓂᒃᑯᑦ ᐱᓇᓱᑦᑎᓯᓂᒃᑯᓗ ᓄᓇᕕᒻᒥ, ᐱᕈᕐᑎᓯᕙᓪᓕᐊᕗᒍᑦ ᐋᓐᓂᐊᓯᐅᕆᔨᐅᒍᓐᓇᓯᒐᔭᕐᑐᓂᒃ ᓯᕗᓂᕐᒥ.
i-STAT ᐊᐅᖏᕐᑕᐅᒍᑎᕕᓂᕐᒥᒃ ᖃᐅᔨᓴᐅᑎᒃ
ᓄᑖᑦ ᓅᑦᑕᕈᓐᓇᑐᑦ ᖃᐅᔨᓴᕈᑏᑦ i-STAT-ᖑᓂᕋᕐᑌᑦ ᓄᐃᑕᐅᖕᖑᓱᓕᕐᒥᔪᑦ ᐅᖓᕙᐅᑉ ᓄᓇᓕᓕᒫᖏᓐᓂ. I-STAT ᓱᑲᓐᓂᓴᐅᑦᓱᓂ ᓱᓇᒥᑦᓯᓂᕐᓴᐅᒍᓐᓇᑐᖅ ᑲᒪᒋᔭᐅᔫᑉ ᖃᐅᔨᓴᕐᑕᐅᒍᑎᖏᓐᓂᒃ ᐅᖓᓯᑦᑐᒦᒐᓗᐊᕐᐸᑕ ᖃᐅᔨᓴᕈᑎᐅᔪᓂᓪᓗ ᖃᐅᔨᑲᐱᒍᑎᐅᒍᓐᓇᓱᓂ.
I-stat ᒥᑭᔫᑦᓱᓂ ᓅᑦᑕᕈᓐᓇᑐᖅ ᐊᐅᒻᒥᒃ ᖃᐅᔨᓴᕈᑎᒃ ᖃᐅᔨᒍᑎᐅᒍᓐᓇᓱᓂ ᑐᑭᓯᔭᐅᒋᐊᓕᓐᓂᒃ 2 ᒥᓂᑦᓯᒐᓛᓐᓂ ᐊᖏᔫᖕᖏᑐᐊᐱᒻᒥᒃ ᐊᐅᒻᒥᒃ ᒪᕐᕈᕕᓪᓗᓂ ᑯᑐᕐᓯᒪᔪᐊᐱᒻᒥᒃ ᐊᑐᕐᓗᓂ. ᐋᓐᓂᐊᓯᐅᕆᔨᓂᒃ ᖃᐅᔨᑦᓴᐅᑎᒋᐊᐱᑎᓯᒍᓐᓇᑐᖅ, ᑲᒪᒋᔭᐅᔪᖅ ᖃᓄᐃᑦᑐᒦᒻᒪᖓ ᐊᐅᒻᒥᒍᑦ ᐳᕙᒃᑯᓗ ᖃᓄᐃᑦᑎᒋᒻᒪᖔᑦ.
I-STAT ᐱᐅᓯᐅᒥᑎᑦᓯᒪᕆᒍᓐᓇᑐᖅ ᐋᓐᓂᐊᓯᐅᕆᔩᑦ ᑲᒪᒍᓯᒋᒋᐊᓕᖓᓂᒃ ᐋᓐᓂᐊᓯᐅᕐᑕᐅᔪᒥᒃ, ᐱᓗᐊᕐᑐᒥᒃ ᑐᑭᑖᑲᐱᒋᐊᖃᓂᑕᖃᓕᕐᐸᑦ ᐅᐃᒪᔪᒃᑯᑦ ᐊᑐᐃᓐᓇᖃᕆᐊᖃᕐᓂᑯᓪᓗ ᐱᓪᓗᑯᒋᐊᓕᓐᓂᒃ ᐱᒍᑦᔭᐅᒍᑎᓂᒃ ᐅᓪᓗᒥᐅᔪᖅ ᐊᑐᐃᓐᓇᐅᓯᐊᖕᖏᑑᕙᑦᑐᓂᒃ.
ᐅᐃᒪᓇᕐᑐᓂᒃ ᐁᑦᓯᔩᑦ ᐊᑕᐅᓯᕐᒥᒃ i-STAT ᖃᐅᔨᓴᐅᑎᒥᒃ ᐊᑐᐃᓐᓇᖃᖃᑦᑕᓂᐊᓕᕐᒥᔪᑦ ᑐᑭᓯᒪᒍᑎᒋᖃᑦᑕᓂᐊᕋᒥᐅᒃ ᐋᓐᓂᐊᓯᐅᕐᑕᐅᔪᑉ ᑲᓄᐃᓕᖓᓕᕐᓂᖓᓂᒃ.
CT scan ᑎᒥᓕᒫᒥᒃ ᑕᕐᕋᑐᐃᒍᑎᒃ ᖃᑦᑕᐅᔭᐅᔮᓗᒃ
ᐅᖃᐅᓯᖃᓯᒋᕗᖓ ᐱᒻᒪᕆᕋᑕᕐᒥᒃ CT scan-ᑯᑦ ᑲᒪᒋᔭᐅᒍᓐᓇᕆᐊᖃᕐᓂᖓᓂᒃ ᐅᖓᕙᒥᐅᑦ.
CT scan ᑕᑯᑦᓴᐅᑎᑦᓯᒍᓐᓇᓲᖅ ᐊᑦᔨᒌᖕᖏᑐᑎᒍᑦ ᐊᑦᔨᓕᐅᕆᑦᓱᓂ ᑎᒥᐅᑉ ᐃᓗᐊᓂᒃ. ᐋᓐᓂᐊᓯᐅᕐᑎᒪᕇᑦ ᖃᐅᔨᒐᓱᐊᕈᑎᖃᓲᑦ ᐊᕐᖁᓇᕐᓯᒪᔪᓂᒃ ᐅᑦᑑᑎᒋᓗᒍ ᓴᐅᓂᕐᓂᒃ ᓯᖁᒥᑦᓯᒪᔪᓂᒃ, ᓂᐊᖁᒃᑯᑦ ᐋᓐᓂᓯᒪᔪᓂᒃ, ᓄᑭᓂᓪᓗ ᐃᓱᐃᓪᓕᓯᒪᔪᓂᒃ. ᖃᐅᔨᒍᑕᐅᒍᓐᓇᑐᖅ ᐃᓗᒃᑯᑦ ᐊᐅᓈᕐᑐᓂᒃ ᐋᕐᖁᓇᕐᑐᕕᓂᕐᓂᒃ ᓱᒃᑯᐊᕿᓂᕕᓂᒃᑯᑦ, ᐳᕙᒃᑯᓗ ᐊᐅᒋᑦᔨᓯᒪᔪᓂᒃ, ᐆᒻᒪᑎᕐᓗᕈᑎᓂᒃ, ᑕᕐᑐᑯᓪᓗ ᐅᔭᕋᓕᕐᓂᒃ. CT scan ᖃᐅᔨᒍᑕᐅᒍᓐᓇᒥᔪᖅ ᑲᒡᒍᑎᑖᕐᓯᒪᔪᓂᒃ ᖃᐅᔨᒪᒍᑎᐅᓲᖑᒻᒥᓱᓂᓗ ᑲᓄᖅ ᐋᓐᓂᐊᓯᐅᕐᑕᐅᔪᖃᕆᐊᖃᕐᒪᖔᑦ ᖃᐅᔨᓴᕐᑕᐅᒋᐊᖃᕐᑐᖃᓕᕐᐸᑦ ᐱᓚᑦᑕᐅᒋᐊᖃᕐᑐᖃᓕᕐᐸᓗ.
ᒪᓐᓇᐅᑎᓪᓗᒍ ᓄᓇᕕᒻᒥ CT scan-ᕈᑎᖃᖕᖏᑐᖅ. ᖃᐅᔨᓴᕐᑕᐅᒋᐊᓖᑦ ᒪᓐᑐᕆᐊᓕᐊᕆᐊᖃᕐᐸᑐᑦ. ᐊᕐᕌᒍᓂ ᖁᓕᓂ ᓈᔪᓂ, $25 ᒥᓕᐊᓐ ᐅᖓᑖᓄᑦ ᑮᓇᐅᔭᕐᑐᓯᒪᓕᕐᑐᒍᑦ ᖃᖓᑦᑕᐅᑎᓄᑦ, ᓯᓂᑦᑕᐅᑎᓄᑦ ᓂᕆᒍᑎᓅᓕᖓᔪᓄᓪᓗ. ᑮᓇᐅᔭᕐᑐᓂᐅᑉ ᐊᓯᐊᒍᑦ, ᑭᖑᕙᕆᐊᕐᑕᓂᖃᕐᐸᒥᔪᖅ, ᐊᐅᓚᒋᐊᖃᕐᓂᖓᓗ ᐃᓄᐃᑦ ᐃᓱᐃᓪᓕᐸᑦᓱᓂ, ᐊᓂᕐᕋᒥᓂᒃ ᕿᒣᒋᐊᖃᕐᐸᑐᑦ ᐱᔭᕆᐊᑦᑐᓯᒪᒍᑎᐅᓚᕿᕙᑦᓱᓂᓗ ᐋᓐᓂᐊᓯᐅᕆᓂᐅᔪᓄᑦ.
CT scan-ᔭᐅᒋᐊᖃᕐᓂᕃᓂᖓᑦ ᐋᓐᓂᐊᓯᐅᕐᑎᒪᕇᑦ ᐊᒥᓱᖕᖑᐸᓪᓕᐊᑐᐃᓐᓇᓱᓂᓗ. ᑖᓐᓇ ᖃᐅᔨᓴᐅᑎᒃ ᐱᑕᑲᕆᐊᖃᓪᓚᕆᓕᕐᑐᖅ ᖃᐅᔨᒪᒍᑎᐅᒍᓐᓇᕋᒥ, ᐋᓐᓂᐊᓯᐅᕐᑕᐅᒍᑎᐅᒋᐊᓕᓐᓂᓗ ᓇᓗᓀᕐᓯᒍᑎᐅᒐᒥ, ᐊᒻᒪᓗ ᒪᓐᑐᕆᐊᒧᑦ ᐊᐅᓪᓚᕆᐊᑐᖕᖏᑑᒍᑎᐅᒍᓐᓇᓱᓂ.
ᐱᓇᓱᐊᕐᑕᐅᒍᑎᑦᓴᖓ ᐊᑐᐃᓐᓇᕈᕐᑕᐅᓚᐅᔪᖅ ᑐᓂᔭᐅᑦᓱᓂᓗ ᑯᐯᑉ ᐋᓐᓂᐊᓂᓕᕆᓂᕐᒧᑦ ᑐᕐᖃᑕᕐᕕᑯᖏᓐᓄᑦ ᓯᑎᒻᐱᕆ 2025-ᖑᑎᓪᓗᒍ, ᓄᐃᑕᑎᑦᓯᒍᑎᐅᓱᓂ ᐋᓐᓂᐊᓯᐅᕆᒍᑎᓅᓕᖓᔪᓂᒃ, ᐊᐅᓚᑕᐅᒍᑎᒋᒐᔭᕐᑕᖏᓐᓂᒃ ᑮᓇᐅᔭᕐᑐᓂᕆᒐᔭᕐᑕᖓᓂᓪᓗ. ᐱᓇᓱᐊᕐᑕᐅᓂᑦᓴᖓᓅᓕᖓᔪᖅ ᑲᑎᒪᓂᖅ ᐊᑑᑎᓚᐅᔪᖅ ᐅᐱᕐᖓᓴᐅᓚᐅᕐᑐᒥ.
ᐱᓇᓱᐊᕐᑕᐅᓂᖓ ᕿᒥᕐᕈᔭᐅᓂᕐᒦᑐᖅ $12.5 ᒥᓕᐊᕌᒐᔭᕐᓗᓂ. ᑲᒪᒋᔭᐅᕙᑦᑐᑦ ᐊᓪᓚᑕᐅᓯᒪᒍᑎᖏᑦ ᓯᑯᑦᓴᔭᒦᑦᑐᑦ ᖃᕆᑕᐅᔭᕐᒨᔭᕐᑕᐅᒋᕐᓯᒪᓪᓚᕆᓕᕐᐸᑕ, ᑖᓐᓇ ᐃᓂᒃ ᐊᑐᐃᓐᓇᐅᓕᕋᔭᕐᑐᖅ. ᖃᓂᑦᑑᓂᖓ ᐊᓯᖏᓐᓄᑦ ᐋᓐᓂᐊᕕᒻᒥ ᐱᒍᑦᔨᒍᑎᐅᔪᓄᑦ ᐃᓂᑦᓴᓯᐊᖑᓕᕋᔭᕐᑐᖅ CT scan ᐊᑐᕐᑕᐅᒍᓐᓇᓯᓗᓂ ᑲᒪᒋᔭᐅᒋᐊᓕᓐᓄᑦ.
ᑐᓚᑦᑕᕕᒃ ᑲᔪᓯᔪᖅ ᐱᓇᓱᐊᕐᑕᐅᓂᖓᓂᒃ ᓄᑖᑉ CT scan-ᕈᑎᐅᒐᔭᕐᑑᑉ ᑯᑦᔪᐊᑉ ᐋᓐᓂᐊᕕᖓᓂ. ᑖᓐᓇᓗ ᐱᐅᓯᐅᒥᑎᑦᓯᒪᕆᒐᔭᕐᓱᓂ ᑲᒪᒋᔭᐅᒍᑎᓂᒃ, ᐊᐅᓪᓚᑲᑦᑕᕆᐊᖃᖕᖏᓂᕐᓴᐅᑎᑦᓯᓗᓂ ᐋᓐᓂᐊᓯᐅᕐᑕᐅᒋᐊᓖᓪᓗ ᐃᓚᒥᓄᑦ ᓄᓇᓕᒥᓄᓪᓗ ᖃᓂᓐᓂᓴᐅᓗᑎᒃ ᑲᒪᒋᔭᐅᒍᓐᓇᓯᒐᔭᕐᓱᑎᒃ.
TB ᐳᕙᓪᓗᓇᖅ
ᐅᖃᐅᓯᖄᐱᒍᒪᓕᕆᕗᖓ ᐳᕙᓪᓗᓇᐅᑉ ᒥᑦᓵᓄᑦ, ᐱᓇᓱᐊᕐᓂᕆᕙᑦᑕᑕᓗ ᑐᓚᑦᑕᕕᒻᒥ ᓴᐳᑦᔨᓯᒪᒐᓱᐊᕐᓱᒍ ᓄᓇᓖᑦ ᖃᓄᐃᖕᖏᓯᐊᕐᓂᓴᖓ.
ᐳᕙᓪᓗᓇᖅ ᐱᒻᒪᕆᐊᓘᑦᓱᓂ ᐃᓱᒫᓗᑎᐅᔪᖅ ᐃᓚᖏᓐᓂ ᓄᓇᓕᓐᓂ. ᖃᐅᔨᒪᑦᓱᑕᓗ ᐃᓱᒫᓘᑎᐅᒋᐊᖓ ᐃᓄᑑᓇᕐᑎᑐᓄᑦ ᐃᓚᒌᑦᑐᓄᓪᓗ. ᖃᐅᔨᒪᖁᕙᑦᓯ ᑕᒪᑦᓱᒥᖓ ᐱᒻᒪᕆᐅᑎᑦᓯᒐᑦᑕ ᓱᖑᓰᕙᓪᓕᐊᒐᓱᐊᕐᓱᑕᓗ ᓯᕗᕐᖐᓯᒪᐅᑎᒋᒐᓱᐊᕐᑕᑎᓐᓂᒃ, ᖃᐅᔨᒐᓱᐊᕈᑎᑦᑎᓂᒃ ᐊᓐᓂᐊᓯᐅᑑᒪᑎᑦᓯᓂᑦᑎᓂᓪᓗ ᐳᕙᓪᓗᑐᓂᒃ.
ᐱᒻᒪᕆᐅᓂᕐᐹᖅ ᐱᓇᓱᐊᕐᓂᐅᔪᓂᒃ ᖃᐅᔨᔭᐅᑲᐱᓐᓂᖓ ᐳᕙᓪᓗᓇᐅᑉ. ᖃᐅᔨᔭᐅᑦᓴᐅᑎᒋᑐᐊᕐᒪᑦ, ᐃᓄᐃᑦ ᐋᓐᓂᐊᓯᐅᕐᑕᐅᑲᐱᒍᓐᓇᓯᓲᑦ. ᐃᑲᔪᕐᓯᒪᒍᑕᐅᑦᓱᓂ ᖃᓄᐃᖕᖏᓯᐊᕆᐊᖃᕐᓂᖓᓂᒃ, ᐃᓚᒋᔭᖏᓐᓂᒃ ᓄᓇᓕᒻᒥᐅᓕᒫᓂᓪᓗ.
ᑲᖏᕐᓱᐊᓗᑦᔪᐊᒥ, ᐳᕙᓪᓗᑐᑦ ᐊᒥᓲᓂᖓ ᐃᓱᒫᓗᓐᓇᖏᓐᓇᑐᖅ. ᑮᓇᐅᔭᕐᑖᕆᐊᓪᓚᓯᒪᓕᕐᑐᒍᑦ ᒪᕐᕈᒋᐊᓪᓛᓂᒃ ᐋᓐᓂᐊᓯᐅᕐᑎᑖᕈᑎᑦᓴᓂᒃ ᐳᕙᓪᓗᑐᓕᕆᓂᐊᕐᑑᓂᒃ. ᓯᑕᒪᐅᓕᕋᔭᕐᑐᑦ ᓇᐅᓕᒫᓂᒃ ᖃᓄᐃᖕᖏᓯᐊᕐᑎᓯᒐᓱᐊᕐᑏᑦ ᐋᓐᓂᐊᓯᐅᕐᑏᖅ ᑕᒪᑦᓱᒥᖓ ᐱᓇᓱᐊᕐᑐᑦ. ᑖᒃᑯᐊ ᐱᓇᓱᑦᑎᒋᐊᓪᓛᒃ ᖃᐅᔨᓴᕆᐊᓪᓚᑎᐅᒍᓐᓇᓂᐊᕐᑑ, ᐋᓐᓂᐊᓯᐅᑎᑑᒪᑎᑦᓯᔨᐅᓗᑎᒃ ᑲᒪᒋᐊᓪᓛᔨᐅᓗᑎᓪᓗ.
ᑲᖏᕐᓱᔪᐊᒥ, ᑕᒪᓐᓇ ᐃᓱᒫᓗᓐᓇᓗᐊᕈᓐᓀᓯᒪᔪᖅ. ᓄᑖᓂᒃ ᐳᕙᓪᓗᑐᓂᒃ ᖃᐅᔨᔭᐅᔪᖃᕐᓯᒪᕋᑕᖕᖏᓗᑯᒻᒪᑦ 2026-ᒥ. ᐃᓚᐅᑦᓯᐊᒪᕆᓐᓂᖓ ᓄᓇᓕᒻᒥᐅᑦ ᑲᐅᔨᓴᕐᓂᐅᔪᓄᑦ ᐃᑲᔪᕐᓯᓯᒪᓪᓚᕆᑦᑐᖅ ᐅᕙᑦᑎᓂᒃ ᑐᑭᓯᒪᒍᑎᒋᒐᑦᑎᒍᑦ ᖃᓄᐃᓕᖓᓕᕐᓂᐅᔪᒥᒃ ᓵᖕᖓᓯᑲᐱᒍᑎᐅᒍᓐᓇᑐᓂᓪᓗ.
ᐊᑐᐃᓐᓇᕈᕐᑎᒥᔪᒍᑦ ᓲᖑᓯᒋᐊᕋᓱᐊᕐᓱᑕ ᐳᕙᓪᓗᓇᐅᑉ ᖃᐅᔨᓴᕐᑕᐅᓂᖓᓂᒃ ᑯᑦᔪᐊᒥ ᐊᓯᖏᓐᓂᓗ ᓄᓇᓕᓐᓂ. ᓯᕗᓂᖃᕐᑐᒍᑦ ᖃᐅᔨᓴᓚᖓᒋᐊᖅ ᐊᒥᓲᓂᕐᓴᓂᒃ ᐃᓄᓐᓂᒃ, ᐱᓗᐊᕐᑐᒥᒃ 14-ᓂᒃ ᐅᑭᐅᓕᓐᓂᒃ ᐊᖓᔪᑦᓯᓂᓪᓗ, ᓇᓗᓀᕐᓯᒐᓱᐊᕐᓗᑕᓗ ᐳᕙᓪᓗᓇᖅ ᐱᑕᖃᕋᓗᐊᕐᒪᖔᑦ ᒪᓗᓐᓇᐅᑎᖃᖕᖏᓗᓂ.
ᖃᐅᔨᓴᕐᓂᖅ ᐃᓚᖃᕐᑐᖅ ᑕᕐᕋᑐᕐᑕᐅᓂᕐᒥᒃ ᐅᕆᐊᕐᑎᑕᐅᓂᕐᒥᓗ. ᐃᓚᖏᓐᓂ ᐊᓯᖏᑦ ᖃᐅᔨᓴᐅᑏᑦ ᐊᑐᐃᓐᓇᐅᑎᑕᐅᕙᒻᒥᔪᑦ ᓇᓗᓀᕐᓯᒍᑎᐅᓚᖓᓗᑎᒃ ᐳᕙᓪᓗᓇᖅ ᓯᓂᑦᑑᓂᕋᕐᑕᐅᒐᓗᐊᕐᒪᖔᑦ.
ᖃᐅᔨᒪᔪᒍᑦ ᖃᐅᔨᓴᕐᓂᖅ ᐊᑯᓃᕈᓐᓇᑐᖅ ᐊᔪᐃᓐᓈᖑᒋᐊᖃᕐᓱᓂᓗ. ᐱᓇᓱᒐᕐᒥᒃ, ᐃᓕᓐᓂᐊᓂᕐᒥᒃ ᐃᓚᒋᔭᓂᓪᓗ ᑲᒪᒋᔭᖃᕆᐊᖃᕐᓂᒥᒃ ᐊᕝᕕᐊᕈᓐᓇᓱᓂ. ᑭᓯᐊᓂ ᐊᑐᓂ ᐃᓄᒃ ᖃᐅᔨᓴᕐᑕᐅᔪᖅ ᐃᑲᔪᕐᓯᔪᖅ ᐅᕙᑦᑎᓂᒃ ᑕᑯᑦᓯᐊᓕᐅᒥᒍᑎᒋᒍᓐᓇᕋᑦᑎᒍᑦ ᖃᐅᔨᒍᑎᒋᓗᒍ ᐳᕙᓪᓗᓇᖅ ᖃᓄᐃᓕᖓᓕᕋᓗᐊᕐᒪᖔᑦ ᓄᓇᓕᑦᑎᓂ.
ᓇᑯᕐᒦᕈᒪᓪᓚᕆᑉᐳᖓ ᑲᖏᕐᓱᐊᓗᑦᔪᐊᒥᐅᓂᒃ ᑲᖏᕐᓱᔪᐊᒥᐅᓂᓪᓗ ᐃᑲᔪᕐᓯᒪᑦᓯᐊᖃᑦᑕᕋᑦᓯ ᐅᑉᐱᕆᔭᖃᑦᓯᐊᓱᓯᓗ.
ᓇᑯᕐᒦᕈᒪᒻᒥᓱᖓᑦᑕᐅᖅ ᐋᓐᓂᐊᓯᐅᕐᑎᑎᓐᓂᒃ, ᓇᐅᓕᒫᓂᒃ ᖃᓄᐃᖕᖏᓯᐊᕐᑎᓯᒐᓱᐊᕐᑎᓂᒃ, ᐋᓐᓂᐊᓯᐅᕐᑎᒪᕆᓐᓂᒃ, ᑕᕐᕋᑐᐃᔨᓂᒃ, ᓄᓇᓕᒻᒥ ᑎᒥᐅᔪᓂᒃ ᐱᓇᓱᐊᖃᑎᒋᖏᓐᓇᓕᒫᓱᑦᑎᓂᓪᓗ ᖃᐅᑕᒫᑦ ᐱᓇᓱᐊᕐᐸᑐᓂᒃ ᓵᖕᖓᓯᒐᓱᐊᕐᓱᑎᒃ ᐳᕙᓪᓗᓇᕐᒥᒃ.
ᐃᙯᑎᑦᓯᒋᐊᓪᓚᓯᐊᕈᒪᒻᒥᔪᖓ ᑭᓇᓕᒫᒃᑯᓂᒃ, ᑲᖕᖑᓇᕐᑐᑕᖃᖕᖏᒪᑦ ᖃᐅᔨᓴᕐᑕᐅᒋᐊᖅ ᐋᓐᓂᐊᓯᐅᑎᑑᒪᒋᐊᖅ ᐳᕙᓪᓗᑐᐊᕈᓂ. ᐳᕙᓪᓗᓇᖅ ᖃᓄᐃᒍᑎᐅᓪᓚᕆᑦᑐᖅ. ᐃᑲᔪᕐᑕᐅᓂᖅ, ᖃᐅᔨᓴᕐᑕᐅᓂᖅ ᐋᓐᓂᐊᓯᐅᑎᑑᒪᒋᐊᖃᕐᓂᒥᓪᓗ ᐱᔭᕆᑦᓯᐊᓂᖅ ᑲᒪᑦᓯᐊᓂᐅᒻᒪᑦ, ᐃᒻᒥᓂᒃ, ᐃᓚᒋᔭᕐᓂᒃ ᓄᓇᓕᒋᔭᕐᓂᓗ.
ᑲᔪᓯᓚᖓᕗᒍᑦ ᓄᓇᕕᒻᒥᐅᓂᒃ ᓄᓇᓕᓐᓂᓗ ᐱᓇᓱᐊᖃᑎᙯᓐᓇᓯᐊᕐᓗᑕ. ᓈᓚᖃᑦᑕᓚᖓᔪᒍᑦ, ᐱᓇᓱᒍᓯᑦᑎᓂᓪᓗ ᐊᓯᑦᔨᑎᕆᒋᐊᑦᓯᐊᖃᑦᑕᓗᑕ ᐱᓇᓲᑎᐅᒋᐊᓕᓐᓂᓗ ᐊᑐᐃᓐᓇᐅᑎᑦᓯᓗᑕ ᑭᖕᖑᒪᓇᕐᓂᖏᑎᒍᑦ.
ᐱᓇᓱᐊᖃᑎᒌᓪᓗᑕ, ᖃᐅᔨᑲᐱᖃᑦᑕᓂᒃᑯᑦ, ᐋᓐᓂᐊᓯᐅᑎᑑᒪᑎᑦᓯᓂᒃᑯᑦ, ᓯᕗᒃᖐᓯᒪᒐᓱᐊᕐᓂᑯᑦ ᓄᓇᓕᐅᓪᓗ ᐃᓚᐅᓂᖓᒍᑦ, ᐳᒃᑭᓕᐅᒥᑎᑦᓯᒍᓐᓇᖁᒍᑦ ᐳᕙᓪᓗᓇᐅᑉ ᐃᕐᐸᕈᓐᓇᓂᖓᓂᒃ ᐃᓄᓯᕐᓂᓗ ᐱᐅᓕᑦᓯᓗᑕ.
ᖃᓄᐃᖕᖏᓯᐊᕐᓂᒥᒃ ᖃᐅᔨᒪᔭᐅᑎᑦᓯᒐᓱᐊᕈᑏᑦ
ᐋᓐᓂᐊᕕᑦᑎᓂᒃ ᑐᖕᖓᓇᕐᑑᑎᑦᓯᒋᐊᓪᓚᕋᓱᐊᕐᒥᔪᒍᑦ ᐊᑦᔨᖑᐊᑎᒍᑦ ᓄᐃᑕᑎᑦᓯᓂᐅᔪᑎᒍᓪᓗ ᓄᓇᕕᐅᑉ ᓯᓚᖓᓂᒃ, ᐃᓕᕐᕈᓯᖓᓂᒃ ᓄᓇᖓᓂᒃ ᐃᓄᖏᓐᓂᓗ. ᑲᒪᒋᔭᐅᔭᕐᑐᑐᑦ ᐃᓚᒌᓪᓗ ᐱᑐᑦᓯᒪᔫᔭᖁᓪᓗᒋᑦ ᐊᓂᕐᕋᒥᓄᑦ ᐋᓐᓂᐊᕕᒻᒦᒋᐊᖃᓕᑐᐊᕈᑎᒃ.
ᖃᓄᐃᖕᖏᓯᐊᕐᓂᒥᒃ ᖃᐅᔨᒪᔭᐅᑎᑦᓯᒐᓱᐊᕐᓂᖅ ᑲᔪᓯᑎᑕᐅᓚᖓᔪᖅ ᑯᑦᔪᐊᑉ ᐋᓐᓂᐊᕕᖓᓂ ᐅᓯᖕᖓᕕᐅᕙᑦᑐᒥ ᓄᐃᑕᑎᑦᓯᕗᖅ ᐊᖏᕐᓯᒪᓂᑦᑎᓂᒃ ᐊᓯᑦᔨᒋᐊᕆᒐᓱᐊᕐᓂᒥᒃ ᐋᓐᓂᐊᕕᒻᒥᒃ ᑐᖕᖓᓇᕐᓂᓴᐅᖁᓪᓗᒍ, ᓄᓪᓚᖓᑦᓯᐊᓇᕐᑑᓗᓂ ᑐᑭᖃᑦᓯᐊᑐᒃᑯᓗ ᐃᓂᐅᒍᓐᓇᓯᐊᕐᓗᓂ.
ᑐᕋᒐᖃᕐᑐᒍᑦ ᖃᓄᐃᖕᖏᓯᐊᓕᐅᒥᑎᑦᓯᓂᕐᒥᒃ ᐋᓐᓂᐊᕕᒻᒦᑐᓄᒃ, ᐳᓛᕆᐊᕐᑐᓂᒃ, ᐱᓇᓱᑦᑎᓂᓗ ᓄᐃᑕᑎᑦᓯᓂᒃᑯᑦ ᐃᓂᐅᔪᒥᒃ ᐃᓱᕐᕆᓇᕐᑐᒥᒃ, ᑲᑉᐱᐊᓇᕐᑐᖃᖕᖏᓂᕐᓴᒥᒃ ᒪᒥᑉᐸᓕᐊᑎᑦᓯᒍᑎᐅᔪᒥᓪᓗ. ᐅᑭᐅᕐᑕᑐᒥᒃ ᐅᖓᓯᑦᑐᒥᐅᖑᒐᑦᑕ, ᐊᑦᑕᓇᕐᑑᒦᒍᓐᓇᑐᓂᓪᓗ ᑲᒪᒋᔭᖃᕐᐸᓱᑕ ᐱᓇᓱᐊᕙᕐᔪᐊᕆᐊᖃᕐᐸᑐᓂᓪᓗ ᐱᓇᓱᑦᑎᖃᕐᓱᑕ, ᑖᓐᓇ ᐊᐅᓚᑦᔭᕆᐊᕈᑎᒋᓯᒪᔭᕗᑦ ᓄᐃᑕᑎᑦᓯᔪᖅ ᓱᕐᖁᐃᓯᐊᕐᑐᑯᑦ ᐃᓅᖃᑎᒌᓐᓂᒨᓕᖓᑎᑦᓯᓂᕐᒥᒃ ᑲᒪᒋᔭᐅᒍᓯᐅᔪᓂᒃ.
ᐱᓇᓱᐊᕐᑕᐅᔪᖅ ᑐᖕᖓᕕᓕᒃ ᓄᐃᑕᐅᓯᒪᔪᓂᒃ ᑕᑯᑦᓴᐅᑎᑕᐅᔪᓂᒃ ᐃᓕᖓᔪᓂᒃ ᓄᓇᒧᑦ, ᓄᓇᓖᑦ ᐃᓕᕐᕈᓯᖓᓄᑦ, ᐱᕐᖁᓯᖏᓐᓄᓗ ᓄᓇᕕᐅᑉ. ᓄᐃᑎᕐᑕᐅᒪᔪᑦ ᐋᓐᓂᐊᕕᓕᒫᒥ, ᑖᒃᑯᐊ ᑕᑯᑦᓴᐅᔪᑦ ᓄᐃᑕᑎᑦᓯᒍᑎᐅᔪᑦ ᑐᖕᖓᓱᑦᑎᓯᓂᕐᒥᒃ, ᐃᓕᕐᕈᓯᕐᒧᑦ ᐱᑐᑦᓯᒪᓂᕐᒥᒃ ᐃᓚᐅᑦᓯᐊᓂᕐᒥᓗ. ᓄᓇᖁᑎᒋᔭᐅᔪᒥᒃ ᓄᓇᓕᒻᒥᓗ ᖃᓂᓪᓕᐅᒥᑎᑦᓯᒍᑎᐅᑦᓱᑎᒃ ᐋᓐᓂᐊᕕᒻᒦᒋᐊᖃᕐᐸᑐᓄᑦ ᓇᒻᒥᓂᖅ ᑖᒃᑯᓇᓃᒋᐊᓪᓚᕕᖃᖕᖏᓂᖓᓂ ᐋᓐᓂᐊᕕᒻᒦᓂᕐᒥᓂ.
ᐱᓇᓱᐊᕐᕕᐅᑉ ᑕᑯᓐᓇᑕᖓᒍᑦ, ᑖᓐᓇ ᖃᐅᔨᒪᔭᐅᑎᑦᓯᒐᓱᐊᕐᓂᖅ ᐃᓕᖓᑦᓯᐊᑐᖅ ᖃᓄᐃᖕᖏᓯᐊᕐᓂᒥᒃ ᑫᓪᓗᑐᐃᒐᓱᐊᕈᑎᐅᔪᓄᑦ ᐱᒋᐊᕐᑎᑕᐅᓚᐅᕐᓯᒪᔪᓄᑦ 2023-ᒥ.
ᑖᓐᓇ ᖃᐅᔨᒪᔭᐅᑎᑦᓯᒐᓱᐊᕈᑎᒃ ᑐᑭᖃᑦᓯᐊᓱᓂ ᐊᐅᓚᑦᔭᕆᐊᕐᓂᐅᔪᖅ ᓱᖑᓯᓭᔪᖅ ᐋᓐᓂᐊᕕᐅᑉ ᓄᓇᓕᐅᓪᓗ ᐱᑐᑦᓯᒪᐅᑎᓂᖓᓂᒃ, ᐃᑲᔪᕐᓯᒪᓪᓚᕆᑦᓱᓂᓗ ᐃᓅᖃᑎᒌᑎᒍᑦ, ᐃᓕᕐᕈᓯᕐᒥᒃ ᑐᖕᖓᕕᖃᕐᓂᑯᑦ ᐃᓚᑦᔪᒍᓱᑦᓯᐊᓂᒃᑯᓗ ᑲᒪᒍᓯᐅᔪᓂᒃ ᐃᖃᔪᕐᓯᒪᓪᓚᕆᑦᓱᓂᓗ ᐱᓇᓱᑦᑏᑦ ᐃᓚᐅᒍᓐᓇᓯᐊᕐᓂᖓᓂᒃ.
ᐅᓐᓂᓗᒍᑎᓕᕆᔨ
ᐃᙯᑎᑦᓯᒋᐊᓪᓚᕈᒪᒻᒥᔪᖓ ᑭᓇᓕᒫᒃᑯᓂᖓ ᑲᒪᒋᔭᖃᑦᓯᐊᓂᖅ ᐃᓚᖃᕐᒪᑦ ᓈᓚᓐᓂᒥᒃ.
ᐃᓱᒫᓘᑎᖃᕈᑦᓯ, ᖃᓄᐃᓕᒋᐊᕈᑎᑦᓴᖃᕈᑦᓯ ᐅᓐᓂᓗᒍᑎᑦᓴᖃᕈᑦᓯᓗᓐᓃᑦ ᐱᒍᑦᔨᓂᑦᑎᓅᓕᖓᔪᓂᒃ, ᑐᓴᕆᐊᕐᕕᐅᖁᔨᕗᒍᑦ ᐱᒍᑦᔨᓯᐊᕆᐊᖃᕐᓂᒥᒃ ᐅᓐᓂᓗᒍᑎᐅᔪᓂᓪᓗ ᑲᒪᔨᐅᔪᒥᒃ. ᖃᐅᔨᒋᐊᕈᓐᓇᑐᓯ ᓕᓯ ᔪᐊᓇᓯᒥᒃ ᐅᕙᓂ 819-964-2905 ᓯᕙᓂᖓ 2509.
ᐱᔪᓐᓇᐅᑎᒋᔭᑎᑦ ᓲᓱᒋᔭᐅᑦᓯᐊᑐᕕᓂᐅᔪᕆᖕᖏᑯᕕᒃᑭᑦ ᐃᒫᙰᕈᑎᓕᐅᕈᒪᒍᕕᓪᓘᓃᖅᐱᑦᔪᔭᐅᒍᑎᕕᓂᕐᓅᓕᖓᔪᓂᒃ, ᑐᓚᑦᑕᕕᐅᑉ ᐅᓐᓂᓘᑎᓂᒃ ᑲᒪᔨᖓ ᓕᓯ ᔪᐊᓇᓯ ᐅᖄᓚᕕᒋᒍᓐᓇᑌᑦ 819-964-2905 ᓯᕙᓂᖓ 2509.
ᑖᓐᓇ ᐱᑦᔪᔨᓂᖅ ᓇᐅᓕᒫᓅᑦ ᖃᐅᔨᒪᔭᐅᒋᐊᖃᖕᖏᑐᑎᒎᕐᑐᖅ ᐃᑲᔪᕐᓯᓱᓂᓗ ᐱᐅᓯᓕᑎᕆᓂᕐᒥᒃ ᑲᒪᒍᓯᐅᔪᓂᒃ ᓴᐳᑦᔨᓯᒪᒍᑎᐅᑦᓱᓂᓗ ᐱᔪᓐᓇᐅᑎᖏᓐᓂᒃ ᐊᑐᕐᑏᑦ. ᓂᐲᑦ ᐃᑲᔪᕐᓯᕗᖅ ᐱᑦᓯᐊᓕᐅᒥᖁᓪᓗᑕ.
ᐅᖃᐅᓯᖃᒐᓛᐱᒍᒪᒻᒥᔪᖓ ᐱᓇᓱᑦᑕᑎᑦᓅᓕᖓᔪᓂᒃ ᑕᑯᑦᓴᐅᖏᒃᑲᓗᐊᕐᓱᑎᒃ, ᑐᓚᑦᑕᕕᒃ ᓱᖑᔪᑦᓯᐊᖑᖏᓐᓇᖁᓪᓗᒍ ᑭᒡᒐᑐᑦᓯᐊᖏᓐᓇᖁᓪᓗᒍᓗ ᓄᓇᓕᑦᑎᓂᒃ. ᓯᕗᓪᓕᖅ, ᐃᓕᑕᕐᓯᒍᒪᔪᖓ ᐱᓇᓱᐊᖃᑎᖃᕐᓂᑎᓐᓂᒃ ᐋᓐᓂᐊᓯᐅᕐᑕᐅᓂᖅ ᐊᑐᐃᓐᓇᐅᓯᐊᖏᓐᓇᖁᓪᓗᒍ. ᐃᓄᐃᑦ ᖃᖓᑦᑕᔫᖏᑦ ᒪᓐᑐᕆᐊᓕᐊᕐᑕᓂᖓ ᑯᑦᔪᐊᒥᑦ ᐅᒃᑯᐃᓚᐅᔪᑎᓪᓗᒍ, ᖁᕕᐊᓲᑎᖃᓪᓚᕆᑉᐳᒍᑦ ᐱᑦᓯᐊᑕᐅᓂᖓᓂᒃ ᐱᒍᑦᔭᐅᓯᐊᓕᐅᒥᓯᒪᓂᖓᓂᓪᓗ ᐋᓐᓂᐊᕕᓕᐊᕐᐸᑐᑦ, ᐊᑐᕐᑎᐅᔪᑦ ᐊᐅᓚᒋᐊᖃᕐᐸᑐᐃᓪᓗ. ᓇᑯᕐᒦᓚᕆᑦᑐᒍᑦ ᐃᓄᐃᑦ ᖃᖓᑦᑕᔫᖏᓐᓂᒃ ᐃᑲᔪᕐᓯᒣᓐᓇᓕᒫᑦᓯᐊᓂᖓᓄᑦ ᐊᔪᐃᓐᓇᓂᖓᓄᓪᓗ ᑭᒡᒐᑐᕐᓱᑎᒃ ᓄᓇᕕᒻᒥᐅᓂᒃ. ᑮᓇᐅᔭᑎᒍᑦ, ᐱᒻᒪᕆᒻᒥᒃ ᐱᕙᓪᓕᐊᓯᒪᓂᖃᓕᕐᖁᒍᑦ. ᑮᓇᐅᔭᕐᑐᓗᐊᕈᑎᒋᓯᒪᔭᕗᑦ ᑲᑎᕐᓱᓯᒪᔪᕕᓃᑦ 11.6 ᒥᓕᐊᕕᓂᐅᑦᓱᑎᒃ ᐃᑭᓕᒋᐊᕐᓯᒪᓕᕐᑐᑦ 6.6 ᒥᓕᐊᕈᕐᓱᑎᒃ. ᑕᒪᓐᓇ ᐱᐅᓯᐅᒥᓂᓪᓚᕆᐊᓗᒃ ᓄᐃᑕᑎᑦᓯᒍᑎᐅᑦᓱᓂᓗ ᐱᓇᓱᑦᑎᑕ ᐱᓇᓱᐊᕐᓂᓚᕆᖓᓂᒃ. ᓵᖕᖓᒐᑦᓴᓕᒻᒪᕆᐅᖏᓐᓇᑐᒍᑦ. ᓂᖀᑦ, ᐋᓐᓂᐊᓯᐅᕆᒍᑏᑦ, ᖃᖓᑦᑕᐅᑏᑦ, ᐅᕐᓱᐊᓗᒃ ᐊᓯᖏᓪᓗ ᐱᒍᑦᔨᐅᑎᓪᓚᕆᐅᒋᐊᓖᑦ ᐊᑭᖏᑦ ᐅᓄᕐᓯᕙᓪᓕᐊᑐᐃᓐᓇᑐᓱᓕ. ᐱᓇᓱᐊᕐᐳᒍᑦ ᐱᐅᓯᕙᓪᓕᐊᑎᑦᓯᒐᓱᐊᕐᓱᑕ ᑮᓇᐅᔭᑎᒍᑦ ᐊᐅᓚᑦᓯᓂᓕᕆᓂᕐᑎᒍᓪᓗ ᐱᓇᓲᑎᑦᑎᓂᒃ ᐸᕐᓇᓯᐊᓕᐅᒥᒍᒪᑦᓱᑕ, ᐱᓇᓱᒍᑎᒋᒋᐊᓕᑦᑎᓂᓪᓗ ᐊᑐᑦᓯᐊᓂᕐᓴᐅᒍᒪᓪᓗᑕ ᑲᔪᓯᑦᓯᐊᕈᒪᓪᓗᑕᓗ ᑮᓇᐅᔭᕐᑕᓯᑦᑐᐃᓂᕐᒥᒃ ᑭᖕᖑᒪᓇᕐᓂᐸᖁᑕᐅᔪᓂᒃ. |
ᑮᓇᐅᔭᐅᑉ ᓴᖕᖐᓕᓯᒪᓂᖓ ᐃᓅᒐᓱᐊᕐᓂᐅᓗ ᐊᑭᑐᔪᐊᓘᓂᖓ ᓄᓇᕕᒻᒥ ᓱᕐᕃᒪᕆᑦᓯᒪᒻᒥᔪᖅ ᐃᓪᓗᖃᕆᐊᖃᕐᓂᑎᓐᓂᒃ ᐱᐅᒃᑯᑎᒻᒪᕆᖃᕆᐊᖃᕐᓂᑎᓐᓂᓗ. ᑐᓚᑦᑕᕕᒃ ᐋᓐᓂᐊᕕᓕᐊᕐᐸᑐᓂᒃ ᐱᓇᓱᑦᑎᓂᓪᓗ ᐊᑦᑕᓇᖕᖏᑐᑦᓯᐊᓂᒃ ᐃᓂᖃᖁᔨᕗᖅ ᐱᓇᓱᕝᕕᖃᑦᓯᐊᓗᑎᓪᓗ. ᑕᒪᓐᓇ ᐱᒻᒪᕆᐊᓗᒃ ᐱᑦᓯᐊᑐᑎᒍᑦ ᐊᓐᓂᐊᓯᐅᕆᒍᓯᖃᕐᓂᐊᕋᑦᑕ ᐱᓇᓱᑦᑎᓂᓪᓗ ᓄᕐᖃᑲᑦᑕᔨᐊᖃᖕᖏᓂᕐᓴᐅᓗᑕ. ᐱᓪᓗᑯᒋᐊᖃᕐᑐᓕᕆᓂᕐᑎᒍᑦ ᐱᒍᑦᔨᔨᕗᑦ ᐱᓇᓱᐊᕐᐸᑐᑦ ᖃᐅᑕᒫᑦ ᓄᓇᕕᓕᒫᒥ ᓴᓇᒪᑦᓯᐊᑎᑦᓯᒐᓱᐊᕐᓱᑎᒃ ᐃᓪᓗᖁᑎᑦᑎᓂᒃ, ᐋᓐᓂᐊᓯᐅᕆᒍᑎᑦᑎᓂᒃ ᓄᓇᒃᑰᔫᑦᑎᓂᓪᓗ. ᐱᓇᓱᐊᕐᑕᖓᑦ ᑕᑯᑦᓴᐅᖏᒃᑲᓗᐊᕐᓱᓂ ᐊᑑᑎᒋᐊᖃᓪᓚᕆᑦᑐᖅ ᐊᓐᓂᐊᓯᐅᓂᓕᕆᓂᖅ ᐃᓄᓕᕆᓂᕐᓗ ᐊᑦᑕᓇᖕᖏᑑᖁᓪᓗᒍ. 48 ᐱᓇᓱᑦᑎᕗᑦ ᑲᒪᒋᐊᖃᕐᐸᑐᑦ ᓴᓇᒪᑦᓯᐊᖏᓐᓇᕆᐊᖃᕐᓂᖓᓂᒃ 180 ᐅᖓᑖᓄᑦ ᐃᓪᓗᐃᑦ 11-ᓂ ᓄᓇᓕᓐᓂ 168-ᓗ ᓄᓇᒃᑰᔫᑦ. ᐊᕐᕋᒍᓂ ᖁᓕᓂ ᐊᓂᒍᕐᑐᓂᒃ, ᓄᓇᒃᑰᔫᑦ ᐊᒥᓱᖕᖑᓕᐅᒥᓯᒪᔪᑦ ᐱᖓᓱᕕᓪᓗᐊᓱᑎᒃ, 54-ᕕᓃᑦ 2014-ᒥ 168-ᖑᓕᕐᑐᑦ ᐅᓪᓗᒥ. ᐊᕐᕌᓂ, 19-ᒋᐊᓪᓓᑦ ᐃᓚᒋᐊᕈᑕᐅᓚᐅᔪᑦ ᓄᓇᒃᑰᔫᖁᑎᑦᑎᓄᑦ. ᐊᑐᓂ ᓄᓇᒃᑯᔫᖅ ᑮᓇᐅᔭᕐᑐᑐᒻᒪᕆᒃ ᐊᐅᓚᒋᐊᖓ ᓴᓇᒣᓐᓇᑎᒋᐊᖓᓗ. ᓱᑲᑦᑐᒪᕆᒻᒥ ᐱᕈᕐᓯᒪᓂᖓ ᑕᒪᑦᓱᒪ ᐅᖁᒣᓪᓘᕈᑎᐅᖃᑦᑕᒥᔪᖅ ᓄᓇᓕᒻᒥ ᓴᓇᕕᐅᔪᓄᑦ, ᐱᓗᐊᕐᑐᒥᒃ ᓄᓇᓕᓐᓂ ᑯᑦᔪᐊᑉ ᓯᓚᑖᓂᑦᑐᓂ. ᑌᒣᓐᓂᑯᖓᓄᑦ, ᐃᓚᖏᑦ ᓴᓇᔭᐅᒋᐊᓖᑦ ᑕᕐᕿᓂᒃ ᐊᒥᓱᑐᕐᐸᑐᑦ ᐱᔭᕆᕐᑕᐅᒐᓱᐊᕐᓂᖓ. ᖃᐅᔨᒪᑦᓱᑕᓗ ᐃᓪᓗᖁᑎᕗᑦ ᓄᑕᐅᖕᖏᓕᕐᑐᑦ, ᓴᓇᒣᓐᓇᑎᒐᓱᐊᕐᓱᒋᑦ ᐱᐅᓯᓕᑎᕋᓱᐊᕐᓱᒋᓪᓗ ᐃᓪᓗᒪᕇᑦ ᓄᓇᕕᓕᒫᒥ ᐊᑦᓱᕈᕐᓇᑐᒻᒪᕆᖕᖑᓯᒪᔪᖅ. ᐊᑦᓱᕈᕐᓇᑐᖅ ᓵᖕᖓᔭᐅᒋᐊᖃᕐᐸᒥᔪᖅ ᑮᓇᐅᔭᓅᓕᖓᔪᖅ. ᐊᒥᓱᑦ ᐱᓇᓱᐊᕐᑕᐅᒋᐊᓖᑦ ᐊᕐᕋᒍᕐᑐᕆᐊᖃᕐᐸᑐᑦ ᐊᒥᓱᓂᒃ ᐸᕐᓇᑕᐅᓂᒃᑯᑦ ᓴᓇᔭᐅᒋᐊᖃᕐᓂᑯᓪᓗ, ᑭᓯᐊᓂ ᒪᓐᓇᐅᑎᓪᓗᒍ ᑮᓇᐅᔭᖃᕐᑎᑕᐅᓂᖅ ᐊᑦᑕᓀᑦᑐᓯᐊᖑᕐᖃᔭᖕᖏᑐᖅ ᖃᐅᔨᒪᓇᖕᖏᑑᓯᕙᑦᓱᓂᓗ. ᑕᒪᓐᓇ ᓄᓇᓕᓐᓂ ᐱᒻᒪᕆᓐᓂᒃ ᐱᓇᓱᐊᕐᑕᐅᒋᐊᓕᓐᓂᒃ ᑭᖑᕙᕆᐊᕐᑎᓯᒻᒪᕆᓲᖅ. ᑕᒪᒃᑯᐊᖑᒐᓗᐊᕐᑎᓗᒋᑦ, ᐱᓇᓱᑦᑎᕗᑦ ᑲᔪᓯᔪᑦ ᐸᕐᓇᓱᑎᒃ, ᓴᓇᒣᓐᓇᑎᑦᓯᓱᑎᒃ, ᓯᖁᒥᑦᓯᒪᔪᕐᓂᐊᓱᑎᒃ ᓯᕗᒧᐊᕐᑎᓯᑦᓱᑎᓪᓗ ᐱᓇᓱᐊᕆᐊᓕᓐᓂᒃ. ᓯᕗᓂᖃᕐᑐᒍᑦ ᓴᓇᒐᔭᕐᓂᒥᒃ ᓴᓇᒣᓐᓇᑎᑦᓯᓂᕐᒥᓗ ᐊᑦᑕᓇᖕᖏᑐᓂᒃ ᑐᖕᖓᓇᕐᑐᓂᒃ ᐃᓂᐅᒍᓐᓇᑐᓂᒃ ᐋᓐᓂᐊᕕᓕᐊᕐᐸᑐᓄᑦ, ᐃᓚᒌᓄᑦ ᐱᓇᓱᑦᑎᐅᔪᓄᓪᓗ ᐃᑲᔪᕐᓯᒪᔭᐅᓂᕐᒥᒃ ᐃᑉᐱᓂᐊᑦᓯᐊᖁᓪᓗᒋᑦ. ᑲᔪᓯᓚᖓᔪᒍᑦ ᐱᓇᓱᐊᖃᑎᖃᕐᓂᒥᒃ ᓄᓇᕕᒻᒥ ᑯᐯᒻᒥᓗ ᐱᓇᓱᐊᖃᑎᒋᓲᑦᑎᓂᒃ ᑮᓇᐅᔭᖃᕐᑎᑕᐅᑦᓯᐊᖁᓪᓗᒋᑦ ᑕᒪᒃᑯᐊ ᐱᓇᓱᐊᕐᑕᐅᒋᐊᓖᑦ ᐱᒻᒪᕆᐅᑎᑕᐅᔪᑦ ᓄᓇᕕᒻᒥᐅᓄᑦ. ᐱᓇᓱᒐᑦᓴᓕᒻᒪᕆᐅᕗᓱᓕ ᓯᕗᓂᕐᒥ. ᐊᔪᐃᓐᓇᐳᒍᑦ ᐸᕐᓇᓚᖓᒋᐊᖅ ᐊᕗᖓᐅᓕᔪᓅᓕᖓᔪᓂᒃ ᓱᖑᔪᑦᓯᐊᖑᓂᕐᓴᒥᒃ ᓯᕗᓂᖃᖁᓪᓗᒍ ᐋᓐᓂᐊᓯᐅᕆᒍᓯᐅᔪᖅ ᓄᓇᕕᒻᒥ. |
ᐃᓪᓗᖃᕆᐊᖃᕐᓂᖅ ᐊᓂᕐᕋᓴᕐᓂᒃ ᐊᑦᓱᕉᑎᒋᓂᕐᐹᑕ ᐃᓚᖓᑦ. ᐊᓂᕐᕋᓭᑦ ᐊᑐᐃᓐᓇᐅᖏᑐᐊᕐᒪᑕ, ᐱᔭᕆᐊᑐᔫᕙᑦᑐᖅ ᐱᓇᓱᑦᑎᑖᕋᓱᐊᕆᐊᖅ ᓄᓇᕕᒻᒦᑎᑦᓯᒐᓱᒋᐊᒥᓪᓗ ᐱᓇᓱᑦᑎᓂᒃ. ᐃᓚᖓᓂ ᒪᓐᓇᓯᐅᑎᑐᐃᓐᓇᓂᒃ ᓄᓇᕕᐅᑉ ᓯᓚᑖᓂᑦ ᐱᓯᒪᔪᓂᒃ ᐱᓇᓱᑦᑎᖃᕆᐊᖃᕐᐸᑐᒍᑦ. ᐱᓇᓱᐊᕈᑎᒋᖏᓐᓇᑕᕗᑦ ᐅᐱᓐᓇᕋᓂ ᐊᑌᓐᓇᑐᑦᓯᐊᓂᒃ ᐱᓇᓱᑦᑎᖃᕐᓂᖅ, ᖃᐅᔨᒪᑦᓯᐊᑐᓂᒃ ᓄᓇᓕᑦᑎᓂᒃ ᐱᒻᒪᕆᐊᓘᒻᒪᑦ ᐅᕙᑦᑎᓄᑦ. ᐱᓇᓱᑦᑎᕗᑦ ᑐᖕᖓᕕᓪᓚᕆᐊᓘᒻᒪᑕ ᓱᓇᓕᒫᓄᑦ ᐱᓇᓱᐊᕆᐊᓕᑦᑎᓄᑦ. ᐱᓇᓱᑦᑎᓕᕆᔩᑦ ᐱᓇᓱᐊᕐᐸᑐᑦ ᐱᐅᓯᓕᑎᕆᒐᓱᐊᕐᓱᑎᒃ ᐱᓇᓱᑦᑎᓴᕐᓯᐅᕈᓯᕐᓂᒃ, ᐱᓇᓱᒐᕐᒦᑎᑦᓯᒐᓱᐊᕐᓂᒥᒃ ᐱᕙᓪᓕᖁᑎᐅᒍᓐᓇᑐᓂᓪᓗ, ᐱᓗᐊᕐᑐᒥᒃ ᐃᓄᑐᐃᓐᓇᓅᓕᖓᔪᓂᒃ. ᐱᓇᓱᐊᖃᑎᖃᕐᑐᒍᑦ ᓄᓇᕕᒻᒥ ᐱᓇᓱᐊᖃᑎᑦᓴᔭᑦᑎᓂᒃ ᑐᑭᓯᒐᓱᐊᖃᑎᒋᑦᓱᒋᑦ ᓱᓀᑦ ᑭᖕᖑᒪᓇᕐᒪᖔᑕ ᖃᓄᕐᓗ ᐱᕙᓪᓕᖁᑏᑦ ᑲᔪᓯᑦᓯᐊᕈᓐᓇᒪᖔᑕ ᐱᒍᒪᓚᕿᑎᑦᓯᒍᑎᐅᓗᑎᓪᓗ. ᐊᔪᐃᓐᓇᕆᐊᓪᓛᒥᔪᒍᑦ ᐃᓄᑐᐃᓐᓇᓂᒃ ᐱᓇᓱᑦᑎᑖᕋᓱᐊᕐᓂᒥᒃ. ᐱᓇᓱᒉᑦ ᖃᐅᔨᒪᔭᐅᑎᑕᐅᒐᓱᐊᖏᓐᓇᓕᒫᕐᑐᑦ ᑯᑦᔪᐊᒥ ᓄᓇᓕᓐᓂᓗ. ᑕᑯᒋᐊᖃᑦᑕᕆᑦᓯ ᑮᓇᖃᕐᕕᑯᑦ FB-ᑯᑦ ᑕᑯᑦᓴᐅᑎᖃᑦᑕᑕᑦᑎᓂᒃ ᐃᒣᓕᔪᕐᑕᖃᕐᓱᑎᒃ ᐃᓄᓐᓂᒃ ᐱᓇᓱᑦᑎᓴᕐᓯᐅᓂᖅ ᐱᓇᓱᒐᐅᒍᓐᓇᑐᓪᓗ ᑐᓚᑦᑕᕕᒻᒥ, ᖃᐅᔨᒋᐊᖃᑦᑕᓂᐊᕋᑦᓯ ᐱᓇᓱᒐᕆᔭᐅᒍᓐᓇᑐᓂᒃ ᐃᓄᓐᓄᑦ. ᓯᕗᓂᕆᒐᓱᐊᕐᑕᕗᑦ ᐊᔪᒉᑦᑑᖏᑦᑐᖅ: ᓄᓇᕕᒻᒥᐅᓂᒃ ᐱᓇᓱᖁᔨᑦᓴᑐᐃᓐᓇᑐᒍᑦ ᐱᓇᓱᐊᕐᕕᑎᓐᓂ, ᐃᓚᒋᔭᐅᖁᑦᓱᒋᑦ ᐱᓇᓱᐊᕐᑎᑎᓄᑦ. ᐱᓇᓱᒐᑦᓴᓕᒻᒪᕆᐊᓗᒃ ᑐᓚᑦᑕᕕᒻᒥ ᐃᓄᐃᑦ ᐱᓇᓱᒐᕆᒍᓐᓇᑕᖏᓐᓂᒃ. ᐃᓄᓐᓅᓕᖓᔪᖅ FB-ᒥ ᐃᒣᓕᔪᕐᑕᖃᕐᓱᑎᒃ ᐃᓄᓐᓂᒃ ᐱᓇᓱᑦᑎᓴᕐᓯᐅᓂᖅ ᐱᓇᓱᒐᐅᒍᓐᓇᑐᓪᓗ ᑐᓚᑦᑕᕕᒻᒥ, ᐃᓕᖓᓪᓚᕆᑦᑐᖅ ᐃᓄᓐᓄᑦ ᐱᓇᓱᒍᒪᔪᓄᑦ ᐋᓐᓂᐊᓂᓕᕆᓂᕐᒥ ᐃᓄᓕᕆᓂᕐᒥᓗ ᐱᒍᑦᔨᐅᑎᓂ ᐱᕙᓪᓕᔭᐅᖁᓪᓗᒋᑦ ᐃᓄᖁᑎᕗᑦ, ᐃᓚᒌᑦ ᐱᖃᓐᓈᑦ. ᑐᓚᑦᑕᕕᒃ ᓯᕗᒧᐊᕐᐸᓕᐊᔪᖅ, ᐊᓪᓗᕆᐊᕌᐱᖃᑦᑕᓂᒃᑯᑦ ᑐᑭᖃᑦᓯᐊᑐᒥᒃ ᓯᕗᓂᖃᕐᓱᓂ: ᐱᕈᕐᓭᓂᕐᒥᒃ ᓱᖑᔪᑦᓯᐊᒥᒃ, ᐊᑦᑕᓀᑦᑐᒥᒃ ᑖᕗᖓᐅᓕᒍᓐᓇᓯᐊᓚᖓᔪᒥᒃ ᐱᓇᓱᕝᕕᒥ, ᓄᓇᓕᒻᒥᐅᓂᒃ ᐱᓇᓱᑦᑎᖃᕐᓗᓂ, ᐱᑦᓯᐊᑐᓂᒃ ᐋᓐᓂᐊᓯᐅᕆᓂᒃᑯᑦ ᐃᓄᓕᕆᓂᕐᑯᓗ ᐱᒍᑦᔨᐅᑎᖃᕐᓗᓂ ᓄᓇᕕᒻᒥᐅᓂᒃ ᐊᕐᕋᒍᓂ ᙯᔪᓂ. ᐋᓐᓂᐊᓂᓕᕆᓂᖅ ᐋᓐᓂᐊᓯᐅᕐᑎᒪᕆᓐᓅᓕᖓᑐᐃᓐᓇᖏᑦᑐᖅ, ᐋᓐᓂᐊᓯᐅᕐᑎᓅᓕᖓᑐᐃᓐᓇᕋᓂ ᐃᓪᓗᓅᓕᖓᑐᐃᓐᓇᕋᓂᓗ. ᐅᑉᐱᕆᔭᖃᕐᓂᒨᓕᖓᕗᓪᓕ. ᐊᑦᑕᓇᖕᖏᑐᒦᒋᐊᖃᕐᓂᒥᒃ ᐃᑉᐱᓂᐊᕐᓂᒨᓕᖓᔪᖅ. ᑐᑭᓯᔭᐅᒋᐊᖃᕐᓂᒨᓕᖓᔪᖅ. ᐃᑎᕈᕕᑦ ᐋᓐᓂᐊᕕᒻᒧᑦ, ᑐᖕᖓᓇᕐᓂᓴᐅᒍᓐᓇᑐᖅ ᑕᑯᒋᐊᖅ ᓄᓇᕐᖃᑎᒋᔭᒥᒃ. ᐅᖃᐅᓯᑦᑎᓂᒃ ᐅᖃᕈᓐᓇᑐᒥᒃ. ᑐᑭᓯᒪᔪᒥᒃ ᐃᓕᕐᕈᓯᑦᑎᓂᒃ ᖃᓄᐃᑦᑐᒦᓐᓂᑎᓐᓂᓗ. ᖃᓄᐃᓐᓂᕆᔭᕐᓂᒃ ᐅᖄᕕᒋᒍᓐᓇᓯᐊᕐᓇᑐᓂᒃ. ᐊᐱᕐᓱᑕᐅᒍᓐᓇᓯᐊᕐᓂᓴᓂᒃ. ᐃᓄᓐᓂᓗ ᐃᓱᕐᕆᑎᑦᓯᒍᓐᓇᓂᕐᓴᐅᓱᓂ ᐃᑲᔪᕐᑕᐅᒋᐊᕐᑐᑐᓂᒃ ᑭᖕᖑᒪᑦᓯᓕᕋᒥᒃ. ᑌᒣᒻᒪᑕᒐ ᑐᓚᑦᑕᕕᒃ ᑭᖕᖑᒪᑦᓯᕗᖅ ᐊᒥᓲᓂᕐᓴᓂᒃ ᐃᓄᓐᓂᒃ ᐱᓇᓱᖃᑎᖃᕈᒪᑦᓱᓂ. ᐃᓄᓐᓂᒃ ᐋᓐᓂᐊᓯᐅᕐᑎᑖᕈᒪᔪᒍᑦ, ᐃᓄᓕᕆᔨᑖᕈᒪᔪᒍᑦ, ᓄᓇᓕᒻᒥ ᐱᓇᓱᑦᑎᑖᕈᒪᔪᒍᑦ, ᐊᐅᓚᑦᓯᓂᓕᕆᓂᕐᒥ ᐱᓇᓱᑦᑎᑖᕈᒪᔪᒍᑦ , ᑲᒪᔨᓂᒃ ᐊᓯᖏᓐᓂᓗ ᐊᒥᓱᒋᐊᓪᓚᓂᒃ ᐱᓇᓱᒐᔭᕐᑐᓂᒃ ᐱᒍᑦᔨᓂᕆᔭᑦᑎᓂ. ᐱᐅᓯᓕᑎᕆᓂᐅᔪᖅ ᐋᓐᓂᐊᓯᐅᕆᒍᓯᑦᑎᓂᒃ. ᓄᐃᑎᕆᓂᕐᒨᓕᖓᑦᓱᓂ ᐱᕕᑦᓴᐅᒐᔭᕐᑐᓂᒃ ᐃᓄᓐᓄᑦ ᑕᒫᓂ ᓄᓇᕕᒻᒥ. ᐊᓯᒋᐊᓪᓚᖓ ᐱᒻᒪᕆᐅᒋᐊᓪᓚᒥᔪᖅ. ᐃᓄᐃᑦ ᐱᓇᓱᑐᐊᕐᒪᑕ ᐱᒍᑦᔨᐅᑎᒋᔭᑦᑎᓂ, ᐃᑲᔪᕐᓯᕗᒍᑦ ᐃᓂᓪᓚᑎᕆᖃᑎᐅᑦᓱᑕ ᐱᓇᓱᒍᓯᐅᔪᒥᒃ. ᑐᓂᔨᕙᑦᑐᒍᑦ ᖃᐅᔨᒪᒍᓯᕐᑎᓂᒃ. ᐊᑑᑎᓯᒪᔭᑦᑎᓂᒃ. ᑐᑭᓯᒪᓂᑦᑎᓂᒃ ᓄᓇᓕᑦᑎᓂᒃ. ᐃᑲᔪᕐᑐᒍᑦ ᐱᒍᑦᔨᐅᑎᕗᑦ ᑐᖕᖓᓇᕐᓂᓴᐅᖁᓪᓗᒋᑦ, ᓲᓱᑦᓴᓂᕐᓴᐅᓗᑎᒃ ᐱᑐᑦᓯᒪᓂᕐᓴᐅᓗᑎᓪᓗ ᐃᓄᓐᓄᑦ ᐱᒍᑦᔨᔭᑦᑎᓄᑦ. ᖃᐅᔨᒪᖁᔨᕗᖓ ᓄᓇᕕᒻᒥᐅᑦ ᐅᕕᒐᕐᑐᖏᓐᓂᒃ ᐃᓂᖃᕐᒪᑕ ᐋᓐᓂᐊᓂᓕᕆᓂᕐᒥᒃ. ᐊᓯᑦᔨᑎᕆᖃᑎᐅᒍᓐᓇᖁᑎᑦ. ᐱᓇᓱᒐᖃᕐᓂᒥᒃ ᐱᕈᕐᓭᒍᓐᓇᖁᑎᑦ ᑕᒡᒐᓂ. ᑐᓚᑦᑕᕕᒻᒥ ᐱᓇᓱᒐᕐᒦᑐᓂᒃ ᐃᓕᓐᓂᐊᑎᑦᓯᒍᓯᖃᕐᑐᒍᑦ . ᐃᑲᔪᕈᓐᓇᑐᑎᑦ ᐃᓚᑎᓐᓂᒃ. ᐃᑲᔪᕈᓐᓇᑐᑎᑦ ᓄᓇᓕᓐᓂᒃ. ᐃᑲᔪᕐᓯᒍᓐᓇᓱᑎᓪᓗ ᐋᓐᓂᐊᓂᓕᕆᒍᓯᕗᑦ ᓱᖑᓯᐅᒥᑎᒐᓱᐊᕐᓗᒍ. ᐅᕙᓐᓄᓕ, ᓯᕗᓂᕆᒐᓱᐊᕐᑕᕗᑦ ᑐᑭᖃᑦᓯᐊᑐᖅ. ᐋᓐᓂᐊᓂᓕᕆᓂᕐᒥ ᐃᓄᓕᕆᓂᕐᒥᓗ ᐱᒍᑦᔨᐅᑎᑦᑎᓂᒃ ᐃᓂᓪᓚᖓᖁᔨᔪᖓ ᐃᓄᐃᑦ ᐃᓚᐅᒍᓐᓇᓯᐊᕐᑎᓗᒋᑦ. ᐃᓄᐃᑦ ᑐᓵᕐᔭᐅᒍᓐᓇᓯᐊᕐᑎᓗᒋᑦ ᓲᓱᒋᔭᐅᑦᓯᐊᓗᑎᑦ. ᐋᓐᓂᐊᓂᓕᕆᓂᖅ ᐃᓂᓪᓚᑕᐅᒪᓗᓂ ᐃᓄᓐᓄᑦ, ᐃᓄᐃᑦ ᐃᓚᐅᑎᓪᓗᒋᑦ ᐃᓄᓐᓅᓕᖓᓗᓂ. ᑕᒪᓐᓇ ᐊᑕᐅᑦᓯᑯᑦ ᐱᓇᓱᐊᕈᑎᒋᒍᓐᓇᑕᕗᑦ ᐱᕈᕐᓴᓗᒍ. ᐃᓄᑐᐃᓐᓇᓗ ᐅᕙᑦᑎᓄᑦ ᐱᓇᓱᐊᖃᑕᐅᓯᑐᐊᕐᒪᑦ ᖃᓂᓪᓕᒋᐊᓪᓚᑐᒍᑦ ᑕᒪᑦᑐᒧᖓ ᑎᑭᐅᑎᒐᓱᐊᕐᑕᑎᓐᓄᑦ. ᐅᓇᒻᒥᓱᒍᕕᑦ ᐱᓇᓱᒋᐊᒥᒃ ᑐᓚᑦᑕᕕᒻᒥ, ᐅᖄᓚᕕᖃᕈᓐᓇᑐᑎᑦ ᔨᕌᑦ ᐁᕈ ᒥᐊᓱᒥᒃ ᐱᓇᓱᑦᑎᓕᕆᔨᓂ ᐅᕙᓂ 819-964-2905 ᓯᕙᓂᖓ 2445. |
ᐅᖃᐅᓯᖄᐱᒍᒪᓕᕆᕗᖓ ᐃᕕᕐᑎᕆᕕᖁᑎᑦᑕ ᒥᑦᓵᓄᑦ, ᐱᓗᐊᕐᑐᒥᒃ ᐃᓅᓱᑦᑐᓂᒃ ᐃᑲᔪᕐᓯᒪᕙᑦᑕᑎᓐᓂᒃ. ᐊᕐᕌᒍᑫᓐᓇᑐᖅ ᐊᑦᓱᕈᕐᓇᑐᓂᒃ ᐱᑕᖃᓚᐅᕐᑐᖅ. ᑲᒪᔨᐅᒍᓐᓇᑐᓂᒃ ᐊᐅᓚᑦᓯᔨᐅᓗᑎᒃ ᕿᓂᖏᓐᓇᑐᒍᑦ ᐱᓇᓱᑦᑎᓴᕐᓯᐅᓱᑕᓗ, ᑲᔪᓯᒐᓗᐊᕐᑐᒍᑦ ᐱᓇᓱᑦᑎᓕᕆᔩᑦ ᐱᓇᓱᐊᖃᑎᒋᑦᓱᒋᑦ ᓱᖑᓯᓭᒐᓱᐊᕐᓱᑕ ᐱᓇᓱᐊᕐᑎᑎᓐᓂᒃ ᑕᑎᖃᖕᖏᓂᕐᓴᐅᒐᓱᐊᒧᑦ ᓯᓚᑖᓂᒥᐅᓂᒃ ᐱᓇᓱᑦᑎᓴᕐᓯᐅᕕᖃᖃᑦᑕᓂᕐᒥᒃ. ᑌᒣᒐᓗᐊᕐᑎᓗᒍ ᐱᐅᔪᕐᑕᖃᕐᒥᔪᖅ ᐱᓇᓱᐊᕐᑕᐅᔪᓂ. ᑐᖕᖓᓱᑦᑎᓯᓯᒪᓕᕐᑐᒍᑦ ᐃᓄᐃᑦ ᐃᓕᕐᕈᓯᓕᕆᔨᖏᓐᓂᒃ ᐃᓅᓱᑦᑎᓕᕆᔨᓂᓪᓗ ᒪᓐᑐᕆᐊᒥ ᐱᓇᓱᐊᕐᕕᑎᓐᓂ. ᑕᒪᓐᓇ ᐱᒻᒪᕆᐊᓗᒃ ᐊᓪᓗᕆᐊᕐᓂᐅᓱᓂ ᐃᓅᓱᑦᑐᐃᑦ ᐱᑐᑦᓯᒣᓐᓇᖁᓪᓗᒋᑦ ᐃᓕᕐᕈᓯᕐᒥᓄ, ᐅᖃᐅᓯᕐᒥᓄ ᓄᓇᓕᒥᓄᓪᓗ. ᐱᓇᓱᐊᕐᑎᕗᑦ ᐃᓕᓐᓂᐊᑎᑕᐅᖏᓐᓇᓕᒫᕐᑐᑦ ᐅᐃᒪᓇᕐᓯᔪᓕᕆᐅᑎᓂᒃ, ᖁᐊᕐᓵᓇᕐᑐᑰᕈᑕᐅᓯᒪᔪᓂᒃ ᑐᑭᓯᒪᓂᒃᑯᑦ ᑲᒪᒍᓯᕐᓂᒃ ᐃᑲᔪᕐᓯᒪᒍᑎᐅᒍᓐᓇᑐᓂᓪᓗ. ᓱᖑᓯᓭᔪᒍᑦ ᐱᓇᓱᐊᕈᑎᑎᓂᒃ ᐃᓅᓱᑦᑐᐃᑦ ᑲᒪᒋᔭᐅᓂᖃᑦᓯᐊᖁᓪᓗᒋᑦ ᐊᑦᑕᓇᖕᖏᑐᒃᑯᑦ, ᑲᔪᓯᑦᓯᐊᑐᒃᑯᑦ ᓲᓱᒋᔭᖃᑦᓯᐊᑐᑎᒍᓪᓗ. ᐱᓇᓱᐊᖃᑎᖃᑦᓯᐊᑐᒍᑦ ᓄᓇᕕᒻᒥ ᐃᓗᓯᓕᕆᔨᒃᑯᓂᒃ ᐊᓯᖏᓐᓂᓗ ᐱᓇᓱᐊᖃᑎᒋᕙᑦᑕᑎᓐᓂᒃ ᐱᐅᓯᓕᑎᕆᒐᓱᐊᕐᓱᑕ ᐱᓇᓱᐊᕐᑕᑎᓐᓂᒃ ᐱᒍᔨᒍᑎᕗᓪᓗ ᑲᔪᓯᑦᓯᐊᑎᒐᓱᐊᕐᓱᒋᑦ ᐱᓇᓱᐊᕐᕕᓕᒫᑦᑎᓂ. ᐱᓇᓱᐊᑎᖃᑦᓯᐊᓂᒃᑯᑦ ᐱᓇᓱᖃᑎᑦᑎᓂᒃ ᓄᓇᕕᒻᒥ ᖃᓪᓗᓈᑦ ᓄᓇᖓᓐᓂᓗ, ᐊᑐᐃᓐᓇᕈᕐᑎᕆᔪᒍᑦ ᑲᔪᓯᑎᑕᐅᓂᑦᓴᖓᓂᒃ ᓯᑎᒻᐱᕆᐅᓕᕐᐸᑦ ᐃᓅᓱᑦᑐᐃᑦ ᑲᒪᒋᔭᐅᒍᓯᖏᓐᓅᓕᖓᔪᒥᒃ (PIJ)-ᖑᓂᕋᕐᑕᖅ. ᑖᓐᓇ ᐱᓇᓱᐊᕐᑕᐅᔪᖅ ᐃᑲᔪᕐᓯᓚᖓᔪᖅ ᐱᓇᓱᑦᑎᑎᓂᒃ ᐱᓇᓱᐊᖃᑎᑦᑎᓂᓪᓗ ᐱᓇᓱᐊᖃᑎᒌᒍᑎᖃᑦᓯᐊᓕᐅᒥᑎᓗᒋᑦ ᐃᓄᓱᑦᑐᓅᓕᖓᔪᓂᒃ. ᓯᕗᓂᖃᕐᑐᖅ ᑲᔪᓯᑦᓯᐊᓕᐅᒥᑎᑦᓯᒐᓱᐊᕐᓂᒥᒃ, ᑐᑭᓯᒪᖃᑎᒌᑦᓯᐊᓕᐅᒥᓂᕐᒥᒃ ᐃᑲᔪᕐᓯᒣᓐᓇᓂᕐᒥᓗ, ᐃᓅᓱᑦᑐᐃᑦ ᐃᓚᒋᔭᖏᓪᓗ ᐃᑲᔪᕐᓯᒪᔭᐅᑦᓯᐊᖁᓪᓗᒋᑦ ᑲᒪᒋᔭᐅᒍᓯᓕᒫᖏᓐᓂ. ᑖᓐᓇ ᓄᑖᖅ ᖃᕆᑕᐅᔭᕐᑎᒍᑦ ᐱᓇᓱᒍᓯᖅ ᐊᑐᕐᓗᒍ, ᐱᓇᓱᑦᑏᑦ ᖃᐅᔨᒪᔭᐅᒋᐊᓕᓐᓂᒃ ᑐᓴᐅᒪᖃᑎᒌᒍᑎᖃᕐᓂᓴᐅᓚᖓᔪᑦ ᐃᓅᓱᑦᑑᑉ ᖃᓄᐃᑦᑐᒦᓐᓂᖓ ᑲᔪᓯᑦᓯᐊᑐᒃᑯᑦ ᑲᒪᒋᔭᐅᖃᑦᑕᓯᐊᖁᓪᓗᒍ ᐱᒋᐊᑦᓯᐊᓕᑌᓐᓇᖃᑦᑕᕈᓐᓀᓗᓂ ᑲᑎᓯᓕᑐᐊᕐᐸᑦ ᓄᑖᒥᒃ ᐱᓇᓱᑦᑎᒥᒃ ᐊᓯᐊᒎᕆᐊᖃᓕᕈᓂᓗ ᐱᒍᑦᔨᐅᑎᐅᑉ. ᐃᓅᓱᑦᑐᓂᒃ ᓂᐱᖃᖁᔨᕗᒍᑦ ᑐᑭᑖᕈᑕᐅᔪᓂᒃ ᓱᕐᕋᑕᐅᒍᑎᒋᔭᒥᓂ. ᐱᓇᓱᖃᑎᖃᕈᒪᕗᒍᑦ ᐃᓚᒌᓂᒃ ᐱᑐᑦᓯᒪᑦᓯᐊᓕᐅᒥᑎᓗᒋᑦ. ᐃᓕᕈᓯᕐᒥᓗ ᓄᐃᑕᑎᑦᓯᒍᒪᑦᓱᑕ ᖃᐅᑕᒫᑦ ᐃᓅᓯᖏᓐᓂᒃ ᐱᕐᖁᓯᕐᑎᒍᑦ ᓱᖃᑦᓯᓂᖃᖁᓪᓗᒋᑦ, ᓄᓇᒦᒍᓐᓇᑎᓗᒋᑦ, ᓂᕿᑐᐃᓐᓇᖃᖁᓪᓗᒋᑦ ᐃᓄᑦᑎᑑᕈᓐᓇᓯᐊᖁᓪᓗᒋᓪᓗ. ᐃᓅᓱᑦᑐᓂᒃ ᑭᓇᐅᓂᕐᒥᓂᒃ ᓇᑭᒥᐅᔭᐅᓂᕐᒥᓂᓪᓗ ᐅᐱᒋᔭᖃᖁᔨᕗᒍᑦ . ᐱᒻᒪᕆᐅᒻᒥᔪᖅ ᐅᑉᐱᕆᔭᖃᕆᐊᖃᕐᓂᖓ ᐱᒍᓐᓇᑑᓂᕐᒥᓂᒃ. ᐊᑦᓱᕈᕐᓇᑐᕐᑕᓕᐅᒐᓗᐊᖅ ᑭᓯᐊᓂ ᐱᕙᓪᓕᐊᓂᕐᑕᖃᕐᒥᔪᖅ. ᐃᕕᕐᑎᕆᔨᕗᑦ ᑲᔪᓯᔪᑦ ᐅᓄᕐᓯᒋᐊᓪᓛᑎᑦᓯᓱᑎᒃ ᐱᒍᑦᔨᐅᑎᑦᑎᓂᒃ - ᐃᓄᑦᓯᐊᖑᓂᒃᑯᑦ, ᓲᓱᒋᔭᖃᑦᓯᐊᓂᒃᑯᑦ, ᓂᕆᐅᓐᓂᑕᖃᑦᓯᐊᓂᒃᑯᑦ ᐊᔪᐃᓐᓇᓂᒃᑯᓗ. ᐱᓇᓱᖃᑎᒌᖏᓐᓇᓚᖓᕗᒍᑦ ᐃᑲᔪᕐᓯᒪᒍᑎᖃᕐᓗᑕ ᐃᓅᓱᑦᑐᐃᑦ ᐃᑉᐱᒋᔭᖃᖁᓪᓗᒋᑦ ᐊᑦᑕᓇᖕᖏᑐᒦᓐᓂᒥᒃ, ᐃᑲᔪᕐᓯᒪᔭᐅᓂᕐᒥᒃ ᓂᕆᐅᓐᓂᖃᑦᓯᐊᓂᕐᒥᓗ ᓯᕗᓂᕐᒥᓂᒃ. |
ᐅᖃᐅᓯᖃᓕᑐᐊᕋᑦᑕ ᓄᓇᓕᒻᒥ ᐱᒍᑦᔨᐅᑎᓂᒃ, ᐃᓄᓐᓂᒃ ᐅᖃᐅᓯᖃᕐᐳᒍᑦ. ᐱᓇᓱᐊᒐᖃᕐᑐᒍᑦ ᐃᑲᔪᕐᓯᒪᒋᐊᖃᕐᓂᒥᒃ ᓄᓇᕕᒻᒥᐅᓂᒃ ᐃᑲᔪᕐᑕᐅᔭᕆᐊᓕᓐᓂᒃ ᓄᓇᓕᒥᓃᖏᓐᓇᓗᑎᒃ, ᖃᓂᑕᖃᕐᓗᑎᒃ ᐃᓚᒥᓂᒃ, ᐃᓕᕐᕈᓯᕐᒥᓂᒃ ᐃᓄᓐᓂᓗ ᖃᐅᔨᒪᔭᒥᓂᒃ. ᑎᓕᔭᐅᒪᐅᑎᕗᑦ ᑐᑭᓯᓇᑲᓪᓚᓯᐊᑐᐃᓐᓇᑐᖅ: ᓄᓇᕕᒻᒥᐅᑦ ᐃᑲᔪᕐᓗᒋᑦ ᐃᓅᓯᖃᑦᓯᐊᖁᒧᑦ ᐊᓂᕐᕋᓯᒪᓗᑎᒃ ᐱᒍᓐᓇᕕᓕᒫᑦᓯᐊᖓᒍᑦ. ᑕᒡᒐᓂ ᐊᕐᕌᒍᒥ, ᐱᐅᓯᓕᑎᕆᓯᒪᔪᒍᑦ ᐱᓇᓱᐊᖃᑎᒌᓐᓂᖓᓂᒃ ᐊᑦᔨᒌᖕᖏᑐᓂᒃ ᐱᓇᓱᐊᒐᓖᑦ, ᐅᓄᕐᓯᒋᐊᕆᑦᓱᑕᓗ ᐱᒍᑦᔨᐅᑎᓂᒃ ᐊᑐᐃᓐᓇᐅᑎᒍᓐᓇᑕᑦᑎᓂᒃ ᐋᓐᓂᐊᓯᐅᕆᒍᓯᐅᔪᓪᓗ ᑲᒪᒋᔭᐅᒍᓯᖏᓐᓂᒃ ᓲᖑᓰᒋᐊᕐᓱᑕ. ᑭᓯᐊᓂ ᐱᔭᕆᐊᑐᔪᓂᒃ ᓵᖕᖓᓯᖏᓐᓇᑐᒍᑦ. ᓲᑭᐊᖑᒐᓗᐊᖅ ᐊᓂᕐᕋᓯᒪᔪᓂᒃ ᐃᑲᔪᕐᓯᒪᔨᐅᒍᓐᓇᑐᓂᒃ ᐊᑐᐃᓐᓇᖃᕋᑕᖕᖏᑐᒍᑦ ᑕᓯᐅᔭᒥ, ᐊᐅᐸᓗᒻᒥ ᖁᐊᕐᑕᒥᓗ ᐱᓇᓱᑦᑎᓴᖃᑦᓯᐊᖏᓐᓂᒧᑦ ᐃᓪᓗᓴᖃᖕᖏᓂᖓᓄᓪᓗ ᐱᓇᓱᑦᑏᑦ. ᑕᒪᓐᓇ ᐱᒻᒪᕆᐊᓗᒃ ᐃᓕᑕᕆᑦᓯᐊᑕᕗᓪᓗ ᓱᕐᕃᓯᒪᒋᐊᖓ ᐃᓄᓐᓂᒃ ᐃᓚᒋᔭᖏᓐᓂᓗ. ᐱᓇᓱᑦᑎᕗᑦ ᐱᔭᕆᕐᐸᓕᐊᒻᒥᔪᑦ ᕿᒥᕐᕈᓂᕐᒥᒃ ᐊᒥᓱᒐᓚᓐᓂᒃ ᐱᓇᓱᐊᕈᑎᐅᔪᓂᒃ, ᐃᓚᒋᔭᐅᑎᓪᓗᒋᑦ ᐊᓂᕐᕋᓯᒪᖏᓐᓇᑎᑦᓯᒐᓱᐊᕐᓂᒧᑦ ᐃᑲᔪᕐᓯᒪᐅᑏᑦ, ᑕᙯᕐᓯᑫᓐᓇᑎᑦᓯᓃᑦ ᓄᓇᕕᐅᓪᓗ ᓯᓚᑖᓂ ᐊᓂᕐᕋᖃᕐᕈᓐᓇᑎᑦᓯᒍᑎᑦᓭᑦ. ᑲᔪᓯᔪᒍᑦ ᕿᒥᕐᕈᓱᑕ ᐱᐅᓯᓕᑎᕆᒐᓱᐊᕈᑎᑦᓴᓂᒃ ᑐᑭᒧᐊᖃᑎᒌᓐᓂᒥᒃ ᐃᓄᐃᓪᓗ ᐱᑦᔪᔭᐅᑦᓯᐊᕈᑎᑦᓴᖏᓐᓂᒃ ᓇᒻᒪᓈᕐᑕᑐᑎᒍᑦ. ᓄᓇᓕᒻᒥ ᐱᒍᑦᔨᐅᑏᑦ ᓯᕗᕐᖐᓯᒪᒐᓱᐊᕐᓂᒨᓕᖓᒻᒥᔪᑦ ᐃᑲᔪᕐᓯᒪᓂᕐᒨᓕᖓᑦᓱᑎᓪᓗ ᐃᓅᓱᑦᑐᓂᒃ. ᓱᖑᓰᒋᐊᓪᓛᕈᒪᕗᒍᑦ ᐱᓇᓱᐊᖃᑎᖃᕐᓂᑎᓐᓂᒃ ᓄᓇᕕᒻᒥ ᐃᓚᒋᑦ ᐸᐸᑕᐅᕕᖓᓂᒃ ᐊᑐᐃᓐᓇᐅᓕᐅᒥᑎᑦᓯᓗᑕᓗ ᐃᓚᒌᓪᓗᑖᒥᒃ, ᐱᒍᑦᔨᐅᑎᐅᔪᒥᒃ ᐱᐊᕌᕈᕐᓂᒃ SIPPE-ᖑᓂᕋᕐᑕᐅᓱᓂ. ᑐᕋᒐᖃᕐᑐᒍᑦ ᑐᓂᒪᑦᓯᐊᑐᓂᒃ ᐃᓅᓱᑦᑐᓕᕆᔨᖃᕈᒪᑦᓱᑕ ᓄᓇᓕᓐᓂ. ᖃᓄᐃᖕᖏᓯᐊᓂᖅ ᓱᕐᕋᑕᐅᓂᖃᕈᓐᓇᒪᑦ ᐊᒥᓱᓄᑦ: ᐃᓪᓗᖃᕐᓂᒧᑦ, ᓂᕿᖃᑦᓯᐊᕆᐊᖃᕐᓂᒧᑦ, ᐃᓕᓐᓂᐊᓂᕐᒧᑦ, ᐱᓇᓱᒐᖃᕐᓂᒧᑦ, ᐃᓚᒋᔭᓄᑦ ᐃᑲᔪᕐᓯᒪᔭᐅᓂᕐᒧᑦ ᐊᓯᖏᓐᓄᓗ ᐊᒥᓱᓄᑦ ᐃᓅᓯᕐᒨᓕᖓᔪᓄᑦ. ᑌᒣᒻᒪᑦ ᓯᕗᕐᖐᓯᒪᒐᓱᐊᕐᓂᖅ ᖃᓄᐃᖕᖏᓯᐊᕆᐊᖃᕐᓂᒥᓗ ᖃᐅᔨᒪᔭᐅᑎᑦᓯᒐᓱᐊᕐᓂᖅ ᐱᕈᕐᐸᓕᐊᒋᐊᓪᓚᕆᐊᖃᕐᐳᖅ. ᐱᓇᓱᐊᖃᑎᖃᕆᐊᓪᓚᓯᐊᕈᒪᔪᒍᑦ ᓇᐅᓕᒫᓂᒃ ᖃᓄᐃᖕᖏᓯᐊᕐᑎᓯᒐᓱᐊᕐᑎᓂᒃ ᐸᕐᓀᑎᐅᔪᓂᓪᓗ ᐱᓇᓱᐊᕈᑎᑦᓴᔭᓂᒃ ᐱᓇᓱᐊᕐᑐᓂᒃ ᓄᓇᕕᒻᒥ ᐃᓗᓯᓕᕆᔨᒃᑯᓂ. ᐃᓕᑕᕐᓯᒍᒪᒻᒥᔪᖓ ᐱᓇᓱᐊᕐᓂᖓᓂᒃ ᐃᕐᓂᓱᑦᓰᔩᑦ ᑯᑦᔪᐊᒥ. ᑕᒡᒐᓂ ᐊᕐᕌᒍᒥ, 129 ᐊᕐᓀᑦ ᑲᒪᒋᔭᐅᓚᐅᕐᑐᑦ ᐃᕐᓂᓱᑦᓰᔨᓄᑦ ᐅᖓᕙᓕᒫᒥ. ᐊᓕᐊᒍᑎᖃᒻᒪᕆᑦᑐᒍᑦ ᑐᖕᖓᓱᑦᑎᓯᒋᐊᖅ ᒪᕐᕉᓂᒃ ᐃᕐᓂᓱᕐᓰᔨᐅᒋᐅᕐᓴᑑᓐᓂᒃ , ᒪᑯᓚ ᑕᕐᕿᐊᐱᒻᒥᒃ ᑮᓚ-ᔮᔅ ᐋᓇᓇᒃ-ᓚᓲᒥᓪᓗ, ᐱᒋᐅᕐᓴᕆᐊᓯᓚᐅᔫᓐᓂᒃ ᑯᑦᔪᐊᒥ ᒣ 11-ᖑᑎᓪᓗᒍ. ᐃᓚᐅᓂᖓᑦ ᐱᒻᒪᕆᐊᓗᒃ ᐊᓪᓗᕆᐊᕐᓂᐅᓱᓂ ᐱᕙᓪᓕᐊᑎᑦᓯᒋᐊᓪᓚᓂᕐᒧᑦ ᐃᕐᓂᓱᑦᓰᓂᕐᒥᒃ ᓄᓇᕕᒻᒥ. ᐱᓇᓱᐊᖃᑎᖃᕆᐊᓪᓛᓱᑕᓗ Royal Victoria ᐋᓐᓂᐊᕕᖓᓂᒃ ᐱᓇᓱᒐᕐᒦᓗᑎᒃ ᐃᓕᓐᓂᐊᕕᐅᖃᑦᑕᓂᐊᕐᑎᓗᒍ ᐃᕐᓂᓱᑦᓰᔨᐅᒋᐅᕐᓴᑐᓄᑦ ᓄᓇᕕᒻᒥᐅᓄᑦ. ᑕᒪᓐᓇ ᐃᓕᖓᔪᖅ ᐱᕈᕐᓭᓂᕐᒥᒃ ᖃᐅᔨᒪᒍᓯᕐᒥᒃ, ᐊᑑᑎᓯᒪᓂᕐᒥᒃ ᐱᕕᑦᓴᖃᕐᑎᓯᓂᕐᒥᓗ ᐊᓂᕐᕋᓯᒪᓗᑎᒃ ᓄᓇᕕᒻᒥ. |
ᐃᓅᓱᑦᑐᐃᑦ ᓴᐳᒻᒥᔨᖏᓐᓅᓕᖓᔪᓂᒃ ᐅᖄᓯᒋᕗᖓ. ᐊᕐᕌᒎᓚᐅᕐᑐᖅ ᐱᔭᕋᓕᓇᕐᑐᒪᕆᐅᓚᐅᕐᑐᖅ ᐱᓇᓱᑦᑎᑎᓐᓄᑦ. ᐊᒥᓱᕋᑕᕐᓂᒃ ᖃᓄᐃᒍᑎᖃᕐᓱᑎᒃ ᓄᕐᖃᖓᔨᐊᖃᓚᐅᕐᑐᒍᑦ ᐱᓇᓱᑦᑎᓂᓪᓗ ᓄᕐᖃᑲᑦᑕᔨᐊᖃᕐᓱᑕ. ᑕᒡᒐᓂ ᐊᕐᕌᒍᒥ ᓄᓪᓚᖓᓂᕐᓴᐅᓕᕐᑑᒐᓗᐊᖅ ᑕᒪᓐᓇ. ᐱᔭᕆᕐᓯᒪᓕᕐᓱᑕ ᐊᐅᓚᑦᔭᕆᐊᕐᓂᒧᑦ ᐸᕐᓇᓯᒪᐅᑎᒥᒃ. ᓄᑖᓂᒃ ᑲᒪᔨᐅᑦᓱᑎᒃ ᐊᐅᓚᑦᓯᔨᓂᒃ ᕿᑦᑌᖓᑎᑦᓯᔨᖃᓕᕐᓱᑕ ᓄᑖᓂᓪᓗ ᐃᓱᒪᒍᓯᐅᔪᓂᒃ ᓄᐃᑎᕆᔨᖃᓕᕐᓱᑕ. ᑮᓇᐅᔭᕐᑕᓰᓯᒪᓕᕐᓱᑕᓗ ᐃᓕᓐᓂᐊᓂᐅᔪᓂᒃ ᐃᑲᔪᕐᓯᒪᒍᒪᓪᓗᒋᑦ ᐱᓇᓱᑦᑏᑦ ᓱᖑᓯᐅᒥᖁᓪᓗᒋᑦ ᐱᓇᓱᐊᕐᑕᒥᓂ. ᐃᓚᒋᐊᕆᓯᒪᓕᕐᓱᑕᓗ ᓄᑖᓂᒃ ᐱᓇᓱᐊᕈᑎᑎᒍᑦ ᐃᑲᔪᕐᓯᔨᐅᔪᓂᒃ ᐱᓇᓱᑦᑏᑦ ᐱᓇᓱᐊᕈᓐᓇᓯᑦᓯᐊᓕᐅᒥᖁᒧᑦ ᐃᑲᔪᕐᓯᒪᑦᓯᐊᓗᑎᓪᓗ ᐱᐊᕋᕐᓂᒃ ᐃᓚᒌᓂᓪᓗ. ᑕᒪᒃᑯᐊ ᐊᓪᓗᕆᐊᕐᓂᓯᐊᕌᓗᐃᑦ ᓯᕗᓂᕐᒧᑦ. ᑭᓯᐊᓂ ᐱᒻᒪᕆᕋᑕᕐᓂᒃ ᑭᖕᖒᒪᒋᔭᖃᖏᓐᓇᑐᒍᑦ. ᓄᓪᓚᖓᑦᓯᐊᓂᖃᓕᕋᓗᐊᕐᑎᓗᒍ, ᐱᓇᓱᑦᑏᑖᕆᐊᓪᓚᕆᐊᖃᖏᓐᓇᑐᒍᑦ ᓵᖕᖓᔭᐅᒍᓐᓇᖁᓪᓗᒋᑦ ᑭᖕᖑᒪᒋᔭᖏᑦ ᐱᐊᕃᑦ ᐃᓚᒌᓪᓗ, ᐱᖁᔭᕐᓂᓗ ᓲᓱᒋᔭᖃᑦᓯᐊᕆᐊᖃᕐᓃᑦ ᐱᒍᑦᔨᓂᖃᑦᓯᐊᕈᒪᒍᑦᑕᓗ ᐱᐊᕋᕐᓂᒃ ᓴᐳᒻᒥᔭᐅᒋᐊᓕᓐᓂᒃ. ᖃᐅᔨᔭᐅᑎᑕᐅᔪᖃᑐᐊᕐᒪᑦ ᓱᔪᖃᓲᖑᕙ? ᑐᑭᓯᓇᕐᑎᒍᓐᓇᑕᕋ ᓱᔪᖃᓲᖑᒻᒪᖔᑦ ᐱᐊᕋᖅ ᖃᐅᔨᔭᐅᑎᑕᐅᑐᐊᕐᒪᑦ ᐃᓅᓱᑦᑐᐃᑦ ᓴᐳᒻᒥᔨᖏᓐᓄᑦ. ᓯᕗᓪᓕᒥ, ᖃᓄᐃᓕᓂᕕᓂᐅᔪᖅ ᕿᒥᕐᕈᔭᐅᓲᖅ. ᐱᐊᕋᐅᑉ ᐊᑦᑕᓇᕐᑐᒦᒋᐊᖃᖕᖏᓂᖓ ᐱᕙᓪᓕᐊᓯᐊᕆᐊᖃᕐᓂᖓᓗ ᓯᕗᓪᓕᐸᐅᑦᔭᐅᓲᖅ. ᓴᐳᑦᔨᓯᒪᒍᑏᑦ ᐊᑑᑎᔭᐅᑦᓴᐅᑎᒋᐊᐱᒍᓐᓇᑐᖅ ᕆᐊᖃᑐᐊᕈᑎᒃ. ᕿᒥᕐᕈᓂᖃᕇᑐᐊᕐᒪᑦ, ᐊᑦᔨᒌᖕᖏᑐᐃᑦ ᐊᑑᑎᔭᐅᒍᓐᓇᓲᑦ. ᐱᐊᕋᖅ ᐊᑦᑕᓇᕐᑐᒦᖕᖏᐸᑦ ᐱᕙᓪᓕᐊᓯᕐᐊᓂᖃᕐᐸᑦ, ᑲᒪᒋᔭᐅᓂᖓ ᑲᔪᓯᒋᐊᑐᓲᖑᖕᖏᑐᖅ. ᐱᐊᕋᕐᓕ ᐊᑦᑕᓇᕐᑐᒦᑉᐸᑦ, ᓴᐳᒻᒥᔩᑦ ᑐᑭᑖᕆᐊᖃᓯᓲᑦ ᖃᓄᖅ ᓴᐳᑎᓯᒪᔭᐅᒍᑎᖃᓚᖓᒻᒪᖔᑦ. ᐊᒥᓱᐃᓂ, ᑕᒪᓐᓇ ᐊᑑᑎᔭᐅᒍᓐᓇᓲᖅ ᐊᖏᖃᑎᒌᒍᑎᐅᓂᕋᕐᑕᑎᒍᑦ. ᐃᓚᒋᔭᖏᑦ ᐱᐊᕋᐅᑉ ᓴᐳᒻᒥᔩᓪᓗ ᐊᖏᖃᑎᒌᑐᐊᕐᒪᑕ ᖃᓄᐃᓕᖓᔪᒥᒃ ᐱᐊᕋᖅ ᐊᑦᑕᓇᖕᖏᑐᒦᒍᑎᖃᕐᓂᐊᒪᖔᑦ. ᐊᓯᖏᓐᓂᓕ, ᑲᒪᒋᔭᐅᒍᓯᖓ ᐃᕐᖃᑐᐃᕕᒃᑰᕈᑕᐅᒋᐊᖃᓲᖅ. ᐱᐅᔪᓂᒃ ᐊᓯᑦᔨᒋᐊᕈᑎᐅᓯᒪᔪᓂᒃ ᑕᑯᓯᒪᓕᕐᑐᒍᑦ ᑕᒪᑐᒨᓇ. 50%-ᒧᑦ ᐅᓄᕐᓯᒋᐊᕐᓯᒪᓕᕐᑐᐃᑦ ᐊᖏᖃᑎᒌᒍᑎᒃᑰᑐᐃᑦ, ᑕᒪᓐᓇᓗ ᑐᑭᖃᕐᓱᓂ ᐊᒥᓲᓂᕐᓭᑦ ᑲᒪᒋᔭᐅᒍᓐᓇᓯᓲᖑᓕᕐᓂᖓᓂᒃ ᐃᕐᖃᑐᐃᕕᒃᑰᖏᑦᓱᑎᒃ. ᑕᑯᓯᒪᓕᕐᑐᒍᑦ ᐃᑭᓐᓂᓵᐲᑦ ᐃᕐᖃᑐᐃᕕᒃᑰᓱᖑᓕᕐᓂᖓᓂᒃ ᐊᓪᓚᑕᐅᒪᒍᓯᖏᓪᓗ ᐱᐊᕃᑦ ᐅᒃᑯᐊᑕᓂᕐᓴᐅᕙᓕᕐᓱᑎᒃ. ᓯᕗᓂᖃᓪᓚᕆᒻᒪᑕ ᓴᐳᒻᒥᔩᑦ ᐱᐊᕋᕐᓂᒃ ᐃᓚᒥᓃᖏᓐᓇᑎᑦᓯᓂᕐᒥᒃ ᐊᑦᑕᓇᕐᑐᑕᖃᖕᖏᑐᐊᕐᒪᑦ. ᑭᓯᐊᓂ ᐃᓚᖓᓂ, ᐱᐊᕋᖅ ᓅᑕᐅᒪᑫᓐᓇᕆᐊᖃᓲᖅ. ᑌᒣᓕᑐᐊᕐᒪᑦ, ᓯᕗᓪᓕᐹᖅ ᐊᑑᑎᔭᐅᒐᓱᐊᓲᖅ ᐱᐊᕋᖅ ᐱᒻᒪᕆᖁᑎᒋᔭᒥᓃᑦᑎᒐᓱᐊᕐᓱᒍ. ᐊᓈᓇᑦᓯᐊᑰᑉᐸᑕ, ᐊᓯᐊᖑᑉᐸᑦ ᐃᓚᒋᔭᖓ ᐅᕝᕙᓗᓐᓃᑦ ᐱᒻᒪᕆᖁᑎᒋᔭᖓ. ᐊᑐᐃᓐᓇᐅᓯᐊᕐᓂᖓᑦ ᑲᒪᒍᓐᓇᓯᐊᕐᓂᕆᔭᖓᓗ ᐱᐊᕋᕐᒥᒃ ᕿᒥᕐᕈᔭᐅᓂᖃᑦᓯᐊᓲᖅ. ᑌᒣᕐᖃᔭᖕᖏᐸᑦ ᐱᐊᕋᕐᒧᓗ ᓈᒻᒪᒍᓇᐅᖕᖏᐸᑦ, ᐊᓯᐊᓄᑦ ᓅᑕᐅᒋᐊᖃᓯᓲᖅ ᑭᖕᖑᒪᒋᔭᖏᑦ ᐃᑉᐱᒋᓗᒋᑦ. ᐱᐊᕋᖅ ᐊᓂᕐᕋᒥ ᓯᓚᑖᓄᕐᑕᐅᐸᑦ, ᒪᓕᒐᕐᑕᖃᕐᒥᔪᖅ ᖃᓄᓪᓗᐊᑎᒌᒃ ᓄᑕᐅᕕᒋᓯᒪᔭᒥᓃᓚᖓᒻᒪᖔᑦ. ᑖᒃᑯᐊ ᑌᔭᐅᒍᓯᓖᑦ ᓄᑕᐅᒪᓂᖓᑕ ᐊᑯᓃᕐᑎᒋᓚᖓᔭᖓᓂᒃ. ᖃᓄᓪᓗᐊᑎᒌᒃ ᐊᑯᓃᕐᓂᐊᒪᖔᑦ ᑐᑭᑕᕐᑕᐅᓂᖓ ᐃᓕᖓᓲᖅ ᐱᐊᕋᐅᑉ ᐅᑭᐅᖏᓐᓄᑦ. ᑐᑭᑖᕈᑕᐅᓂᖓ ᐃᓕᖓᓂᖃᑦᓯᐊᑎᑕᐅᒐᓱᐊᓲᖅ ᐱᐊᕋᐅᑉ ᐊᑦᑕᓇᕐᑐᒦᒋᐊᖃᖕᖏᓂᖓᓄᑦ, ᖃᓄᐃᖕᖏᓯᐊᕆᐊᖃᕐᓂᖓᓄ, ᐱᕙᓪᓕᐊᓯᐊᕆᐊᖃᕐᓂᖓᓄᑦ ᐊᑯᓂᕐᑐᒨᓕᖓᔪᓂᓪᓗ ᑭᖕᖑᒪᑦᓯᒍᑎᖃᕐᓂᖓᓄᑦ. ᑐᓴᕐᑕᐅᖁᔨᓪᓚᕆᒃᑯᖓ ᐅᖃᐅᓯᕆᔭᕋᓂᒃ ᐅᓪᓗᒥ. ᑭᖕᖒᒪᑦᓯᓚᕆᒐᑕ ᐃᓄᑐᐃᓐᓇᓂᒃ ᑲᒪᒐᔭᕐᑐᓂᒃ ᐃᓄᐊᐱᓐᓂᒃ. ᐱᐊᕃᑦ ᐱᑐᑦᓯᒣᓐᓇᕆᐊᖃᕐᒪᑕ ᐃᓕᕐᕈᓯᕐᒥᓄᑦ, ᐅᖃᐅᓯᕐᒥᓄᑦ, ᐃᓚᒥᓄᑦ, ᓄᓇᓕᒻᒥᓄᑦ ᑭᓇᐅᓂᕐᒥᓄᓪᓗ. ᐊᓂᕐᕋᐅᓚᐅᕐᑐᑐᑦ ᐱᒻᒪᕆᐊᓗᒃᑯᑦ ᐃᑲᔪᕐᓯᒪᓪᓚᕆᒍᓐᓇᑐᐃᑦ ᑕᒪᓐᓇ ᐊᑑᑎᓂᖃᑦᓯᐊᖁᓪᓗᒍ. 2025-2026-ᖑᑎᓪᓗᒍ, 284 ᐱᐊᕃᑦ ᓅᑕᐅᕕᖃᕐᓯᒪᔪᑦ ᐊᓂᕐᕋᐅᓚᐅᕐᑐᑐᓄᑦ ᐱᒻᒪᕆᖁᑎᒋᔭᒥᓄᓪᓘᓃ. ᑖᒃᑯᓇᓂ 187 ᐊᓂᕐᕋᐅᓚᐅᕐᑐᓲᓄᕐᑕᕕᓃᑦ. 97 ᐱᒻᒪᕆᖁᑎᒋᔭᖓᓅᕐᑕᐅᑎᓪᓗᒍ, ᐅᑦᑐᑎᒋᓗᒋᑦ ᐊᓈᓇᑦᓯᐊᖑᔪᑦ, ᐃᓚᒋᔭᖓ ᐱᒻᒪᕆᖁᑎᒋᔭᖓᓗᓐᓃᑦ ᐃᓅᓯᕐᒥᓂ. 53% ᐃᓄᓐᓄᑦ ᐊᓂᕐᕋᐅᓚᐅᕐᑐᑐᓅᕐᑕᕕᓃᑦ 47%-ᓗ ᐃᓄᑐᐃᓐᓇᐅᖏᑦᑐᓅᕐᑕᐅᑎᓪᓗᒋᑦ. ᑭᖕᖒᒪᑦᓯᓚᕆᖏᓐᓇᖁᒍᑦ ᐃᓄᓐᓂᒃ ᐊᓂᕐᕋᐅᓚᐅᕐᑐᕈᓐᓇᑐᓂᒃ ᐱᓗᐊᕐᑐᒥᒃ ᑕᒫᓂ ᐅᖓᕙᒥ. ᐱᐊᕋᕐᓂ ᖃᓪᓗᓈᑦ ᓄᓇᖓᓐᓅᑕᕕᓂᕐᓂ, 34 ᑯᑦᔪᐊᒥᐅᑦ 17-ᓗ ᑲᖏᕐᓱᒥᐅᑦ. ᑖᒃᑯᐊ ᑭᓯᑦᓯᒍᑏᑦ ᐅᕙᑦᑎᓂᒃ ᐃᕐᙯᑎᑦᓯᒍᑎᐅᔪᑦ ᐱᒻᒪᕆᐊᓗᒻᒥᒃ. ᐱᐊᕋᖅ ᐊᓂᕐᕋᒥᓂᑦ ᐊᓂᒋᐊᖃᕐᑎᑕᐅᔪᖅ ᐊᓯᐅᔨᒋᐊᖃᖕᖏᑑᒐᓗᐊᖅ ᐱᑐᑦᓯᒪᓂᕐᒥᓂᒃ ᐃᓕᕐᕈᓯᕐᒥᓄᑦ ᓄᓇᓕᒥᓄᓪᓗ. ᐊᓂᕐᕋᐅᓚᐅᕐᑐᓂᖅ ᐱᔭᕆᐊᑭᑦᑐᐊᐱᐅᖏᓐᓇᓲᖑᖕᖏᑐᖅ. ᑭᓯᐊᓂ ᐱᒻᒪᕆᐊᓘᒍᓐᓇᑐᖅ ᐱᐊᕋᐅᑉ ᐃᓅᓯᖓᓂ. ᐊᓂᕐᕋᖃᕐᑎᓯᓂᐅᒐᒥ ᐊᑦᑕᓇᖕᖏᑐᒥᒃ, ᐃᓂᓪᓚᖓᑦᓯᐊᑐᒥᒃ, ᑲᒪᑦᓯᐊᑐᒥᒃ ᐱᑐᑦᓯᒪᖃᑎᖃᕐᓂᒥᓗ ᐃᓱᐃᓪᓘᓇᕐᑐᑯᕐᑐᒥᒃ. ᑐᑭᖃᕐᒥᔪᖅ ᐃᑲᔪᕐᓯᓂᕐᒥᒃ ᐱᐊᕋᕐᓂᒃ ᐱᑐᑦᓯᒣᓐᓇᑎᑦᓯᓂᕐᒥᒃ ᑭᓇᐅᓂᕐᒥᓄᑦ. ᑲᔪᖏᕐᓭᕗᒍᑦ ᐃᓄᓐᓂᒃ ᐅᒃᑯᐃᓯᒍᓐᓇᑐᓂᒃ ᐊᓂᕐᕋᒥᓂᒃ ᐆᒻᒪᑎᒥᓂᓪᓗ ᖃᐅᔨᒪᒐᓱᐊᖃᑦᑕᖁᓪᓗᒋᑦ ᐊᓂᕐᕋᐅᓚᐅᕐᑐᒍᓐᓇᓂᕐᒥᒃ. ᐊᑐᓂ ᐱᐊᕋᖅ ᐃᑉᐱᓂᐊᕆᐊᖃᕐᐳᖅ ᐊᑦᑕᓇᖕᖏᑐᒦᓐᓂᒥᒃ, ᓇᓪᓕᒋᔭᐅᓂᕐᒥᒃ ᐱᑐᑦᓯᒪᕕᐅᕐᓂᒥᓪᓗ. |
ᐃᓱᐊ
ᑖᒃᑯᐊ ᓀᓪᓕᑎᕐᓯᒪᔪᑦ ᑐᑭᓯᔭᐅᓕᐅᒥᖁᔨᓇᕐᑐᑦ ᐱᒻᒪᕆᓐᓂᒃ ᐱᓇᓱᐊᕐᓯᒪᔭᖏᓐᓂᒃ ᑐᓚᑦᑕᕕᐅᑉ ᐱᕙᓪᓖᒐᓱᐊᕐᓱᓂ ᐃᓄᓐᓂᒃ.
ᑐᑭᓯᓇᕐᑎᓯᓕᐅᒥᑦᓱᑎᓪᓗ ᓵᖕᖓᔭᐅᒋᐊᖃᕐᐸᑐᓂᒃ ᐱᓇᓱᑦᑎᑎᓐᓄᑦ ᖃᐅᑕᒫᑦ. ᐱᔭᑦᓴᓕᒻᒪᕆᐅᖏᓐᓇᖁᖅ.
ᑐᓚᑦᑕᕕᐅᑉ ᐋᓐᓂᐊᕕᖓ ᐊᒥᓱᓂᒃ ᓵᖕᖓᓯᒋᐊᖃᕐᐸᐳᖅ, ᑭᓯᐊᓂ ᑐᓂᒪᑦᓯᐊᑐᐊᓗᓐᓂᒃ ᐱᓇᓱᑦᑎᖃᕐᑐᖅ. ᐱᓇᓱᑦᑎᕗᑦ ᐱᓇᓱᐊᒻᒪᕆᑉᐸᑐᑦ ᖃᐅᑕᒫᑦ ᐃᑲᔪᕐᓯᒪᑦᓱᑎᒃ ᐃᓄᑐᖃᕐᓂᒃ, ᐃᓚᒌᓂᒃ, ᐃᓅᓱᑦᑐᓂᒃ ᐃᓄᓐᓂᓗ ᐊᑦᔨᒌᖕᖏᑐᓂᒃ ᑭᖕᖑᒪᑦᓯᒍᑎᓕᓐᓂᒃ. ᖃᐅᔨᒪᔪᒍᑦ ᐋᕐᕿᕈᑎᑦᓴᐅᔪᑦ ᐊᑯᓃᕈᓐᓇᓱᖑᒋᐊᖏᑦ. ᖃᐅᔨᒪᔪᒍᑦ ᐃᓚᒌᑦ ᐅᑕᕐᕿᑐᑦ. ᖃᐅᔨᒪᑦᓱᑕᓗ ᓄᓇᓕᕗᑦ ᐊᑐᐃᓐᓇᖃᑦᓯᐊᓕᐅᒥᒋᐊᖃᕐᓂᖓᓂᒃ ᐊᑦᑕᓇᖕᖏᑐᓂᒃ, ᐃᓕᕐᕈᓯᕐᒨᓕᖓᔪᓂᒃ ᑲᒪᒋᔭᐅᑦᓯᐊᕈᑎᓂᒃ.
ᐱᓇᓱᐊᕐᕕᐅᓱᑕ, ᑲᔪᓯᕗᒍᑦ ᓂᐱᖃᕈᑎᖃᒃᓂᒥᒃ ᐱᓇᓱᒍᑎᑦᓴᓂᒃ, ᐃᓪᓗᒪᕆᑦᓴᓂᒃ, ᐊᓂᕐᕋᓴᕐᓂᒃ, ᐱᓇᓱᑦᑎᖃᕆᐊᖃᕐᓂᒥᒃ ᐱᒍᔨᐅᑎᖃᕆᐊᖃᕐᓂᒥᓗ ᓄᓇᕕᒻᒥᐅᑦ ᑭᖕᖑᒪᒋᔭᖏᓐᓂᒃ. ᑲᒪᒋᔭᖃᕐᐳᒍᑦ ᐅᓪᓗᒥᒨᓕᖓᑐᐃᓐᓇᖏᑦᑐᓂᒃ. ᐊᑐᐃᓐᓇᕈᕐᑎᕆᕗᒍᑦ ᖃᐅᑉᐸᐅᓛᕐᑐᒥᒃ.
ᐱᒻᒪᕆᐅᓂᕐᐹᖅ, ᐱᓇᓱᐊᕐᓂᕗᑦ ᑲᔪᓯᑦᓯᐊᑎᒐᓱᐊᕐᓱᒍ ᐃᓄᐃᑦ ᑲᒪᒋᔭᐅᓂᖃᑦᓯᐊᖁᓪᓗᒋᑦ ᐃᓅᒍᓯᖃᑦᓯᐊᑎᓗᒋᑦ, ᓲᓱᒋᑦᓯᐊᓗᒋᑦ, ᐃᓚᑦᔪᓗᒋᑦ ᐊᓂᕐᕋᒥᓄᓪᓗ ᖃᓂᑦᑑᖏᓐᓇᑎᒐᓱᐊᕐᓗᒋᑦ. ᑕᒪᓐᓇᑕᒐ ᐊᖏᕈᑎᒋᓯᒪᔭᕗᑦ ᓄᓇᓕᑦᑎᓄᑦ.
ᐱᐅᓯᓕᑎᕆᓂᖅ ᐋᓐᓂᐊᓂᓕᕆᓂᕐᒥ ᐃᓄᓕᕆᓂᕐᒥᓗ ᐱᖑᑦᔨᐅᑎᓂᒃ ᐃᓪᓗᓅᓕᖓᑐᐃᓐᓇᖏᓪᓚᖅ, ᐱᓇᓲᑎᓄᓕᖓᑐᐃᓐᓇᕋᓂ ᑭᓯᑦᓯᒍᑎᑎᒍᑐᐃᓐᓇᕋᓂᓗᓐᓃᑦ. ᓇᓛᓐᓂᐅᕗᓪᓕ ᐃᓄᓐᓂᒃ.
ᐃᙯᑎᑦᓯᒋᐊᓪᓚᕈᒪᕗᖓ ᑐᓚᑦᑕᕕᒻᒧᑦ ᓈᓚᑦᑕᐅᒐᑦᓯ. ᐅᓐᓂᓘᑎᓕᕆᔨ, ᓕᓯ ᔪᐊᓇᓯ, ᐊᑐᐃᓐᓇᐅᓯᐊᕐᑐᖅ ᐃᓱᒫᓘᑎᖃᕈᑦᓯ, ᐅᖃᐅᓯᑦᓴᖃᕐᕕᖃᕈᑦᓯ ᐅᓐᓂᓗᒍᑎᑦᓴᖃᕈᑦᓯᓗ ᐱᒍᑦᔨᔭᐅᒍᑎᑎᓐᓂᒃ. ᖃᐅᔨᒋᐊᕈᓐᓇᑕᓯ ᐱᓇᓱᕝᕕᖓᓂ, ᐃᓪᓗᖅ 5213 ᑯᑦᔪᐊᒥ. ᐅᖄᓚᕕᒋᒍᓐᓇᓱᒍᓗ ᐅᕙᓂ 819-964-2905 ᓯᕙᓂᖓ 2509.
ᓇᐅᓕᒫᓄᑦ ᖃᐅᔨᒪᔭᐅᔪᑦᓴᔭᐅᖕᖏᑐᓂᒃ ᐱᒍᑦᔨᓂᐅᔪᖅ. ᐃᓱᐃᓪᓘᓚᖀᑎᑦᓯᓂᒃᑰᖏᑦᑐᖅ ᑲᑉᐱᐊᓱᓚᕿᑎᑦᓯᓂᒃᑰᕋᓂᓗ. ᓕᓯ ᔪᐊᓇᓯ ᑌᑲᓃᑦᑐᖅ ᐃᑲᔪᕐᓯᓚᖓᓗᓂ ᓴᐳᒻᒥᔨᐅᓂᕐᒥᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᐱᐅᓯᓕᑎᕆᓂᕐᒥᒃ ᑲᒪᒋᔭᐅᒍᓯᕐᓂᒃ ᐃᓱᒫᓘᑎᐅᔪᓂᓪᓗ ᑐᓴᕐᑕᐅᑎᑦᓯᓂᕐᒥᒃ ᓵᖕᖓᔭᐅᑎᑦᓯᓂᕐᒥᓗ.
ᑲᔪᖏᕐᓭᒍᒪᕗᖓ ᓇᐅᓕᒫᑦᓯᐊᓂᒃ ᓂᓪᓕᖃᑦᑕᖁᔨᑦᓱᖓ ᐃᓱᒫᓘᑎᖃᕈᑎᒃ ᑲᒪᒋᔭᐅᒍᓯᕐᒥᓂᒃ ᑲᒪᒋᔭᐅᒍᓯᖏᓐᓂᓘᓐᓃᑦ ᐃᓚᒋᔭᒥ. ᓂᐲᑦ ᐱᒻᒪᕆᐅᕗᖅ ᐊᑑᑎᖃᕐᓱᓂ. ᖃᐅᔨᔭᐅᑎᑦᓯᓂᖅ ᐃᓱᒫᓗᑎᒋᔭᕐᒥᒃ ᐃᑲᔪᕐᓯᕗᖅ ᑐᓚᑦᑕᕕᒃ ᑐᑭᓯᓕᐅᒥᓂᐊᕐᒪᑦ ᓱᓀᑦ ᐱᐅᓯᐅᒥᒋᐊᖃᕐᒪᖔᑕ.
ᓴᐳᒻᒥᓂᖅ ᕿᑐᕐᖓᑎᓐᓂᒃ, ᐃᓄᑐᖃᑦᑎᓂᒃ ᐊᑦᑕᓇᕐᑐᒦᑐᐃᓐᓇᕆᐊᓕᓐᓂᓗ ᐃᓄᒻᒪᕆᓐᓂᒃ ᐱᒻᒪᕆᓪᓚᕆᐅᕗᖅ. ᐃᓱᒫᓘᑎᒋᔭᐅᔪᑦ ᑲᒪᒃᑭᓗᑦᑕᐅᓂᕐᒨᓕᖓᔪᑦ ᐱᒻᒪᕆᐅᑎᓪᓚᕆᑦᑕᕗᑦ ᑲᔪᓯᓚᖓᑦᓱᑕᓗ ᐱᓇᓱᐊᖃᑎᖃᕐᓂᒥᒃ ᓄᓇᕕᒻᒥ ᐱᓇᓱᐊᖃᑎᒋᕙᑦᑕᑎᓐᓂᒃ ᓱᖑᓯᐅᒥᑎᒐᓱᐊᕐᓗᒋᑦ ᓴᐳᑦᔨᓯᒪᒍᑏᑦ, ᖃᐅᔨᒪᑎᑦᓯᒐᓱᐊᕈᑏᑦ ᐃᑲᔪᕐᓯᒪᒍᑎᐅᔪᓪᓗ.
ᐊᓐᓂᐊᓯᐅᕆᓂᕐᒥ ᑲᒪᒍᓯᖅ ᐃᓗᓐᓀᑕ ᑲᒪᒋᔭᑦᓴᔭᖓ. ᐱᒍᑦᔨᐅᑎᑦᑎᓂᒃ ᐱᐅᓯᐅᒥᑎᑦᓯᖃᔭᖕᖏᓚᒍᑦ ᓈᓚᖕᖏᓗᑕ ᐃᓄᓐᓂᒃ ᐱᑦᔪᔨᔭᑦᑎᓂᒃ.
ᓇᑯᕐᒦᒃ ᐱᓇᓱᑦᑎᕗᑦ, ᐱᓇᓱᐊᖃᑎᕗᑦ, ᓄᓇᓕᒻᒥᐅᖁᑎᕗᑦ ᓄᓇᕕᒻᒥᐅᓕᒫᓪᓗ ᐅᑉᐱᕆᔭᖃᑦᓯᐊᓂᑦᓯᓄᑦ ᐃᑲᔪᕐᓯᒪᓂᑦᓯᓄᓪᓗ.
ᐃᒻᒥᓂᒃ ᑲᒪᒋᔭᖃᑦᓯᐊᕆᑦᓯ, ᐊᓯᑎᓐᓂᒃ ᑲᒪᒋᔭᖃᑦᓯᐊᓗᓯ ᐅᓪᓗᓯᐅᑦᓯᐊᓚᖓᕗᓯᓗ.
ᓇᑯᕐᒦᒃ.
