ᐅᓂᒃᑳᑐᖅ ᑕᕐᕋᓕᔮᓕᐊᖅ ᐊᓐᓂᐊᕕᐊᐱᖏᓐᓂ ᑐᓚᑦᑕᕕᐅᑉ
ᑫᕙᓪᓚᒍᓯᓕᒫᕐᑐᑐᖅ ᑕᕐᕋᓕᔮᕋᖅ
ᐊᑐᐃᓐᓇᐅᖏᓐᓇᓕᒫᕐᑐᖅ ᐅᕙᓂ tou.tv
ᓄᐃᑕᑎᑕᐅᔪᖅ ᑕᓚᕖᓴᒃᑯᑦ ᐅᕙᓂ Doc humanité series ᐊᓪᓕᖏᓱᖓᕐᒥ, ᔭᓄᐊᕆ 20-ᐅᓕᕐᐸᑦ
ᑕᕐᕋᓕᔮᓕᐊᖑᓯᒪᔪᖅ ᑲᖏᕐᓱᔪᐊᒥ, ᑲᖏᕐᓱᒥ ᑯᑦᔪᐊᒥᓗ ᐁᕆᓕᐅᑎᓪᓗᒍ 2023-ᒥ, ᑖᓐᓇ ᐅᓂᒃᑳᑐᖅ ᑌᔭᐅᔪᖅ ᓂᐲᑦ ᓂᐊᖁᕋᓂ ᕿᒥᕐᕈᑐᖅ ᐃᓱᒪᓕᕆᔭᐅᓂᕐᒧᑦ ᐱᑦᔪᔨᒍᑎᐅᔪᓂᒃ ᐊᑐᐃᓐᓇᐅᔪᓂᒃ ᓄᓇᕕᒻᒥᐅᓄᑦ. ᑖᓐᓇ ᑐᑭᓯᓇᕐᑎᓯᔪᖅ ᐃᓱᒪᒃᑯᑦ ᖃᓄᐃᖕᖏᓯᐊᕆᐊᖃᕐᓂᖅ ᑕᒪᒃᑯᐊᓗ ᐱᑦᔪᔨᒍᑎᐅᔪᑦ ᐃᑲᔪᕐᓯᒍᑎᐅᑦᓱᑎᒃ ᓴᐳᒻᒥᒍᑎᐅᑦᓱᑎᓪᓗ ᑲᒪᒋᔭᐅᔭᕆᐊᓕᓐᓂᒃ ᖃᓄᖅ ᐃᓱᒪᒋᔭᐅᒻᒪᖔᑕ ᐃᓄᓐᓄᑦ. ᓄᐃᑕᑎᑦᓯᒍᑎᐅᔪᖅ ᐃᓱᒪᒃᑯᑦ ᐅᖁᒣᓪᓘᕈᑕᐅᕙᑦᑐᓂᒃ ᓄᓇᕕᒻᒥ, ᐃᓕᖓᑦᓱᑎᒃ ᖁᐊᕐᓵᓇᕐᑐᑰᕐᐸᓂᖏᓐᓄᑦ ᐱᑦᔪᔭᐅᑦᑕᑐᐃᑦ.
ᑯᐯᒻᒥ ᓯᕿᓂᕐᒥᐅᓂᒃ ᑐᑭᓯᒪᑎᑦᓯᒐᓱᐊᕈᑎᐅᑦᓱᓂ ᐊᑑᑎᔭᐅᕙᑦᑐᓂᒃ ᐅᑭᐅᕐᑕᑐᒥᐅᓄᑦ, ᑖᓐᓇ ᑕᕐᕋᓕᔮᖅ ᑐᑭᓯᓇᕐᑎᓯᔪᖅ ᖃᐅᑕᒫᑦ ᐱᓇᓱᐊᕐᓂᕆᕙᑦᑕᖓᓂᒃ ᐅᖓᕙᐅᑉ ᐱᓇᓱᑦᑎᖏᑦᑕ, ᐱᓇᓱᐊᖃᑎᖃᕐᓱᑎᒃ Dr. Marie-Eve Cotton-ᒥᒃ ᐃᓱᒪᓕᕆᔨᒥᒃ ᐱᓇᓱᐊᕐᓯᒪᓕᕐᑐᒥᒃ ᐅᑭᐅᕐᑕᑐᒥᒃ ᐊᕐᕌᒍᐃᑦ 20 ᐅᖓᑖᓄᑦ.
ᐃᓱᒪᒃᑯᑦ ᖃᓄᐃᒍᑎᖃᕐᓂᖅ ᐊᑦᔨᒌᖕᖏᑐᓂᒃ ᑲᒪᒋᔭᐅᒍᓯᖃᓲᖑᕗᖅ ᐃᓅᓯᖃᑎᒌᖕᖏᑐᕐᑎᒍᑦ ᐅᑉᐱᓂᕐᒧᐊᓕᖓᕈᓐᓇᓱᓂᓗ ᐃᓚᖏᓐᓂ ᓄᓇᓕᓐᓂ. Dr. Cotton ᐅᑉᐱᕆᔭᖃᕐᐳᖅ ᐱᒻᒪᕆᐅᓂᖓᓂᒃ ᐱᓇᓱᐊᕈᑎᖃᕈᓐᓇᕆᐊᖃᕐᓂᒥᒃ ᐃᓕᕐᖁᓯᒃᑯᑦ ᐅᑉᐱᕆᔭᐅᔪᓂᒃ ᐊᓐᓂᓇᕐᑐᖁᑕᐅᔪᓂᓪᓗ ᐊᑦᔨᐅᖏᑦᑐᓂᒃ ᖃᓪᓗᓈᑦ ᓄᓇᖓᓂᑦ.
ᐊᒥᓱᕕᑦᓱᓂ ᐅᑭᐅᕐᑕᑐᓕᐊᖃᑦᑕᓱᓂ, Dr. Marie-Eve Cotton ᑐᑭᓯᑦᓴᐅᑎᒋᐊᐱᑦᓯᒪᕗᖅ ᓄᓇᖃᕐᖄᓯᒪᔪᐃᑦ ᓄᓇᓕᖁᑎᖏᑦ ᐊᑦᔨᐅᖏᑦᑐᒪᕆᒻᒥᒃ ᐃᓅᒐᓱᐊᕐᓂᖃᕆᐊᖏᓐᓂᒃ. ᐃᓱᒪᒃᑯᑦ ᖃᓄᐃᒍᑎᓕᓐᓂᒃ ᑲᒪᒋᔭᖃᕈᓯᖓ ᐅᑭᐅᕐᑕᑐᒥᐅᓂᒃ ᐊᑦᔨᒋᔭᐅᖕᖏᓯᐊᕐᑐᖅ ᐱᓇᓱᐊᕈᓯᕆᓲᒥᓄᑦ ᒪᓐᑐᕆᐊᒦᓕᑐᐊᕋᒥ.
ᖃᐅᔨᒪᔭᐅᑎᑦᓯᒐᓱᐊᕐᓂᖅ
ᐱᒻᒪᕆᐅᕗᖅ ᖃᓄᐃᖕᖏᓯᐊᖁᓪᓗᒋᑦ ᓄᓇᕕᒻᒥᐅᑦ, ᐃᓱᒪᒃᑯᓗ ᖃᓄᐃᖕᖏᓯᐊᕐᓂᖅ ᐱᒻᒪᕆᐅᒋᕗᖅ ᑎᒥᒃᑯᑦ ᖃᓄᐃᖕᖏᓯᐊᕐᓂᑎᑐᑦ. ᑐᓚᑦᑕᕕᐅᑉ ᐱᓇᓱᐊᕐᑎᖏᑦ ᐃᑲᔪᕐᐸᑐᑦ ᐃᓄᓐᓂᒃ ᓵᖕᖓᓯᒍᓐᓇᓯᖁᓪᓗᒋᑦ ᐊᓂᒎᑎᖁᓪᓗᒋᓪᓗ ᖁᐊᕐᓵᓇᕐᑐᑯᕈᑕᐅᕙᑦᑐᓂᒃ ᐃᓱᒪᒃᑯᓗ ᖃᓄᐃᒍᑎᐅᔪᓂᒃ ᑲᒪᒋᔭᖃᕐᕈᓐᓇᓯᒐᓱᐊᕐᓱᑎᒃ. ᓱᓇᐅᕚ ᐃᓱᒪᒃᑯᑦ ᖃᓄᐃᒍᑎᖃᕐᓂᖅ? ᐃᓱᒪᒃᑯᑦ ᖃᓄᐃᒍᑎᖃᕐᓂᖅ ᓱᕐᕃᓯᒪᒍᑎᐅᒍᓐᓇᑐᖅ ᐃᓅᑉ ᐃᓱᒪᒍᓯᖓᓂᒃ, ᐃᑉᐱᓂᐊᕐᓂᖓᓂᒃ ᖃᓄᐃᓘᕈᓯᖓᓂᓪᓗ. ᐊᒥᓱᒻᒪᕆᐅᕗᑦ ᐃᓱᒪᒃᑯᑦ ᖃᓄᐃᒍᑎᐅᒍᓐᓇᑐᑦ, ᐊᒻᒪᓗ ᓯᕗᕐᖐᓯᒪᒐᓱᐊᕈᑏᑦ ᑲᒪᒋᔭᖃᕈᑎᐅᒍᓐᓇᑐᓪᓗ ᐃᑯᓪᓚᐅᒥᑎᑦᓯᒍᑎᐅᒍᓐᓇᖁᑦ ᐃᓚᖓᓂᓗ ᖃᓄᐃᒍᓐᓀᓚᕿᒍᑎᐅᒍᓐᓇᓱᑎᒃ.
ᑖᓐᓇ ᑕᕐᕋᓕᔮᓕᐊᖅ ᓄᐃᑕᑎᑦᓯᔪᖅ ᓄᓇᖃᕐᑳᓯᒪᔪᑦ ᐃᓕᕐᕈᓯᖓᓂ, ᐅᑉᐱᕈᓯᖓᓂᒃ ᐊᓐᓂᓇᕐᑐᖁᑎᖏᓐᓂᓗ ᐊᑐᕐᑕᐅᒍᓐᓇᕆᐊᖏᓐᓂᒃ ᑲᒪᒋᔭᖃᕐᓂᑯᑦ ᐃᓱᒪᐅᑉ ᖃᓄᐃᒍᑎᖏᓐᓂᒃ. ᐃᓕᑦᓯᒍᑎᐅᒍᓐᓇᒥᔪᖅ ᐱᓇᓱᒍᓐᓇᐅᑏ ᐱᓇᓱᑦᑏᓗ ᐊᒥᒐᕐᑐᒪᕆᐅᓂᖓᓂᒃ, ᑲᑎᓯᓂᐅᓗᓂᓗ ᐃᓄᓐᓂᒃ ᒪᒥᓴᕐᓂᒦᑦᑐᓂᒃ ᐊᒻᒪᓗ ᐊᐅᓚᑦᔭᕆᐊᕈᑎᑦᓯᐊᖑᓯᒪᔪᓂᒃ ᓄᐃᑕᐅᓯᒪᔪᓂᒃ ᓄᓇᕕᒻᒥ.
