ᐊᕐᕌᒍᑕᒫᑦ ᐃᓘᓐᓈᒍᑦ ᑲᑎᒪᓂᒻᒪᕆᒃ

1. ᑐᓚᑦᑕᕕᒥ ᐋᓐᓂᐊᓯᐅᕐᑏᑦ ᐱᒍᑦᔨᕕᖓ ᐱᔪᕆᐅᑎᖃᕐᐳᖅ ᑐᖕᖓᓱᑦᑎᓯᒋᐊᖅ ᒪᕐᕉᓂᒃ ᐃᓄᑐᐃᓐᓈᓂ ᐃᓕᓐᓂᐊᑑᓐᓂᒃ ᐋᓐᓂᐊᓂᓕᕆᓂᕐᒨᓕᖓᔪᓂᒃ, ᐱᓇᓱᐊᕐᑎᑕᐅᓚᖓᔫᓐᓂᒃ ᐅᐱᕐᖔᖑᑎᓪᓗᒍ:

• ᑐᓚᑦᑕᕕᒃ ᑐᖕᖓᓱᑦᑎᓯᕗᖅ ᓯᕗᓪᓕᐹᑦᓯᐊᒥᒃ ᓄᓇᕕᒻᒥ ᐃᓕᓐᓂᐊᔨᐊᕗᓐᓂᒃ ᐋᓐᓂᐊᓯᐅᕐᑎᐅᓂᕐᒥᒃ ᐱᓇᓱᐊᓚᖓᔪᒥᒃ ᐅᐱᕐᖔᒥ.
• ᑕᓚᑦᑕᕕᒃ ᑐᖕᖓᓱᑦᑎᓯᒋᕗᖅ ᐃᓄᑐᐃᓐᓇᒥᒃ ᐃᓕᓐᓂᐊᑎᒥᒃ ᑯᑦᔪᐊᒥᐅᔭᐅᑦᓱᓂ ᐅᐱᕐᖔᒥ ᐱᓇᓱᐊᓚᖓᔪᒥᒃ ᑕᕐᕋᑐᐃᕕᒻᒥ. ᖁᕕᐊᓲᑎᒋᔭᕗᑦ ᐅᑎᕐᑐᓯᐊᖑᒻᒥᒪᑦ ᐱᓇᓱᐊᓚᖓᓕᕐᒥᓱᓂ ᑕᒡᒐᓂ ᐅᐱᕐᖔᒥ. ᑖᓐᓇ ᐊᕐᓇᖅ ᐃᓕᓐᓂᐊᑐᖅ ᐳᕐᑐᓂᕐᓴᕆᐊᓪᓚᒥᒃ Dawson ᐃᓕᓐᓂᐊᕕᖓᓂ ᑕᕐᕋᑐᐃᕕᐅᔪᓂ ᐱᓇᓱᐊᕐᑐᖅ. 2017-ᖑᑎᓪᓗᒍ ᑐᓚᑦᑕᕕᒻᒥ ᐱᓇᓱᐊᕆᐊᓯᓚᐅᕐᓯᒪᔪᖅ ᐊᑦᔨᒌᖕᖏᑐᓂ ᐱᓇᓱᒐᕐᓂ, ᑕᒡᒐᓂ ᐅᐱᕐᖔᒥ ᐅᑎᕐᒥᔪᖅ ᐱᓇᓱᐊᓚᖓᓕᕐᒥᓱᓂ ᑕᕐᕋᑕᐃᒍᑎᐅᒻᒥᔪᒥ. ᐊᕐᕌᓂ ᐅᐱᒋᔭᐅᒻᒪᕆᓚᐅᔪᖅ ᐃᓚᐅᒋᐊᖓ ᐱᓇᓱᐊᕐᑎᐅᔪᓄᑦ.

ᐱᓇᓱᑦᑎᓯᓂᖅ ᐃᓕᓐᓂᐊᑎᓂᒃ ᐱᕕᖃᕈᓐᓇᑐᖅ ᑖᓐᓇ ᐃᓕᓐᓂᐊᑎ ᒪᕐᕉᓂᒃ ᐊᕐᕌᒎᓐᓂᒃ ᐱᔭᕇᕐᐸᑭᓯᐊᓂ ᐃᓕᓐᓂᐊᑕᒥᓂᒃ.

ᐱᔪᕆᐅᑎᒋᒻᒪᕆᑦᑕᕗᒃ ᑖᒃᑯᐊ ᒪᕐᕉᒃ ᐃᓕᓐᓂᐊᑏᒃ ᑐᑭᑖᕐᓯᒪᒻᒪᓂᒃ ᐃᑲᔪᓚᖓᒋᐊᖅ ᓄᓇᓕᒻᒥᒃ ᐱᓇᓱᓪᓗᑎᒃ ᑐᓚᑦᑕᕕᒻᒥ.

2. ᑐᓚᑦᑕᕕᒃ ᐃᓱᒫᓗᑎᖃᕐᐳᖅ ᐃᓄᑐᖃᕈᕐᐸᓕᐊᓪᓚᕆᓐᓂᖓᓂᒃ ᐃᓄᐃᑦ ᓄᓇᕕᒻᒥ ᖃᓄᕐᓗ ᑕᒪᓐᓇ ᓱᕐᕃᓂᖃᓚᖓᒻᒪᖔᑦ ᐋᓐᓂᐊᓂᓕᕆᓂᕐᒥ ᐃᓄᓕᕆᓂᕐᒥᓗ ᐱᒍᑦᔨᐅᑎᐅᔪᓂᒃ.

ᓄᓇᕕᐅᑉ ᐃᓄᖏᑦ ᐱᓗᐊᕐᑐᒥᒃ ᐅᖓᕙᒥ, ᐊᒥᓱᖕᖑᐸᓪᓕᐊᖏᓐᓇᓕᒫᕐᑐᑦ.

2001 2024-ᓗ ᐊᑯᓐᓂᖓᓂ, ᐅᖓᕙᐅᑉ ᐃᓄᖏᑦ ᐅᓄᕐᓯᒋᐊᕐᓯᒪᔪᑦ 69%-ᒧᑦ. ᑕᒪᓐᓇ ᐅᓄᒋᐊᑦᓯᐸᓪᓕᐊᓂᖅ ᐃᓚᖃᕐᒥᔪᖅ ᐃᓄᑐᖃᕈᒃᐸᓕᐊᓂᖓᓂᒃ ᐃᓄᐃᑦ, ᐋᓐᓂᐊᓯᐅᕆᒍᓰᖅ ᐱᐅᓯᕙᓪᓕᐊᓯᒪᓂᖓᓄᑦ ᐊᑯᓂᐅᓂᕐᓴᖅ ᐃᓅᑯᑖᕐᓂᓴᐅᒍᓐᓇᓯᒻᒪᑕ.

ᐃᓄᐃᑦ 65-ᓂᒃ ᐅᑭᐅᓖᑦ ᐊᖓᔪᑦᓰᓗ ᒪᕐᕈᕕᓪᓗᐊᑐᒧᑦ ᐅᓄᕐᓯᒋᐊᕐᓯᒪᔪᑦ 3%-ᕕᓂᐅᑦᓱᓂ 6%-ᖑᓕᕐᑐᖅ 2024-ᒥ

ᐅᓪᓗᒥᐅᔪᖅ ᐃᓄᑐᖃᕐᓂᒃ ᐋᓐᓂᐊᕕᒻᒥᐅᑕᖃᕐᑐᒍᑦ ᐃᓄᑐᖃᖃᐅᑎᒻᒦᑐᑦᓴᐅᓕᕐᑑᒐᓗᐊᓂᒃ ᑐᓵᔨᐊᐱᒻᒥ. ᑐᓵᔨᐊᐱᒃ ᑕᑕᒻᒪᑦ, ᐋᓐᓂᐊᕕᒻᒦᒋᐊᖃᓚᕿᕙᑦᑐᑦ.

ᓄᑖᑉ ᐃᓄᑐᖃᖃᐅᑎᐅᑉ ᐱᓇᓱᐊᕐᑕᐅᓂᖓ ᐱᑕᖃᕆᐊᖃᓪᓚᕆᑦᑐᖅ ᓯᕗᓪᓕᐸᐅᑦᔭᐅᒋᐊᖃᕐᓱᓂᓗ ᐃᓄᑐᖃᐅᓕᕐᓱᑎᒃ ᐋᓐᓂᐊᕕᒻᒦᔨᐊᕗᑦ ᐃᓱᕐᕆᓇᕐᓂᓴᕐᒥᒃ ᐃᓂᖃᑦᓯᐊᖁᓪᓗᒋᑦ.

ᐃᓄᐃᑦ ᐃᓄᑐᖃᕈᑉᐸᓕᐊᓂᖓ ᓄᓇᕕᒻᒧᑦ ᐃᓂᓪᓚᑎᕆᐊᓪᓛᕈᑎᐅᕙᓕᕐᑐᖅ ᐊᒥᓱᖕᖑᓕᐅᒥᑎᑦᓯᒐᓱᐊᕐᓱᓂ ᐱᒍᑦᔭᐅᒍᑎᒋᒋᐊᓕᖏᓐᓂᒃ ᐃᓄᑐᙯᑦ. ᑕᒪᓐᓇ ᐃᓚᓕᒃ ᐱᕙᓪᓕᐊᑎᑦᓯᒐᓱᐊᕐᓂᒥᒃ ᐊᑦᑕᓇᖕᖏᑐᓂᒃ ᐃᓂᓪᓚᑕᐅᒪᑦᓯᐊᑐᓂᓪᓗ ᐃᓂᖃᕐᑎᓯᒐᓱᐊᕐᓂᒥᒃ ᐃᓄᑐᙯᑦ ᓇᔪᒐᖃᑦᓯᐊᖁᓪᓗᒋᑦ ᐃᓱᕐᕆᓇᕐᑐᓂᒃ ᐱᒍᑦᔨᓯᐊᕐᕕᐅᓗᑎᓪᓗ. ᑐᓚᑦᑕᕕᒃ ᐱᓇᓱᐊᕐᑐᖅ ᒪᓐᓇᓴᐅᑎᒋᒃ ᐊᕗᖓᐅᓕᔪᒥᓪᓗ ᓇᕝᕚᕋᓱᐊᕐᓱᓂ ᓵᖕᖓᓯᑦᓯᐊᕈᑎᐅᒐᔭᕐᑐᒥᒃ ᐃᓄᐃᑦ ᐃᓄᑐᖃᕈᕐᐸᓕᐊᓂᕆᔭᖓᓂᒃ.

ᑐᓵᔨᐊᐱᒥ, ᖃᓄᐃᖕᖏᓯᐊᕆᐊᖃᕐᒃᓂᖅ ᓲᓱᒋᔭᖃᑦᓯᐊᕆᐊᖃᕐᓂᓗ ᐃᓄᐃᑦ ᐱᒻᒪᕆᖁᑎᖏᓐᓂᒃ ᑐᖕᖓᕕᒋᔭᐅᓪᓚᕆᑦᑐᖅ ᑎᓕᔭᐅᒪᐅᑎᑦᑎᓄᑦ. ᐋᓐᓂᐊᓯᐅᕆᒍᑎᓂᒃ ᐃᓕᕐᕈᓯᕐᑎᒎᓕᖓᔪᓂᓪᓗ ᓇᓪᓕᖁᐊᕇᑦᑎᓯᒐᓱᐊᕐᓱᑕ, ᐃᑲᔪᕐᓯᒪᔭᐅᓪᓚᕆᑉᐳᒍᑦ ᐱᖓᓱᓄᑦ ᐃᓄᑐᐃᓐᓇᐅᓱᑎᒃ ᐱᓇᓱᐊᕐᑎᓄᑦ ᑕᒪᑐᒥᖓ ᑕᐅᑐᑦᑕᑎᓐᓂᒃ ᑲᔪᓯᑎᑦᓯᔨᐅᖃᑎᐅᔪᓂᒃ.

3. ᑐᓚᑦᑕᕕᒃ ᐱᓇᓱᐊᒻᒪᕆᒍᑎᖃᕐᑐᖅ ᖃᕆᑕᐅᔭᑎᒍᑦ ᐃᓄᐃᑦ ᐋᓐᓂᐊᓯᐅᕐᑕᐅᒍᑎᖏᑦ ᐊᓪᓚᑕᐅᓯᒪᒍᓐᓇᖁᓪᓗᒋᑦ. ᑕᒪᓐᓇ ᐱᒻᒪᕆᐅᑦᓱᓂ ᐊᓯᑦᔨᓂᐅᓚᖓᔪᖅ ᐃᑲᔪᕐᓯᓚᖓᑦᓱᓂ ᑐᓚᑦᑕᕕᒻᒥᒃ ᓈᒻᒪᓈᑦᓯᐊᑐᑎᒍᑦ ᖃᐅᔨᒪᔭᐅᒍᑎᑦᓭᑦ ᐱᑕᖃᖃᑦᑕᖁᓪᓗᒋᑦ, ᖃᐅᔨᒪᔭᐅᕕᒋᒋᐊᓕᒻᒥᓃᓪᓗᑎᒃ ᑲᒪᒋᔭᐅᔪᕐᒨᓕᖓᑦᓯᐊᓗᑎᓪᓗ.

• ᑕᒪᓐᓇ ᐱᓇᓱᐊᕈᑎᐅᓕᕈᓂᓯᑯᑦᓴᔭᓂᒃ ᐊᑐᕆᐊᑐᒍᓐᓀᑎᑦᓯᒍᓐᓇᑐᖅ
• ᐊᑐᐃᓐᓇᐅᑎᑦᓯᓯᐊᓚᕿᓗᓂ, ᓇᕝᕙᑲᐱᑦᑕᐅᑎᑦᓯᒍᓐᓇᓗᓂ ᐊᑦᑕᓇᖕᖏᓂᕐᓴᐅᑎᑦᓯᓗᓂᓗ ᐋᓐᓂᐊᓯᐅᕐᑕᐅᒍᑎᐅᒋᐊᓖᑦ ᖃᐅᔨᒪᔭᐅᒍᑎᒋᒋᐊᓕᖏᓐᓂᒃ.
• ᑖᓐᓇ ᐱᓇᓱᒍᑎᒃᐸᕐᓇᕈᑎᐅᑦᓯᐊᓕᐅᒥᓚᖓᔪᖅ ᑲᒪᒋᔭᐅᒍᑎᐅᒋᐊᓕᓐᓂᒃ ᐱᒍᑦᔭᐅᒍᑎᒋᒋᐊᓕᖏᓐᓂᓗ ᑲᒪᒋᔭᐅᔭᕆᐊᓕᐅᑉ.

ᑕᒡᒐᓂ ᐅᐱᕐᖔᒥ, ᐋᓐᓂᐊᓯᐅᕐᑕᐅᒍᑎᐅᓯᒪᔪᓕᒫᑦ ᐊᓪᓚᑕᐅᒪᒍᓯᖏᑦ ᖃᕆᑕᐅᔭᒨᔭᕐᑕᐅᓚᖓᔪᑦ ᑲᒪᒋᔭᐅᒍᑎᓂᒃ ᓄᐃᑕᑎᑦᓯᒍᑎᐅᓯᓗᑎᒃ. ᐱᕙᓪᓕᐊᒐᐅᒐᕐᑕᐅᓗᓂ, ᓄᕕᒻᐱᕆ 2025-ᖑᓕᕐᐸᑦ, ᐊᓪᓚᑕᐅᒪᒍᓯᓕᒫᑦ ᐊᑐᐃᓐᓇᐅᒍᓐᓇᓯᓛᕐᑐᑦ ᖃᕆᑕᐅᔭᒃᑰᑦ ᑲᒪᒋᔭᐅᒍᓐᓇᕈᑎᐅᓯᓗᑎᒃ.

• ᖃᕆᑕᐅᔭᒃᑯᑦ ᐋᓐᓂᐊᓯᐅᕐᑕᐅᒪᒍᓰᑦ ᐊᓪᓚᑕᐅᒪᒍᓯᖏᑦ ᑲᒪᒋᔭᐅᑦᓯᐊᕈᑎᓂᒃ ᑐᑭᒧᐊᑦᑎᓯᓯᑦᓯᐊᓕᐅᒥᒍᑕᐅᒍᓐᓇᑐᑦ
• ᓱᑲᓐᓂᓴᒥᒃ ᑲᒪᒋᔭᐅᓂᖃᑦᓯᐊᑎᑦᓯᓗᑎᒃ
• ᓱᓇᒥᓐᓂᓭᑦ ᓈᒻᒪᓈᕐᓂᓭᓪᓗ ᐋᓐᓂᐊᓯᐅᕐᑕᐅᒋᐊᖃᕐᓂᑯᑦ ᑲᒪᒋᔭᐅᒋᐊᓪᓚᓃᑦ
• ᐱᑦᓯᐊᓕᐅᒥᑎᑦᓯᓗᑎᒃ ᐊᓪᓚᑕᐅᒪᒍᓰᑦ ᑐᑭᓯᒪᒍᑎᑦᓭᑦ ᐊᑦᑕᓇᖕᖏᓂᕐᓴᐅᑎᓗᒋᑦ
• ᐃᓚᐅᑦᓯᐊᓕᐅᒥᑎᑦᓯᓂᖅ ᑲᒪᒋᔭᐅᔭᕆᐊᓖᒻᒥᒃ
• ᐊᓯᐅᔨᔭᐅᑲᑦᑕᓲᑦ ᐊᓪᓚᑕᐅᑦᓯᐊᖏᑦᔪᑎᕕᓃᓪᓗ ᐃᑭᓪᓕᐅᒥᓗᑎᒃ
• ᐅᐃᒪᓇᕐᓯᔪᐃᑦ ᑲᒪᒋᔭᐅᑦᓯᐊᓂᕐᓴᐅᓗᑎᒃ

1. ᖃᕆᑕᐅᔭᑎᒎᕐᑐᐃᑦ ᐊᓪᓚᑕᐅᒪᒍᓰᑦ ᐃᑲᔪᕐᓯᓚᖓᔪᑦ, ᖃᕆᑕᐅᔭᕐᑎᒍᑦ ᐅᖓᓯᑦᑐᒦᑦᑑᒐᓗᐊᓂᒃ ᐋᓐᓂᐊᓯᐅᕐᑕᐅᒍᓐᓇᓯᓕᐅᒥᑎᑦᓯᓗᑎᒃ ᓯᕗᓂᕐᒥ.

2024-2025-ᒥ, ᑐᓚᑦᑕᕕᒃ 63-ᓂᒃ ᖃᕆᑕᐅᔭᒃᑯᑦ ᐅᖓᓯᑦᑐᒦᑦᑐᓂᒃ ᑲᒪᒋᔭᐅᑎᑦᓯᓯᒪᔪᖅ

ᑕᒪᓐᓇ ᐊᑦᔨᐅᖏᑦᑐᕋᑕᖅ, ᐋᓐᓂᐊᓯᐅᕐᑕᐅᔭᕆᐊᓕᒃ ᑲᒪᒋᔭᐅᒍᓐᓇᑎᑕᐅᒻᒪᑦ ᒪᓐᑐᕆᐊᒧᑦ ᐊᐅᓪᓚᕆᐊᑐᕋᓂ. ᐊᒥᓱᓄᑦ ᐃᓄᓐᓄᑦ, ᖃᕆᑕᐅᔭᒃᑯᑦ ᐋᓐᓂᐊᓯᐅᕐᑕᐅᓂᖅ ᐃᓱᐊᕆᔭᐅᔪᖅ. ᐃᓱᒫᓗᓐᓇᖏᓐᓂᓴᐅᒐᒥ ᐋᓐᓂᐊᓯᐅᕐᑕᐅᔭᕆᐊᓖᑦ ᖃᖓᑦᑕᔫᒃᑯᑦ ᐊᐅᓪᓚᐅᔭᐅᒋᐊᑐᖕᖏᒪᑕ, ᒪᓐᑐᕆᐊᒥᓗ ᑐᔪᕐᒥᐅᕆᐊᑐᕋᑎᒃ ᐋᓐᓂᐊᓯᐅᕐᑎᒪᕆᓕᐊᕆᐊᑐᕋᑎᓪᓗ ᓄᓇᒃᑯᔫᒐᓴᕐᔪᐊᑦ ᐃᒻᒧᐊᑎᒍᑦ.

ᖃᕆᑕᐅᔭᕐᑎᒍᑦ ᐋᓐᓂᐊᓯᐅᕆᓂᖅ ᑐᓚᑦᑕᕕᒻᒧᑦ ᑮᓇᐅᔭᕐᑐᖏᓐᓂᓴᐅᒍᑎᐅᒍᓐᓇᑐᖅ ᑲᒪᒋᔭᐅᔪᑦ ᒪᓕᑦᑎᖏᓪᓗ ᖃᖓᑦᑕᐅᑎᖃᕆᐊᑐᖕᖏᓂᕐᓴᐅᒪᑕ ᓯᓂᑦᑕᐅᑎᖃᕆᐊᖃᕋᑎᓪᓗ.

2. ᑐᓚᑦᑕᕕᐅᑉ ᐋᓐᓂᐊᓯᐅᕆᓂᕐᑎᒍᑦ ᓯᕗᓪᓕᐸᐅᑦᔭᐅᔪᑦᓴᖁᑎᖏᑦ ᑕᒡᒐᓂ ᐊᕐᕌᒍᒥ:

• ᐋᓐᓂᐊᓯᐅᕐᑎᒪᕆᓐᓂᒃ ᐅᓄᕐᓯᒋᐊᕆᓂᖅ ᒪᕐᕈᒋᐊᓪᓛᓂᒃ ᐋᓐᓂᐊᓯᐅᕐᑎᒪᕆᑦᑖᓂᒃᑯᑦ ᐊᑌᓐᓇᓚᖓᔫᓐᓂᒃ ᑲᖏᕐᓱᔪᐊᒥ (52 ᐱᓇᓱᐊᕈᓰᑦ)
  
• ᐅᓄᕐᓯᒋᐊᖁᓪᓗᒋᑦ ᓄᓇᓖᑦ ᑭᒍᑎᓕᕆᔨᖃᕆᐊᖃᕐᓂᖓᑦ, ᑐᓚᑦᑕᕕᒃ ᑭᒍᑌᕐᓯᔨᑦᑖᕆᐊᓪᓚᕈᒪᔪᖅ ᐱᖓᓱᒋᐊᓪᓚᓂᒃ ᐊᑌᓐᓇᑑᓚᖓᔪᓂᒃ.
  
• ᐊᐅᓚᑦᓯᒥᔪᒍᑦ ᐊᑕᐅᓯᐅᓕᖓᔪᒥᒃ ᑕᑯᔭᐅᔪᑦᓴᓕᐅᕐᕕᖃᕐᑎᓯᑦᓱᑕ ᑭᒍᑎᓕᕆᔭᐅᓂᕐᒧᑦ.
  
• ᐊᐅᓪᓚᑐᑦᓴᓕᕆᔨᕗᑦ: ᑕᑯᔭᐅᔪᑦᓴᐅᒋᐊᓕᓐᓂᒃ ᐊᐅᓪᓚᑐᑦᓴᐅᒋᐊᓕᓐᓂᓗ ᑲᔪᓯᑦᓯᐊᓕᐅᒥᑎᑦᓯᒐᓱᐊᕐᑐᒍᑦ ᐱᐅᓯᐅᒥᖁᔨᒧᑦ ᐱᓪᓗᑯᒋᐊᓕᕐᑎᒍᑦ ᑕᑯᔭᐅᔪᑦᓴᓕᐅᕐᓂᒥᒃ ᓄᓇᓕᒻᒥ

1. ᐃᓂᓪᓚᕕᒃ ᑐᔪᕐᒥᐅᕕᒃ, ᐱᒻᒪᕆᐊᓗᒃ ᐱᒍᑦᔨᓂᕆᔭᖏᓐᓂ ᑐᓚᑦᑕᐅᑉ. 4600 ᐅᖓᑖᓂ ᑲᒪᒋᔭᐅᔭᕐᑐᑐᑦ ᐃᓂᓪᓚᕕᒦᓚᐅᔪᑦ ᐊᕐᕌᓂ:

ᑐᖕᖓᓱᑦᓯᐊᓕᐅᒥᖁᓪᓗᒋᑦ ᐃᓂᖃᑦᓯᐊᖁᓪᓗᒋᓪᓗ ᑲᒪᒋᐅᔭᕐᑐᑐᑦ, ᓴᓇᒋᐊᓪᓛᓂ ᐱᐅᓯᓕᑎᕆᓂᕐᓗ ᐃᓪᓗᒥ ᐊᑑᑎᔭᐅᓚᐅᔪᑦ ᐊᕐᕌᓂᓕᒫᑦᓯᐊᖅ:

• ᓂᓪᓚᓱᑦᑎᓯᒍᑏᑦ ᐅᕐᖂᓯᓴᐅᑏᓪᓗ ᐃᒐᓕᕐᒥ ᖁᓚᓂᓗ ᐳᓛᕐᕕᒥ.
• ᓄᑖᖅ ᓂᓪᓕᓇᕐᑐᑯᕕᒃ ᓱᑲᑦᑐᒥᓪᓗ ᐃᒐᒍᑎᒃ ᖁᓛᓂ ᐳᓛᕐᕕᒥ, ᐃᒪᑐᐃᓐᓇᑐᕐᕕᖃᓕᕐᓱᓂᓗ.
• ᒪᕐᕉᒃ 65-ᓂᒃ ᐊᖏᓂᓖᑦ ᑕᓚᕖᓵᒃ: ᐊᑕᐅᓯᖅ ᖁᓛᓂ ᐳᓛᕐᕕᒥ, ᐃᒐᓕᕐᒥᓗ.
• ᐃᓪᓗᓕᒫᑦᓯᐊᓗ ᒥᖑᐊᕐᑕᐅᓱᓂ
• 32 ᐃᓄᐃᑦ ᓴᓇᖕᖑᐊᓯᒪᔭᖏᑦ ᐊᑭᓐᓇᒥᐅᑌᑦ ᑐᓂᕐᕈᓯᐊᖑᓯᒪᔪᑦ ᓄᐃᑕᑎᑕᐅᔪᑦ ᐳᓛᕐᕕᓂ, ᑐᕐᓲᖑᔭᖏᓐᓂ, ᖁᓛᓂ ᐊᑖᓂᓗ.
  
  

• ᐋᓐᓂᐊᕕᓕᐊᕐᓯᒪᔪᑦ ᒪᓕᑦᑎᖏᓪᓗ ᐅᖓᓯᑦᑐᒧᑦ ᐅᖄᓚᒍᓐᓇᑐᓂᒃ ᐅᖄᓚᐅᑎᖃᓕᕐᒥᔪᑦ ᖃᕆᐊᒥᓂ
  
  
• ᑐᓴᕋᑦᓴᓯᐊᕆᐊᓪᓚᐅᒥᔪᑦ:
  ᐃᑦᓯᕙᐅᑕᖅ ᒪᔫᑎᒃᑯᑎᑦᓯᒍᑎᒃ ᐃᓄᑐᖃᕐᓂᒃ ᐱᕐᖃᔭᑦᓯᐊᖏᑦᑑᒍᑎᓕᓐᓂᓗ ᐃᓕᔭᐅᓚᐅᔪᖅ ᐊᐅᒡᒍᓯᐅᑎᓪᓗᒍ. ᐋᓐᓂᐊᕕᓕᐊᕐᓯᒪᔪᑦ ᐊᐅᓚᕐᖃᔭᑦᓯᐊᖏᑦᑑᒍᑎᓖᑦ ᖁᓛᓄᕈᓐᓇᕕᖃᑦᓯᐊᓕᕐᑐᑦ ᐳᓛᕐᕕᒦᒋᐊᕐᑐᓗᑎᒃ.
  

3. ᑭᖑᓪᓕᐸᖑᑎᓪᓗᒍ ᐊᐅᓚᑦᓯᓂᓕᕆᓂᕐᒥᒃ ᐸᕐᓇᑕᐅᓯᒪᒋᐊᓕᓐᓂᓗ ᐱᓇᓱᐊᕐᕕᒨᓕᖓᔪᖅ ᐅᖃᐅᓯᕆᒍᒪᔭᕗᑦ ᑐᓚᑦᑕᕕᐅᑉ ᐊᕐᕋᒍᓕᒫᒥ ᑮᓇᐅᔭᑎᒍᑦ ᐊᐅᓚᒍᑎᑦᓴᖏᑦᑕ ᑐᕌᒐᕆᕙᑦᑕᖏᑦ. ᐊᒥᓱᓂᒃ ᐊᑦᔨᒌᖕᖏᑐᓂᒃ ᐋᕐᕿᒋᐊᕈᑎᓕᐅᖃᑦᑕᓚᐅᕐᓱᑕ ᓄᖑᑎᕆᒐᓱᐊᕈᑎᒋᑦᓱᒋᑦ ᑲᑕᑦᓯᒪᐅᑎᑦᑎᓂᒃ, ᐱᔪᕆᐅᑎᖃᕐᐳᖓ ᐅᖃᕆᐊᖅ ᑐᓚᑦᑕᕕᐅᑉ ᑭᓇᐅᔭᑎᒍᑦ ᑐᕌᒐᖏᑦ ᑲᓱᕐᓂᖃᑦᓯᐊᓕᓚᐅᕐᒪᑕ 2024-2025-ᒥ.

ᑐᓚᑦᑕᕕᒃ ᐱᓇᓱᐊᓕᕐᒥᔪᖅ ᒫᓐᓇᑯᑦ 2025-2026 ᐊᕐᕌᒍᐊᓂ ᑮᓇᐅᔭᑎᒍᑦ ᑲᓱᕐᓂᖃᑦᓯᐊᑎᒐᓱᐊᕐᓱᒍ ᐋᕐᕿᓱᐃᒋᐊᓪᓛᓱᓂᓗ ᐊᕐᕌᒎᓚᖓᔪᒥ ᑲᑕᑦᓯᒪᓂᕐᒨᕈᑎᐅᑐᐃᓐᓇᕆᐊᓕᓐᓂᒃ.

1. ᑐᓚᑦᑕᕕᒃ ᐱᓇᓱᐊᖏᓐᓇᓕᒫᕐᑐᖅ ᐱᐅᓯᐅᒥᑎᑦᓯᒐᓱᐊᕐᓱᓂ ᐱᓇᓱᑦᑎᓴᕐᓯᐅᓂᕐᒥᒃ

ᑐᓚᑦᑕᕕᐅᑉ ᐱᓇᓱᑦᑎᖏᑦ ᑯᑦᔪᐊᒦᕙᓪᓗᑐᑦ ᐊᕐᕕᑕᕐᐸᓱᑎᒃ ᐊᑦᔨᒌᖕᖏᑐᓄᑦ ᓄᓇᓕᓐᓄᑦ. ᐱᓇᓱᑦᑎᑖᕆᔭᐅᓂᖓ ᐃᓚᐅᑎᑕᐅᓂᖓᓗ ᓄᓇᓕᒻᒥ ᐱᓇᓱᑦᑏᑦ ᐊᑑᑎᒋᐊᖃᓪᓚᕆᑦᑐᖅ. ᓄᓇᕕᒻᒥᐅᑦ ᑲᒪᒋᔭᐅᒍᓯᖃᑦᓯᐊᖁᓪᓗᒋᑦ ᐃᓕᕐᖁᓯᕐᑎᒎᓕᖓᓂᕐᓴᓂᒃ, ᐊᑐᐃᓐᓇᐅᓯᐊᕐᑐᓂᒃ ᐃᑉᐱᒋᔭᖃᑦᓯᐊᑐᓂᓪᓗ, ᐱᑐᑦᓯᒪᑦᓯᐊᓕᐅᒥᑎᑦᓯᒍᑎᒋᓗᒋᑦ ᑐᓚᑦᑕᕕᐅᑉ ᐱᒍᑦᔨᐅᑎᖏᓐᓂᒃ ᓄᓇᓕᓐᓂᓗ ᑭᒡᒐᑐᕐᑕᑎᓐᓂᒃ.

• ᐱᓇᓱᑦᑎᓕᕆᔨᕗᑦ ᐱᒋᐊᕐᑎᓯᓯᒪᓕᕐᑐᑦ ᓄᑖᒥᒃ ᐊᐅᓚᑦᓯᒍᓯᕐᒥᒃ ᐃᓂᓪᓚᖓᑦᓯᐊᓂᕐᓴᒥᓪᓗ ᐱᓇᓱᑦᑎᓴᕐᓯᐅᓂᕐᒨᓕᖓᔪᒥᒃ ᑐᓚᑦᑕᕕᐅᑉ ᖃᕆᑕᐅᔭᒃᑯᑦ ᖃᐅᔨᒋᐊᕐᑕᐅᕕᖓᓂ. ᐱᔭᕆᐊᑭᓐᓂᓴᐅᓕᕐᑐᖅ ᑕᑯᒐᓱᐊᕆᐊᒥᒃ ᑐᓚᑦᑕᕕᒻᒥ ᐱᓇᓱᒉᑦ ᓄᐃᑕᑎᑕᐅᓕᕐᓂᖏᓐᓂᒃ. ᖃᐅᔨᒐᓱᐊᕈᒪᒍᕕᑦ ᑐᓚᑦᑕᕕᒻᒥ ᐱᓇᓱᒐᕐᓂᒃ ᐊᑐᐃᓐᓇᐅᔪᓂᒃ, ᐅᕗᖓ ᑕᑯᒋᐊᑐᐃᓐᓇᕈᓐᓇᑐᑎᑦ tulattavik.com. ᖃᐅᔨᒋᐊᕐᑕᐅᕕᐅᑉ ᑕᑯᑦᓴᐅᒋᐊᖕᖓᕕᖓᓂ, ᓃᓂᑕᐅᒍᓐᓇᑐᒥᒃ ᑕᑯᒐᔭᕐᑐᑎᑦ ᕿᒥᕐᕈᕕᐅᒍᓐᓇᑐᒥᒃ
  
  ᐱᓇᓱᒑᑦᓴᓕᒫᑦᓯᐊᓂᒃ ᓄᐃᑕᑎᑕᐅᔪᓂᒃ ᐱᓇᓱᒐᕐᑖᕕᒋᒐᓱᐊᕈᓐᓇᓱᒋᓪᓗ ᖃᕆᑕᐅᔭᒃᑯᑦ. ᑐᓚᑦᑕᕕᒃ ᑭᖕᖒᒪᑦᓯᔪᖅ ᐃᓄᑐᐃᓐᓇᓂᒃ ᐱᓇᓱᑦᑎᓂᒃ. ᐱᓇᓱᒍᒪᒍᕕᑦ ᑐᓚᑦᑕᕕᒻᒥ ᐃᑲᔪᕈᒪᓗᑎᑦ ᓄᓇᓕᓐᓂᒃ, ᐃᓚᑎᓐᓂᒃ, ᐱᖃᑎᑎᓐᓂᒃ, ᖃᐅᔨᒋᐊᕐᑕᐅᖁᔨᕗᖓ ᑐᓚᑦᑕᕕᐅᑉ ᐱᓇᓱᑦᑎᓕᕆᔨᒃᑯᖏᓐᓂᒃ ᐱᓇᓱᒍᒪᒐᔭᕐᓂᕋᕐᓗᑎᑦ. ᐱᓇᓱᑦᑎᓕᕆᔩᑦ ᑐᓴᕆᐊᕐᕕᐅᒍᓐᓇᑐᑦ ᖃᕆᑕᐅᔭᒃᑯᑦ ᐊᓪᓚᕕᐅᓗᑎᒃ ᐅᕙᓂ: rh.ungava@ssss.gouv.qc.ca ᐅᕝᕙᓗᓃᑦ ᐅᖄᓚᕕᐅᓗᑎᒃ ᐅᕙᓂ 819-964-2905 #2462.

• ᐅᖓᕙᒥᐅᑦ ᖃᐅᔨᒪᖁᓪᓗᒋᑦ ᐊᑦᔨᒌᖕᖏᑐᓂᒃ ᐱᓇᓱᒐᑦᓴᐅᒍᓐᓇᑐᓂᒃ ᑐᓚᑦᑕᕕᒻᒥ, ᐱᓇᓱᑦᑎᓕᕆᔩᑦ ᐱᓇᓱᑦᑎᖏᑦ ᐃᓚᐅᓚᐅᔪᑦ ᓄᓇᕕᒻᒥᐅᑦ ᓯᕗᓂᑦᓴᖓᓅᓕᖓᔪᒥᒃ ᑕᑯᑦᓴᐅᑎᑦᓯᓂᐅᔪᓂᒃ ᑲᖏᕐᓱᔪᐊᒥ, ᑲᖏᕐᓱᐊᓗᑦᔪᐊᒥ ᑯᑦᔪᐊᒥᓗ. ᐱᑐᖃᑎᖃᕈᓐᓇᓯᓚᐅᔪᒍᑦ ᐃᓄᓐᓂᒃ ᑕᒃᑯᒧᑦ ᐅᖄᖃᑎᒋᖃᑦᑕᓱᒋᓪᓗ ᑐᓚᑦᑕᕕᒥ ᐱᓇᓱᒍᓐᓇᕋᔭᕐᓂᖏᑦᑕ ᒥᑦᓵᓄᑦ.
  
  ᐃᓱᒪᙯᓐᓇᕋᑦᑕ ᑐᓚᑦᑕᕕᒃ ᖃᐅᔨᒪᔭᐅᑦᓯᐊᕆᐊᓪᓚᖁᓪᓗᒍ ᓄᓇᓕᒻᒥᐅᓂᓪᓗ ᐱᓇᓱᒐᕐᖃᕐᑎᓯᓃᐅᔨᒥᒃ, ᐳᓛᕆᐊᕐᑕᐅᑎᑦᓯᓚᐅᔪᒻᒥᔪᒍᑦ ᐋᓐᓂᐊᕕᒻᒥᒃ, ᐱᓇᓱᐊᖃᑎᖃᕐᓱᑕ ᑲᑎᕕᒃ ᐃᓕᓴᕐᓂᓕᕆᔨᒃᑯᖏᓐᓂ, ᐃᓕᓐᓂᐊᑏᑦ 4-ᒥᒃ 5-ᒥᓪᓗ ᐳᕐᑐᓂᓕᒻᒦᑐᐃᑦ ᐳᓛᕆᐊᕐᑎᓱᒋᑦ. ᑖᓐᓇ ᐊᑑᑎᓚᐅᔪᖅ ᐁᕆᓕ 2025 ᐱᒋᐊᕐᖃᒥᐅᑎᓪᓗᒍ.

2. ᑐᓚᑦᑕᕕᒃ ᐱᓇᓱᐊᒻᒪᕆᑦᑐᖅ ᐱᐅᓯᐅᒥᑎᑦᓯᒐᓱᐊᕐᓱᓂ ᐃᓄᑐᐃᓐᓀᑦ ᐱᓇᓱᒐᕐᒥᓂ ᐱᕙᓪᓕᖁᑎᑕᕐᑕᐅᑎᒋᒍᓐᓇᑕᖏᓐᓂᒃ, ᐱᓇᓱᐊᖃᑎᖃᕐᓱᑕ ᐃᓗᓯᓕᕆᔨᒃᑯᓂᒃ ᐃᓅᓕᑦᓯᕕᒻᒥᓗ. ᐃᓱᒫᓘᑎᖃᕋᑦᑕ ᓄᐃᑦᓯᒍᒪᓚᕿᕗᒍᑦ ᓄᑖᓂᒃ ᐱᓇᓱᒍᒪᓚᕿᒍᑎᐅᒍᓐᓇᕋᔭᕐᑐᓂᒃ ᐃᓄᑐᐃᓐᓇᓄᑦ ᐅᐱᓐᓇᕋᓂ ᐊᑕᐅᓯᑐᐃᓐᓇᐅᒪᑦ ᐃᓄᒃ ᓄᓇᓕᒻᒥᐅᔭᖅ ᐱᓇᓱᐊᕐᑐᖅ ᓯᑕᒪᓂ ᐱᓇᓱᐊᕐᑐᓂ.

2024-2025 ᐊᕐᕌᒍᖓ ᐊᑦᓱᕈᕐᓇᑐᑲᓪᓚᐅᓚᐅᕐᑐᖅ ᐱᓪᓗᑯᒋᐊᓕᕐᑎᒍᑦ ᐱᒍᑦᔨᐅᑎᓕᕆᔨᓄᑦ. ᐊᒥᓱᒻᒪᕆᓐᓂᒃ ᑮᓇᐅᔭᑎᒍᑦ ᐊᐅᓚᑦᓯᒍᑎᖃᕆᐊᖃᕋᑦᑕ ᑐᕌᒐᕐᑎᒍᓪᓗ ᑮᓇᐅᔭᖃᕐᑎᑕᐅᓂᕗᑦ ᒥᑭᓗᐊᕐᓱᓂ ᑲᔪᓯᑦᓯᐊᑎᑦᓯᒋᐊᖃᕐᓱᑕ ᐱᐅᒃᑯᑎᒻᒪᕆᓕᒫᓂᒃ.

ᑐᓚᑦᑕᕕᐅᑉ ᐊᕗᖓᐅᓕᔪᒥᒃ ᑕᑯᓐᓇᕋᓱᐊᕐᓂᖓ ᐃᑲᔪᕐᓯᒪᔪᖅ ᐅᕙᑦᑎᓂᒃ ᐃᑉᐱᒋᔭᖃᑦᓯᐊᕈᑎᒋᒐᑦᑎᒍ ᐱᒻᒪᕆᐅᔪᓂᒃ ᐱᓇᓱᐊᕆᐊᓕᑦᑎᓂᒃ ᐊᒥᒐᕐᑐᓂᒃ ᐱᓇᓲᑎᑦᓴᖃᕋᓗᐊᕐᓱᑕ. ᑲᔪᓯᖏᓐᓇᓕᒫᕐᑐᒍᑦ ᓯᕗᕐᖐᓯᒪᐅᑎᐅᓚᖓᔪᓂᒃ ᐱᓇᓱᐊᕐᓱᑕ, ᑭᓯᐊᓂ ᐊᒥᓱᖕᖑᐸᓪᓕᐊᑐᐃᓐᓇᑐᑦ ᑕᒪᒃᑯᐊ ᐊᕐᕌᒍᑕᒫᑦ. ᑌᒣᒐᓗᐊᕐᑎᓗᒍ, ᓯᕗᕐᖐᓯᒪᐅᑎᐅᓚᖓᔪᓂᒃ ᓴᓇᒋᐊᓪᓛᓂᖃᕐᐸᓂᕗᑦ ᐃᑲᔪᕐᓯᒪᔪᖅ ᐃᑯᓪᓚᑎᑦᓯᒍᑎᒋᒐᑦᑎᒍᑦ ᐱᔭᕆᐊᑦᑐᓯᒪᓕᕋᔭᕐᑐᓂᒃ ᑮᓇᐅᔭᕐᑐᓂᕐᓴᐅᒍᓐᓇᑐᓂᒃ.

ᑐᓚᑦᑕᕕᒃ ᐃᓪᓗᖁᑎᓕᒃ 180 ᐅᖓᑖᓂᑦᑐᓂᒃ ᓴᓇᒣᓐᓇᑎᒋᐊᓕᒻᒥᓂᒃ 11-ᓂ ᐊᑦᔨᒌᖕᖏᑐᓂ ᓄᓇᓕᓐᓂ 372-ᓂᓪᓗ ᐊᓂᕐᕋᕆᔭᐅᔪᓂᒃ ᐃᓪᓗᒪᕇᓐᓃᑐᓂᒃ. ᐊᕐᕌᒎᓂ ᒪᕐᕉᓂ ᓈᔫᓐᓂ, 80-ᓂ ᓄᑖᓂᒃ ᐊᓂᕐᕋᓴᐅᔪᓂᒃ ᐃᓪᓗᒪᕆᒻᒦᓱᑎᒃ ᐱᑖᓚᐅᕐᒥᔪᖅ ᐊᑐᐃᓐᓇᐅᓂᐊᓕᕐᒥᔪᓂᒃ ᐱᓇᓱᑦᑎᓄᑦ .

2025-ᒥ, 40-ᓂᒃ ᐊᓂᕐᕋᓴᕐᖃᓚᖓᓕᕐᒥᔪᖅ ᐃᓪᓗᒪᕆᒻᒦᑐᓂᒃ ᐱᓇᓱᑦᑎᑕ ᐃᓂᑦᓴᕆᓂᐊᕐᑕᖏᓐᓂᒃ.

ᐊᕗᖓᐅᓕᑎᑦᓯᒍᒪᒧᑦ ᓄᑕᐅᓯᓕᑎᕆᒍᒪᒧᓪᓗ ᓄᑕᐅᖕᖏᓕᕐᓯᒪᓕᕐᑐᓂᒃ ᐃᓪᓗᖁᑎᑦᑎᓂᒃ, ᐱᒋᐊᒻᒪᕆᓐᓂᖃᕆᐊᖃᓕᕐᑐᒍᑦ ᒫᓐᓇᓴᐅᑎᒋᒃᑯᑦ. ᐅᓪᓗᒥᐅᓕᕐᑐᖅ ᓄᐃᑦᓯᓯᒪᓕᕐᑐᒍᑦ ᓱᓇᒥᑦᓯᐊᕋᓱᐊᕐᑐᒥᒃ ᓯᑕᒪᐅᔪᖕᖏᒐᕐᑐᓄᑦ ᐊᕐᕌᒍᕐᓅᓕᖓᔪᒥᒃ ᐸᕐᓇᕈᑎᓕᐅᕐᓱᑕ, ᑮᓇᐅᔭᕐᑐᕋᔭᕐᑐᒥᒃ $82 ᒥᓕᐊᓂᒃ, ᑐᕌᒐᖃᕐᑐᒥᒃ ᓄᑕᐅᓯᓕᑎᕆᒐᔭᕐᓂᒥᒃ 19-ᓂᒃ ᐃᓪᓗᓂ ᑕᓪᓕᒪᓂ ᓄᓇᓕᓐᓂ.

ᑯᐯᒃᑯᑦ ᐃᓗᓯᓕᕆᔨᒃᑯᖏᑦᑕ ᑐᕐᖃᑕᕐᕕᑯᖏᓐᓃᓕᕐᑐᖅ ᑐᑦᓯᕋᐅᑎᓕᐊᕆᓯᒪᔭᕗᑦ ᐃᓪᓗᒪᕆᖁᑎᑦᑎᓂᒃ ᐱᐅᒃᑯᑎᒻᒪᕆᑦᑎᓂᒃ ᐱᓇᓱᐊᕈᒪᐅᑎᕗᑦ, ᖃᐅᔨᒍᑎᒋᓛᓕᕋᑦᑎᒍᑦ ᓇᓪᓕᐊᖏᑦ ᐱᓇᓱᐊᕋᑦᓴᐅᔪᑦ ᓯᕗᓪᓕᐸᐅᑦᔭᐅᔭᕆᐊᖃᓕᕋᔭᕐᒪᖔᑕ ᐊᕐᕌᒍᓂ ᙯᔪᓂ.

ᐃᕕᕐᑎᕆᕕᓕᕆᓂᕐᑎᒍᑦ ᐱᒍᑦᔨᔩᑦ ᐊᒥᓱᓂᒃ ᐊᑦᓲᕉᑎᖃᕐᐸᑐᑦ ᐃᓅᓱᑦᑐᐃᑦ ᑲᒪᒋᔭᐅᑦᓯᐊᕈᓐᓇᖁᓪᓗᒋᑦ ᑭᖕᖒᒪᒋᔭᖏᓪᓗ ᓵᖕᖓᔭᐅᑦᓯᐊᖁᓪᓗᒋᑦ. ᐱᓇᓱᐊᖃᑎᒌᑦᑐᓕᒫᑦ ᓴᐱᓕᕐᓯᕇᑦᑑᕗᑦ ᐊᔪᐃᓐᓇᓂᖃᑦᓯᐊᓱᑎᓪᓗ ᖃᓄᐃᖕᖏᓯᐊᖁᓪᓗᒋᑦ ᐃᓅᓱᑦᑐᐃᑦ ᑲᒪᒋᔭᐅᑎᑕᐅᔪᑦ ᐱᒍᑦᔨᕕᒋᔭᑦᑎᓂ. ᐱᓇᓱᐊᕆᐊᖃᕐᓂᕋᑦᑕᐅᒍᑎᑦᑕ ᐅᖓᑖᓄᐊᓗᒃ ᐱᓇᓱᐊᓯᕙᑦᑐᑦ ᐃᑲᔪᕐᕋᓱᐊᕐᓱᑎᒃ ᐃᓄᓱᑦᑐᐃᑦ ᐱᕙᓪᓕᐊᓯᐊᔭᕆᐊᖃᕐᓂᖓᓂᒃ.

ᐅᑯᐊᑕᒐ ᓄᐃᑦᓯᒍᑎᐅᔪᑦ ᐊᕐᕌᒎᑫᓐᓇᑐᒥᒃ ᐃᑲᔪᕐᓯᒍᑎᐅᓯᒪᔪᓂᒃ.

1. ᐊᑐᓂ 8 ᐃᕕᕐᑎᕆᕖᑦ ᓂᕿᑐᐃᓐᓇᑖᕐᑎᑕᐅᓲᑦ. ᐱᕕᓕᒫᒃᑯᑦ ᓂᕆᑎᒐᓱᐊᕐᐸᑕᕗᑦ ᓂᕿᑐᐃᓐᓇᓂᒃ ᐱᓇᓱᐊᕈᓯᕐᒥ ᐊᑕᐅᓯᐊᕐᑎᒐᓱᐊᕐᐸᓱᒋᑦ. ᑭᓯᐊᓂ ᑌᒣᖕᖏᓐᓇᓕᒫᕈᓐᓇᐸᖕᖏᒥᔪᖅ, ᐱᓇᓱᐊᕋᓱᐊᖏᓐᓇᕋᓗᐊᕐᑐᒍᑦ ᐆᒪᔪᕐᓯᐅᑏᑦ ᐃᖃᓪᓕᐊᑏᓪᓗ ᐱᕕᐅᒍᓐᓇᑎᒐᓱᐊᕐᓱᒋᑦ ᓂᕿᑐᐃᓐᓇᓂᒃ. ᐸᓂᕐᑎᑕᓕᐅᕈᑎᐅᒍᓐᓇᑐᑦ ᐊᑐᐃᓐᓇᐅᓯᐊᕐᒪᑕᓕ, ᐸᓂᕐᑎᑕᕐᑐᑎᑕᐅᑦᓯᐊᐸᑐᐃᑦ. ᑖᒃᑯᐊᓗ ᐱᐊᕃᑦ ᐅᐱᒍᓱᕙᕐᔪᐊᓲᑦ.

2. ᐊᑐᓂ ᓇᔪᒐᐅᔪᑦ ᐃᓕᕐᕈᓯᕐᓅᓕᖓᔪᓂᒃ ᓱᖃᑦᓯᑎᑦᓯᓂᖃᓲᖅ. ᐊᑦᔨᒌᖕᖏᑑᕙᑦᑐᒐᓗᐊᑦ ᓇᔪᒐᐅᔪᑎᒍᑦ, ᐱᑦᔪᑎᐅᑎᓪᓗᒋᑦ ᐊᑐᐃᓐᓇᖃᕈᓐᓇᓃᑦ, ᓇᓪᓕᐊᖏᓪᓗ ᑲᒪᒋᔭᐅᒋᐊᖃᕐᑐᑦ ᓄᓇᓕᐅᔪᓪᓗ. ᐱᕕᓕᒫᑦᓯᐊᑎᒍᑦ ᐱᑦᓯᐊᕋᓱᐊᕋᓗᐊᕐᑐᒍᑦ.

• ᐊᑐᓂ ᓇᔪᒐᐅᔪᑦ ᐅᑭᐅᕐᑕᑐᒥ ᓯᑭᑑᓖᑦ, ᑲᓕᒐᓖᑦ ᓯᑕᒪᓕᓐᓂᓗ ᐊᑦᓴᓗᐊᓕᓐᓂᒃ ᐃᖏᕐᖃᐅᑎᖃᕐᓱᑎᒃ ᐊᒻᒪᓗ/ᐅᕝᕙᓗᓐᓃᑦ ᖃᔭᕆᐊᖃᕐᓱᑎᒃ. ᐃᓅᓱᑦᑐᐃᑦ ᓄᓇᒦᑦᑎᑕᐅᓱᑦ ᓄᓇᓕᒻᒥᐅᒥᒃ ᖃᐅᔨᒪᔨᖃᕐᑎᑕᐅᑦᓱᑎᒃ ᐱᓇᓱᑦᑎᒥᓪᓘᓃᑦ, ᐃᖃᓪᓕᐊᑎᑕᐅᒋᐊᕐᑐᓱᑎᒃ, ᒥᑭᒋᐊᕐᓂᐊᑎᑕᐅᑦᓱᑎᒃ, ᓄᓂᕙᒋᐊᕐᑎᑕᐅᑦᓱᑎᒃ, ᓯᓚᒥᓗᓐᓃᑦ ᓂᕆᒋᐊᕐᑐᓯᒪᑎᑕᐅᑦᓱᑎᒃ, ᒪᓐᓂᑕᕆᐊᕐᑎᑕᐅᑦᓱᑎᒃ, ᐳᐃᑦᔪᕋᕐᑎᑕᐅᑦᓱᑎᒃ, ᒪᙯᑦᑎᑕᐅᑦᓱᑎᒃ ᓯᓂᑦᑕᕆᐊᕐᑎᑕᐅᒪᑦᓱᑎᒃ, ᐃᓄᑐᐃᓐᓀᓗ ᐱᖕᖑᐊᕈᓯᖏᓐᓂᒃ ᐊᑑᑎᑎᑕᐅᑦᓱᑎᒃ, ᐅᕝᕙᓗᓐᓃᑦ ᓯᓚᒦᒋᐊᒥᒃ ᐊᓕᐊᓱᒍᑎᖃᕐᑎᑕᐅᑦᓯᐊᑐᐃᓐᓇᓱᑎᒃ.
  
  
• ᐊᕐᕋᒍᐃᑦ ᐊᒥᓱᒐᓚᐅᓕᕐᑐᑦ ᓈᔪᑦ, ᓂᐅᕕᓚᐅᔪᒍᑦ ᐃᓪᓗᐊᐱᒻᒥᒃ ᑯᑦᔪᐊᑉ ᓇᐸᔪᐊᓗᖃᕐᕕᖓᓂ. ᐃᓚᐅᓲᖑᒻᒥᓱᑕᓗ ᓱᓇᓱᐊᕐᑎᑕᐅᔪᖃᓕᕐᒪᑦ ᓄᓇᓕᒻᒥ. ᐃᓚᖏᑦ ᐃᓅᓱᑦᑐᐃᑦ ᓇᔪᒐᖏᑦ ᒥᕐᓱᑎᑦᓯᓂᖃᓲᑦ, ᓴᐸᖓᓕᕆᑦᓱᑎᓪᓗ, ᖁᓪᓕᓴᔭᓂᕐᓗ ᓴᓇᖕᖑᐊᑎᑦᓯᓱᑎᑦ ᐃᓚᖓᓂᓗ ᐃᓄᑐᖃᕐᓂᒃ ᐳᓛᕆᐊᕐᑎᓯᓲᖑᒻᒥᓱᑎᒃ ᐅᕝᕙᓗᓐᓃᑦ ᐃᓅᓱᑦᑐᓂᒃ ᐃᓄᑐᖃᖃᐅᑎᒧᑦ ᐳᓛᕆᐊᕐᑎᓯᕙᑦᓱᑎ.
  

3. ᒪᕐᕉᓂ ᓇᔪᒐᐅᔫᓐᓂ ᖃᓪᓗᓈᑦ ᓄᓇᖓᓐᓂ, ᐱᓇᓱᐊᖃᑎᖃᓕᕐᑐᒍᑦ ᒪᑭᕝᕕᑯᓐᓂᒃ ᐳᓛᕆᐊᕐᑎᓯᕙᑦᓱᑕ ᐃᓄᑐᖃᕐᓂᒃ ᓂᕿᑐᐃᓐᓇᒋᕐᑎᓱᒋᑦ ᐱᖓᓱᕕᑦᓱᑕ ᓯᑕᒪᕕᑦᓱᑕᓗᓐᓃᑦ ᐊᕐᕌᒎᑉ ᐃᓗᐊᓂ ᐱᓇᓱᐊᖃᑎᒋᒻᒥᓱᒋᑦ ᖃᓪᓗᓈᑦ ᓄᓇᖓᓃᑦᑐᑦ ᐃᓄᐃᑦ ᑲᑐᑦᔨᖃᑎᒌᓐᓂᖓ. ᐊᑦᔨᒋᖕᖏᑐᓂᒃ ᓱᓇᓱᐊᕐᑎᓯᓂᖃᕐᐸᑐᒍᑦ ᑲᑐᑦᔨᖃᑎᒌᓂᑯᑦ ᐃᓚᒋᑦᓱᒋᑦ. ᐱᓇᓱᐊᖃᑎᒌᓐᓂᕗᑦ ᐱᐅᔪᕋᑕᖅ.

• ᕿᔪᓕᕆᑎᑦᓯᓂᖅ ᓱᕈᓯᕐᓂᒃ ᐱᒋᐊᕐᓯᒪᓕᕐᒥᔪᖅ ᐱᓇᓱᐊᕈᑎᑦᓴᑖᕐᑎᑕᐅᓯᒪᒐᑦᑕ ᒪᓐᑐᕆᐊᒥ ᖃᓪᓗᓈᑎᑑᕐᑐᒥᒃ ᐃᓕᓐᓂᐊᓕᕆᔨᒃᑯᖏᓐᓄᑦ.

4. ᐱᑦᔪᔨᔭᓕᒫᕗᑦ ᐃᓄᑦᑎᑐᕈᓐᓇᓯᐊᕐᑎᑕᐅᔪᑦ.

5. ᑮᓇᐅᔭᕐᑖᑎᑕᐅᕐᖃᒥᐅᒐᑦᑕ ᒪᑭᕝᕕᒥᑦ ᐅᒃᑯᐃᓯᓯᒪᓕᕐᑐᒍᑦ ᑕᓪᓕᒪᓂᒃ ᐱᓇᓱᒐᕐᓂᖅ ᑌᒪᖕᖓᓕᒫᖕᖏᑑᒐᓗᐊᓂᒃ ᐃᓄᓕᕆᔨᐅᑎᑕᐅᔪᓂᒃ, ᑖᒃᑯᐊ ᐱᓇᓱᑦᑐᑦ ᐱᑦᔪᔭᐅᔪᓂᒃ ᐱᑐᑦᓯᒪᑎᑦᓯᔨᐅᓚᖔᓗᑎᒃ ᐃᓕᕐᕈᓯᕐᒧᑦ ᐊᓂᕐᕋᒥᓂᒃ ᕿᒣᒪᓂᕐᒥᓂ (ᐅᑦᑑᑎᒋᓗᒍ, ᐅᓂᒃᑳᑐᐊᕐᕕᐅᕙᓪᓗᑎᒃ, ᓂᕿᑐᐃᓐᓇᓂᒃ ᓂᕆᒐᑦᓴᓕᐅᕐᑎᑕᐅᓗᑎᒃ, ᐱᖕᖑᐊᕈᓯᑐᖃᕐᓂᒃ ᐊᑑᑎᑎᑕᐅᓗᑎᒃ, ᒥᕐᓱᑎᑕᐅᓗᑎᒃ ᓴᐸᖓᓕᕆᑎᑕᐅᓗᑎᓪᓗ, ᑲᑕᑦᔭᑎᑕᐅᓗᑎᒃ, ᖁᓪᓕᓴᔭᕐᓂᓗ ᓴᓇᖕᖑᐊᑎᑕᐅᓗᑎᒃ, ᐊᓯᖏᓐᓂᓗ), ᐃᓅᓱᑦᑐᐃᑦ ᐋᓐᓂᐊᓯᐅᕐᑎᓕᐊᕆᐊᖃᕐᐸᑕ, ᐃᕐᖃᑐᐃᕕᒻᒦᒋᐊᖃᕐᐸᑕᓗᓐᓃᑦ, ᒪᓕᑦᑕᐅᕙᓕᒻᒥᔪᑦ ᑐᓵᔨᖃᕆᐊᖃᕈᑎᓪᓗ ᑐᓵᔨᖃᕐᓱᑎᒃ ᑖᒃᑯᓂᖓ ᐃᓄᓐᓂᒃ, ᐱᓇᓱᐊᖃᑎᖃᕐᐸᑐᐃᑦ ᒪᑭᕝᕕᒥᒃ, ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓂᒃ ᐊᓯᖏᓐᓂᓗᓐᓃᑦ ᐃᓄᐃᑦ ᑎᒥᖁᑎᖏᓐᓂᒃ.

6. ᐃᕕᕐᑎᕆᕖᑦ ᐱᒍᑦᔨᐅᑎᖏᑦ ᐱᑦᓯᐊᖏᓐᓇᓕᒫᕐᐸᖏᑦᑑᒐᓗᐊᑦ, ᑭᓯᐊᓂ ᑐᓚᑦᑕᕕᐅᑉ ᐱᓇᓱᑦᑎᖏᑦ ᐱᕕᓕᒫᒥᒍᑦ ᐱᑦᓯᐊᓕᐅᒥᒐᓱᐊᕐᑐᑦ, ᐱᒍᑦᔨᓯᐊᓕᐅᒥᒐᓱᐊᕐᓱᑎᒃ ᐱᓇᓱᐊᕆᐊᓕᒻᒥᓄᓪᓗ ᑎᑭᐅᑎᒐᓱᐊᕐᓱᑎᒃ!

ᐃᕕᕐᑎᕆᕖᑦ ᐱᒍᑦᔨᐅᑎᖏᑦᑕ ᐱᒻᒪᕆᖁᑎᖏᑦ ᐅᑯᐊ:

ᐃᓅᖃᑎᖃᑦᓯᐊᓂᖅ-ᐅᑉᐱᕆᔭᖃᑦᓯᐊᓂᖅ-ᓲᓱᒋᔭᖃᑦᓯᐊᓂᖅ-ᓂᕆᐅᓐᓂᖃᕐᑎᓯᑦᓯᐊᓂᖅ-ᐊᔪᐃᓐᓇᐅᔨᓂᕐᓗ

ᐅᖃᐅᓯᕗᑦ ᐱᓇᓱᐊᕆᐊᓕᑦᑎᓄᑦ ᑎᑭᐅᑎᒐᓱᐊᓪᓚᕆᓐᓂᖅ ᑲᔪᖏᕐᓭᒍᑎᐅᔪᖅ ᐃᓅᓱᑦᑐᓂᒃ ᐱᒍᓐᓇᓯᑦᓯᐊᖁᓪᓗᒋᑦ ᑲᔪᓯᖁᓪᓗᒋᓪᓗ ᐃᓄᑦᓯᐊᖑᒐᓱᐊᕐᓂᒥᒃ.

ᐃᕕᕐᑎᕆᕖᑦ ᑐᑭᒧᐊᒍᑎᒋᑦᓱᒋᑦ ᑐᖕᖓᕕᓪᓚᕆᖏᑦ ᐱᔭᕆᐊᑐᔫᖕᖏᑐᑦ ᓱᓕᓪᓚᕆᑦᓱᑎᓪᓗ.

ᑐᑭᑖᕈᑎᕗᑦ ᐱᓇᓱᐊᕐᓂᕆᔭᕗᓪᓗ ᑐᖕᖓᕕᖃᕐᖁᑦ ᐃᓄᑦᓯᐊᖑᓂᕐᒥᒃ ᓲᓱᒋᔭᖃᑦᓯᐊᓂᕐᒥᓗ.

ᑲᒪᒋᔭᖃᕈᓯᕗᑦ ᓈᒃᑭᒍᓱᓐᓂᑰᕆᐊᓖᑦ ᐊᑑᑎᖏᓐᓇᓯᐊᕐᓗᑎᓪᓗ.

ᐱᓇᓱᑦᑎᕗᑦ ᐃᔨᕐᑐᐊᖃᕆᐊᖃᖕᖏᑐᑦ, ᐊᑦᑕᓇᖕᖏᑐᑦᓯᐊᖑᑎᑦᓯᓗᑎᓪᓗ

ᑲᒪᒋᔭᖃᕈᓯᓕᒫᕗᑦ ᐃᓕᓐᓂᐊᑎᑦᓯᓂᐅᒋᐊᓖᑦ, ᐊᓕᖏᑦᑖᑎᑦᓯᓂᐅᒍᓐᓀᓗᑎᒃ.

ᐃᓅᓱᑦᑐᓂᒃ ᐃᑲᔪᕐᐸᑐᒍᑦ ᐱᓀᓗᑕᐅᔪᓂᒃ ᐊᓂᒍᐃᒍᓐᓇᓯᑎᒋᐅᕐᓴᓱᒋᑦ, ᐃᒻᒥᓂᕿᒍᓐᓇᓯᑎᒐᓱᐊᕐᓱᒋᑦ ᐃᓚᐅᑎᑦᓱᒋᑦ ᑐᑭᑖᕈᑎᐅᒋᐊᓕᓕᒫᓂ .

ᐱᕕᓕᒫᒃᑯᑦ ᐃᓚᐅᑎᑦᓯᒐᓱᐊᕐᑐᒍᑦ ᐱᓇᓱᐊᖃᑎᖃᕐᓗᑕᓗ ᐃᓚᒋᔭᐅᔪᓂᒃ ᕿᑐᕐᖓᒥ ᐃᓅᓯᖓᓂᒃ ᓯᕗᓕᖃᑕᐅᑦᓯᐊᖁᓪᓗᒋᑦ.

ᓄᐃᑕᑎᑦᓯᒐᓱᐊᕐᑐᒍᑦ ᐱᕐᖁᓯᑐᖃᕐᓂᖅ, ᐃᓕᕐᕈᓯᕐᒥᒃ ᓄᓇᒥᓗ ᓱᓇᓱᐊᕐᑎᓯᓂᕐᒥᒃ, ᓂᕿᑐᐃᓐᓇᓂᒃ ᐃᓄᑦᑎᑑᕐᓂᒥᓪᓗ. ᓯᕗᓕᕈᒪᕗᒍᑦ ᐃᓄᑐᐃᓐᓇᐅᓂᕐᒥᒃ ᐅᐱᒍᓱᓐᓂᒥᒃ.

ᐃᑲᔪᕐᐸᑐᒍᑦ ᐱᐊᕋᕐᓂᒃ ᐃᓅᓱᑦᑐᓂᓪᓗ ᐱᒍᓐᓇᓂᕆᔭᒥᓂᒃ ᐅᑉᐱᕆᔭᖃᖁᓪᓗᒋᑦ, ᐅᖃᐅᑎᕙᑦᓱᒋᑦ ᑕᑯᓐᓇᕈᕕᐅᒃ, ᑌᒣᑦᑑᒍᓐᓇᖁᑎᑦ.

ᐊᔪᐃᓐᓇᖏᓐᓇᓕᒫᕐᑐᒍᑦ ᐱᑐᖃᑎᖃᑦᓯᐊᕈᒪᑦᓱᑕ ᐃᓅᓱᑦᑐᓂᒃ, ᐃᑲᔪᕐᓱᒋᓪᓗ ᐊᓯᒥᓂᒃ, ᐃᓚᒥᓂᒃ ᑲᒪᔨᒋᔨᒥᓂᓪᓗ ᐱᑐᖃᑎᖃᖁᓪᓗᒋ.

1. ᐃᓄᓕᕆᔩᑦ ᐃᓂᓪᓚᑕᐅᓯᒪᒍᓯᖃᕐᐳᑦ ᐃᑲᔪᕐᓯᔪᑦᓴᔭᐅᑦᓱᑎᒃ ᐃᓄᓕᒫᓂᒃ, ᓵᖕᖓᓯᒋᐊᖃᕐᓱᑎᒃ ᐊᒥᓱᓂ ᐊᑦᔨᒌᖕᖏᑐᓂᒃ ᐃᓅᓯᒃᑯᑦ ᐃᓱᒪᒃᑯᓗ ᐅᖁᒣᓪᓘᕈᑎᐅᔪᓂᒃ. ᑕᒪᒃᑯᐊ ᐱᒍᑦᔨᐅᑏᑦ ᐋᕐᕿᑕᐅᒪᓲᑦ ᑲᒪᒋᐊᖃᕈᑎᐅᑦᓱᑎᒃ ᐊᑦᔨᒌᖕᖏᑐᓂᒃ ᑭᖕᖒᒪᑦᓯᒍᑎᐅᔪᓂᒃ , ᖃᐅᑕᒫᑦ ᑲᒪᒋᔭᐅᒍᓯᐅᒋᐊᓕᓐᓂᑦ ᐱᒻᒪᕆᖑᕈᓐᓇᑐᓄᑦ ᑎᑭᐅᑎᔪᓄᑦ, ᐃᓚᒋᔭᐅᑎᓪᓗᒋᑦ ᐊᑦᑕᓇᕐᑐᒦᑐᐃᓐᓇᕆᐊᓖᑦ ᖁᐊᕐᓵᓇᕐᑐᒥᑐᐃᓪᓗ.

ᖃᓄᐃᑐᑐᐃᓐᓇᑯᑦ ᐱᓇᓱᒍᓐᓇᓂᒃᑯᑦ ᐊᑐᐃᓐᓇᐅᓯᐊᕐᓂᑯᓪᓗ, ᐃᓄᓕᕆᔩᑦ ᐱᓇᓱᐊᒐᖃᓪᓚᕆᒃᑯᑦ ᐃᑲᔪᕐᓯᒪᔨᐅᑦᓱᑎᒃ ᐃᒻᒥᒎᓇᕐᑎᑐᓂᒃ ᐃᓚᒌᓂᓪᓗ ᐊᓂᒎᑎᑎᒐᓱᐊᕐᓱᒋᑦ ᐊᑦᓱᕈᕐᓇᑐᓂᒃ, ᓴᐱᓕᕐᓯᕇᑦᑑᑎᒐᓱᐊᕐᓱᒋᑦ ᐃᓗᓐᓈᒍᓪᓗ ᖃᓄᐃᖕᖏᓯᐊᕐᑑᑎᒐᓱᐊᕐᓱᒋᑦ.

ᐃᓄᓕᕆᔩᑦ ᑫᓪᓗᑐᐃᔨᐅᕗᑦ ᑲᔪᓯᑎᑦᓯᔨᐅᑦᓱᑎᓪᓗ ᓯᕗᕐᖐᓯᒪᒐᓱᐊᕈᑎᐅᔪᓂᒃ ᐱᕙᓪᓕᑎᑦᓯᓂᐊᕐᑐᓂᒃ ᓄᓇᓕᓐᓂ ᐅᖓᕙᓕᒫᒥ.

ᐃᓄᓕᕆᔩᑦ ᐱᓇᓱᐊᕈᑦᔨᕙᑦᑐᑦ ᐊᒥᓱᓂ: ᐱᐊᕋᕐᓂᒃ, ᐃᓅᓱᑦᑐᓂᒃ, ᐃᓚᒌᓂᒃ, ᐃᓄᒻᒪᕆᓐᓂᒃ ᐃᓄᑐᖃᕐᓂᓗ.

ᐊᕐᕋᒎᑉ ᐃᓗᐊᓂ, ᐱᓇᓱᐊᖃᑎᖃᕐᐸᑐᒍᑦ ᐅᑯᓂᖓ:

• ᐃᕐᓂᓱᑦᓰᔨᓂᒃ, ᐃᓚᒌᓪᓗᑖᒃᑯᓂᒃ, ᐊᓐᓂᐊᓯᐅᕐᑎᓂᒃ, ᐃᓅᓱᑦᑐᓂᒃ ᓴᐳᒻᒥᔨᓂᒃ, ᐋᓐᓂᐊᓯᐅᕐᑎᒪᕆᓐᓂᒃ
  
  
• ᑲᑎᕕᒃ ᐃᓕᓴᕐᓂᓕᕆᔨᒃᑯᓂᒃ, ᐃᓚᒌᑦ ᐃᓪᓗᖁᑎᖏᓐᓂᒃ, ᓄᓇᒦᒃᑯᓂᒃ ᐊᓯᖏᓐᓂᓗ ᓄᓇᓕᒻᒥ ᑎᒥᖁᑎᒋᔭᐅᔪᓂᒃ

  ᐃᓄᓕᕆᔩᑦ ᐃᑲᔪᕐᓯᐸᒻᒥᔪᑦ ᐃᓕᓐᓂᐊᕕᒻᒧᑦ ᐅᑎᕋᓱᐊᕐᑐᓂᒃ, ᐃᓚᐅᖏᓐᓇᐸᑦᓱᑎᓪᓗ ᓄᓇᓕᒻᒥ ᓱᓇᓱᐊᕐᑐᓄᑦ, ᐊᑕᐅᑦᓯᑯᑦᑯᓄᑦ, ᑐᑭᒧᐊᑦᑎᓯᖃᑎᐅᕙᑦᑐᑦ ᓱᖃᑦᓯᑎᑦᓯᒍᑎᐅᔪᓂᒃ ᐅᐱᕐᖓᓴᒥ, ᐃᓄᒻᒪᕆᓐᓂᒃ ᐊᓃᕐᑎᓯᖃᑎᐅᑦᓱᑎᓪᓗ, ᓂᕿᓂᓪᓗ ᐁᑦᑐᑎᑦᓴᐅᔪᓂᒃ ᐊᑐᐃᓐᓇᐅᑎᑦᓯᓱᑎᒃ, ᐃᓅᓯᕐᒥᓗ ᑭᐱᓯᑦᑌᓕᓂᐅᑉ ᐅᓪᓗᖁᑎᖓᓄᑦ ᐃᓚᐅᕙᑦᓱᑎᒃ.
  

2. ᐊᓂᕐᕋᓯᒪᔪᓂᒃ ᑲᒪᒋᔭᖃᕐᓂᖅ ᐱᑕᖃᕐᒥᔪᖅ ᓄᓇᓕᓕᒫᓂ ᐊᕐᕌᒍᓕᒫᑦᓯᐊᒥ ᐃᑲᔪᕐᑕᐅᕙᑦᑐᐃᑦ ᐃᓄᐃᑦ ᑭᖕᖒᒪᒋᔭᖏᑎᒍᑦ ᐃᓚᐅᑎᖏᓐᓇᕋᓱᐊᕐᓱᒋᓪᓗ ᓄᓇᓕᒋᔭᒥᓂ.

ᐱᓇᓱᐊᖃᑎᖃᕐᓱᑎᒃ ᐃᓄᓐᓂᒃ ᐱᕐᖃᔭᑦᓯᐊᕈᓐᓀᑐᓂᒃ, ᑐᓚᕕᐅᑉ ᐱᓇᓱᑦᑎᖏᑦ ᓲᓱᒋᔭᖃᑦᓯᐊᐸᑦᑐᑦ, ᖃᐅᔨᒪᔭᐅᒋᐊᖃᖕᖏᑐᓂᓪᓗ ᐃᑉᐱᒋᔭᖃᑦᓯᐊᓱᑎᒃ, ᐃᔨᕐᑐᐊᖃᕐᓂᑰᕋᑎᒃ, ᐊᑐᐃᓐᓇᐅᓯᐊᕐᓱᑎᒃ, ᓱᓕᓂᖃᑦᓯᐊᓱᑎᒃ, ᒪᑭᑕᑎᑦᓯᓯᐊᕋᓱᐊᕐᓱᑎᒃ ᓈᒃᑭᒍᓱᓐᓂᖃᕐᓱᑎᒃ ᐱᑦᓯᐊᑐᒃᑯᓗ ᑲᒪᒋᔭᖃᕐᓱᑎᒃ.

ᑐᓚᑦᑕᕕᐅᑉ ᐱᓇᓱᑦᑎᖏᑦ ᐅᑯᓂᖓ ᐊᑐᐃᓐᓇᐅᑎᑦᓯᔪᑦ:

• ᐃᓄᓕᕆᔭᐅᔭᕆᓕᐊᓐᓂᒃ ᖃᐅᔨᓴᕐᓂᖃᕐᓱᑎᒃ ᐃᑲᔪᕐᓱᒋᓪᓗ
• ᐋᓐᓂᐊᓯᐅᕆᑦᓱᑎᒃ ᐃᓅᒍᓐᓀᓚᖓᓕᕐᑐᓂᓪᓗ ᑲᒪᒋᔭᖃᕐᓱᑎᒃ
• ᐃᑲᔪᕐᓯᕙᑦᑐᑦ ᐅᓯᑲᑦᑕᑕᐅᔪᖃᕆᐊᖃᓕᕐᒪᑦ
• ᓂᕆᑎᑦᓯᕙᑦᑐᑦ ᐅᖁᒻᒥᓗᒐᑦᓴᖃᕐᑎᓯᑦᓱᑎᓪᓗ
• ᓴᓗᒻᒪᓭᔩᑦ ᐅᕝᕙᑏᓪᓗ
• ᐃᑲᔪᕐᓯᕙᑦᑐᑦ ᖃᐅᑕᒫᑦ ᓱᖃᑦᓯᒍᑎᑦᓴᖏᓐᓂᒃ ᐃᓕᖓᑎᑦᓱᒋᑦ ᐊᑐᓂ ᐃᓅᑉ ᑭᖕᖑᒪᒋᔭᖏᓐᓄᑦ
• ᑕᑯᔭᐅᔪᑦᓴᓕᐅᕐᐸᑐᑦ ᐋᓐᓂᐊᓯᐅᕐᑎᒪᕆᓐᓄᑦ ᐱᓪᓗᑯᒋᐊᓕᕐᑎᒍᓪᓗ ᐋᓐᓂᐊᓯᐅᕐᑕᐅᒋᐊᓕᓐᓂᒃ
• ᐃᑎᒐᓕᕆᕙᑦᑐᑦ
• ᐃᑲᔪᕐᓯᒪᕙᑦᑐᑦ ᑲᒪᔨᐅᑎᑕᐅᔪᓂᒃ
  

ᓄᓇᓕᒻᒥ ᐱᒍᑦᔨᔩᑦ ᑌᒪᖕᖓᓕᒫᑦᓯᐊᖅ ᐊᖏᓕᕙᓪᓕᐊᑐᐃᓐᓇᑐᑦ ᓵᖕᖓᓯᑦᓯᐊᕋᓱᐊᕐᓱᑎᒃ ᐃᓄᐃᑦ ᑭᖕᖑᒪᑦᓯᓂᖓᓂᒃ.

ᐱᐊᕃᑦ ᑲᒪᒋᔭᐅᔪᑦ ᓴᐳᒻᒥᔨᒃᑯᓄᑦ ᐃᓱᐃᑦᑐᑰᕐᓂᒦᑦᑐᑦ ᓴᐳᑎᓯᒪᔭᐅᒋᐊᖃᕐᓱᑎᓪᓗ.

ᐃᓅᓱᑦᑐᓂᒃ ᓴᐳᒻᒥᔩᑦ ᐱᓇᓱᑦᑎᖏᑦᑕ ᑲᒪᒍᓯᖏᑦ ᑐᕋᕋᒐᖃᕐᑐᑦ ᐅᑯᓂᖓ

• ᐃᓱᓕᑎᒐᓱᐊᕐᓱᒍ ᖃᓄᐃᓕᖓᔪᒦᓐᓂᖓ ᐱᐊᕋᐅᑉ ᐊᑦᑕᓇᕐᑐᒦᖁᓇᒍ ᑲᑉᐱᐊᓇᕐᑐᒦᖁᓇᒍᓗ ᐱᕙᓪᓕᐊᓯᐊᕆᐊᖃᕐᓂᖓ
• ᖃᓄᐃᓕᖓᔪᒦᑦᑎᑕᐅᓯᒪᓂᖓᓗ ᐊᑑᑎᒋᐊᓪᓚᑎᑦᑌᓕᑦᓱᒍ

ᓯᕗᓪᓕᐹᖅ ᑐᕋᒐᐅᔪᖅ ᑖᓐᓇ ᐱᐊᕋᖅ ᐃᓚᒥᓃᖏᓐᓇᓯᐊᕐᑎᒐᓱᐊᕐᓱᒍ ᐱᕕᖃᕐᐸᑦ ᓇᒻᒪᑑᑉᐸᓗ.

ᑭᓯᐊᓂ, ᑐᑭᑖᕐᑕᐅᒍᓐᓇᒥᔪᖅ ᐱᐊᕋᖅ ᐊᓯᐊᓂᒃ ᐃᓂᖃᕐᑐᓴᐅᓂᖓ. ᑌᒣᓕᖓᑉᐸᑦ, ᓴᐳᒻᒥᔩᑦ ᐃᕐᖃᑐᐃᕕᓪᓗᓃᑦ ᕿᒥᕐᕈᕆᐊᖃᕐᐸᑐᑦ ᐱᐊᕋᖅ ᑲᒪᒋᔭᐅᔪᑦᓴᐅᒪᖔᑦ ᐃᓄᓐᓂ ᐱᒻᒪᕆᐅᔪᓂ ᐃᓅᓯᖓᓂ, ᐅᑦᑑᑎᒋᓗᒍ ᐊᓈᓇᑦᓯᐊᑯᖏᓐᓂ ᐅᕝᕙᓗᓐᓃᑦ ᐊᓯᖏᓐᓂ ᐃᓚᒋᔭᒥᓂ. ᓴᐳᒻᒥᔩᑦ ᕿᒥᕐᕈᐸᑦᑐᑦ ᑖᒃᑯᓂᖓ ᐃᓚᒋᔭᐅᔪᓂᒃ ᐊᑐᐃᓐᓇᐅᓯᐊᕋᓗᐊᕐᒪᖔᑕ ᑲᒪᒋᔭᖃᑦᓯᐊᕈᓐᓇᒪᖔᑕᓗ ᐱᐊᕋᕐᒥᒃ.

ᐱᐊᕋᖅ ᖃᓂᑕᕆᔭᒥᓃᒋᐊᓪᓚᕕᖃᖕᖏᐸᑦ ᐱᕕᖃᖕᖏᓗᑐᕐᐸᓗ, ᐊᓯᐊ ᐃᓂᑦᓴᐅᒐᔭᕐᑐᖅ ᓇᕝᕚᑕᐅᒐᓱᐊᓲᖅ ᐃᑉᐱᒋᓪᓗᒋᑦ ᐱᐊᕋᐅᑉ ᑭᖕᖑᒪᒋᔭᖏᑦ.

ᐊᕐᕌᒎᑫᓐᓇᑐᒥ, ᓴᐳᒻᒥᔩᑦ ᐱᓇᓱᐊᖃᑎᖃᕐᓯᒪᓕᕐᑐᑦ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓂ, ᐃᓅᓯᕐᒥᓗ ᖃᓄᐃᓕᖓᒍᑎᐅᓂᐊᕐᑐᓂᒃ ᕿᒥᕐᕈᔨᐅᔪᓂᒃ ᑲᑎᑦᑕᑎᓂᒃ ᐊᓂᕐᕋᐅᓚᐅᕐᑐᕈᓐᓇᑐᓂᓪᓗ ᐱᓇᓱᐊᖃᑎᖃᓲᓂᒃ ᑫᓪᓗᑐᐃᒍᑎᒋᑦᓱᒋᑦ ᐃᓕᕐᕈᓯᒃᑯᑦ ᐊᑦᑕᓇᖕᖏᑐᑦᓯᐊᓂᒃ ᑲᒪᒍᓯᖃᖁᓪᓗᒋᑦ ᐅᕕᒐᕐᑐᓂᒃ ᓴᐳᒻᒥᔩᑦ.

ᐱᒻᒪᕆᐊᓗᒻᒥᒃ ᑭᖕᖑᒪᑦᓯᓂᖃᕐᖁᒍᑦ ᐊᓂᕐᕋᐅᓚᐅᕐᑐᕈᓐᓇᑐᓂᒃ ᐅᖓᕙᒥ.

• 2024-2025-ᒥ, 289 ᐱᐊᕃᑦ ᐊᓂᕐᕋᐅᓚᐅᕐᑐᑐᓃᑦᑐᕕᓃᑦ. 183 ᐅᖓᕙᒨᕐᑕᐅᔪᕕᓃᑦ, 98 ᖃᓪᓗᓈᓄᕐᑕᐅᑎᓪᓗᒋᑦ 8-ᓗ ᑕᓯᐅᔭᕐᔪᐊᒨᕐᑕᐅᑎᓪᓗᒋᑦ.

ᓴᐳᒻᒥᔩᑦ ᑲᒪᒋᔭᖃᕐᐸᒥᔪᑦ ᐃᓅᓱᑦᑐᓂᒃ ᐱᓂᕐᓗᓯᒪᔪᕕᓂᕐᓂᒃ ᐱᖁᔭᕐᑎᒍᑦ ᐱᓂᕐᓗᕆᐊᓪᓛᑎᑦᓯᑌᓕᒐᓱᐊᒧᑦ ᐃᓅᓱᑦᑐᓂᒃ ᓇᐅᓕᒫᓪᓗ ᐊᑦᑕᓇᕐᑐᒦᓚᕿᖁᓇᒋᑦ.

ᑐᓚᑦᑕᕕᐅᑉ ᐱᓇᓱᑦᑎᖏᑦ ᐱᓇᓱᐊᕐᒪᕆᑉᐸᑐᑦ ᑫᓪᓗᑐᐃᒐᓱᐊᕐᓱᑎᒃ ᐅᕕᒐᕐᑐᑦ ᐃᕕᕐᑎᑕᐅᒍᑎᖏᓐᓂᒃ ᐃᓚᐅᒍᓐᓇᓯᑦᓯᐊᖁᓪᓗᒋᓪᓗ ᐃᓅᖃᑎᒥᓄᑦ. ᑲᒪᒋᔭᖃᕈᓯᖃᕐᐸᑐᑦ ᐱᒻᒪᕆᓐᓂᒃ ᐱᓂᕐᓗᒪᕆᑦᑐᕕᓂᕐᓂᒃ ᑎᒍᔭᐅᒪᓚᕿᑎᑦᓯᑌᓕᒐᓱᐊᕐᓱᑎᓪᓗ ᐃᓅᓱᑦᑐᓂᒃ ᐃᕐᓯᓇᕿᓐᓂᖏᑦᑐᓂᒃ.

• 2024-2025-ᒥ, 62-ᓂᒃ ᐱᖁᔭᑎᒍᑦ ᐱᓂᕐᓗᓯᒪᔪᕕᓂᕐᓂᒃ ᐱᒍᑦᔨᓯᒪᔪᒍᑦ. 2023-2024-ᒥ ᑌᒣᓪᓗᐊᑐᑦᓭᓇᐅᓯᒪᔪᑦ.
• 62-ᓂ ᑲᒪᒋᔭᑦᑎᓂ, 29 ᓱᕈᓰᑦ 33-ᓗ ᓂᕕᐊᕐᓯᐊᑦ.
• 23-ᖑᓯᒪᔪᑦ ᓄᓇᓕᒻᒥ ᐱᓇᓱᐊᕐᑎᑕᐅᔪᑦ ᑎᒍᔭᐅᒪᓚᕿᖕᖏᓱᑎᒃ ᐃᑭᓪᓕᐅᒥᓯᒪᔪᑦ 4-ᖕᖑᓱᑎᒃ.
  

ᓴᐳᒻᒥᔩᒃᑯᑦ ᐃᓱᒫᓗᓐᓇᑐᒦᑦᑐᑦ:

• ᐱᓇᓱᖕᖏᑑᓚᕿᒋᐊᖃᕐᐸᑐᑦ ᖃᓂᒪᒧᑦ ᑕᖃᓂᕐᒧᓗᓐᓃᑦ
• ᐱᓇᓱᑦᑎᖃᑯᑖᕐᖃᔭᖕᖏᑐᒍᑦ ᓄᕐᖃᑲᑦᑕᑐᓄᑦ
• ᑖᒃᑯᐊᓗ ᐱᒍᑦᔨᐅᑎᐅᒋᐊᓕᓐᓄᑦ ᑲᔪᓯᖕᖏᓚᕿᐅᑎᐅᒍᓐᓇᓱᑎᒃ

ᓯᕗᓂᖃᕋᓱᐊᕐᑐᒍᑦ ᐱᓇᓱᑦᑎᖃᑯᑖᑦᓯᐊᓕᐅᒥᒐᓱᐊᕐᓂᒥᒃ.