ᑖᓐᓇ ᐊᑦᑕᓇᖕᖏᑐᑦᓯᐊᖅ, ᑐᖕᖓᓇᕐᑑᓱᓂ ᐃᓕᖓᔪᖅ ᓇᔪᕋᑦᓴᔭᐅᑦᓱᓂ ᐱᒍᑦᔨᕙᑦᑕᑎᓐᓄᑦ ᐊᑐᕐᑎᑎᓐᓄᓗ.
ᑐᓚᑦᑕᕕᒃ ᓇᑯᕐᒥᑐᖅ ᒪᙯᕝᕕᓕᐊᕐᓯᒪᔪᒥᒃ ᓯᐊᓯ ᑯᔩᒥᒃ ᔨᐊᓂᕗ ᓃ ᐊᓐᔩᒥᓪᓗ, ᐃᓗᒋᔭᐅᔪᓂᒃ ᑲᒪᔨᐅᔪᒥᒃ, ᑐᖕᖓᓱᑦᑎᓯᓚᐅᕐᒪᓂᒃ ᑕᒡᒐᓂ ᒪᙯᕝᕕᒥ ᕿᒥᕐᕈᑎᑦᓯᓱᑎᒃ ᑲᒪᔨᒻᒪᕆᑦᑎᓂᒃ ᓛᔨ ᒍᐊᑦᒥᒃ, ᔪᓓ 1, 2026-ᖑᑎᓪᓗᒍ. ᑖᓐᓇ ᑲᑎᓐᓂᖅ ᐱᕕᖃᕐᑎᓯᓚᐅᕐᑐᖅ ᕿᒥᕐᕈᓂᕐᒥᒃ ᐊᑦᔨᐅᖏᑦᑐᒥᒃ ᐃᓅᓯᖃᕐᑎᓯᕕᖓᓂᒃ ᑕᑦᓱᒪ ᒪᙯᕝᕕᐅᑉ ᐅᖄᖃᑎᖃᕐᓂᐅᓱᓂᓗ ᐊᒥᓱᒐᓚᓐᓂᒃ ᓄᓇᕕᒻᒥᐅᓂᒃ ᐊᓕᐊᑦᓯᐊᒪᕆᑦᑐᓂᒃ ᐅᐱᕐᖔᓯᐅᕆᐊᖅ ᑌᑲᓂ. ᐊᒥᓱᑦ ᖁᖓᓐᓃᑦ, ᐅᖄᖃᑎᒌᓐᓃᑦ ᑐᖕᖓᓇᕐᑑᓂᖓᓗ ᑕᑯᑦᓴᐅᑎᑦᓯᕗᑦ ᑕᒪᑦᓱᒥᖓ ᐊᑦᔨᖃᕋᓂ ᐃᑲᔪᖃᑎᒌᓐᓂᐅᔪᒥᒃ, ᑐᓚᑦᑕᕕᐅᑉ ᐱᒍᑦᔨᓲᖏᑦ ᐊᑐᕐᑎᖏᓪᓗ ᐊᑑᑎᒍᓐᓇᑎᑕᐅᓲᖑᒻᒪᑕ ᕿᑲᕆᐊᕐᑐᓯᒪᓂᕐᒥᒃ ᐊᑦᑕᓇᖕᖏᑐᑦᓯᐊᒥ, ᐃᓂᓪᓚᑎᕐᑕᐅᒪᒍᓯᖃᑦᓯᐊᑐᒥ ᑲᒪᒋᔭᐅᕕᑦᓯᐊᒥ ᐊᕐᕋᒍᐃᑦ 20 ᐅᖓᑖᓅᓕᕐᑐᖅ.
ᕿᑲᕐᓇᖅ ᐃᓕᖓᓕᕐᒪᑦ ᐊᓕᐊᓐᓂᒧᑦ Massawippi ᒪᙯᕝᕕᖓᓂ
ᐊᒥᓱᓄᑦ ᐱᒍᑦᔨᕙᑦᑕᑎᓐᓄᑦ, ᐊᑐᕐᑎᐅᔪᓄᑦ ᐃᓱᕐᕆᕕᒻᒥᐅᓄᓪᓗ, ᕿᑲᕆᐊᕐᑐᓯᒪᓂᑦ Massawippi-ᒥ ᐅᐱᕐᖔᓯᐅᕆᐊᕐᑐᓯᒪᓂᑐᐃᓐᓇᐅᖏᓪᓚᖅ. ᑐᑭᖃᕐᐳᓕ ᕿᓚᓇᕆᔭᐅᓲᖑᓂᖓᓂᒃ, ᐊᑑᑎᔭᐅᖏᓐᓇᓕᒫᓱᖑᓂᖓᓂᒃ ᐊᕐᕌᒍᑕᒫᑦ ᐃᓕᖓᓪᓚᕆᑦᑐᒥᒃ ᖁᕕᐊᓇᕐᑐᒦᓐᓂᒧᑦ, ᑲᑎᖃᑎᒌᓐᓂᒧᑦ, ᑕᑯᒋᐅᕐᓂᒧᑦ ᓄᓪᓚᖓᑫᓐᓇᓂᑦᓯᐊᖑᔪᓄᓪᓗ.
ᐅᐱᕐᖓᓴᑦᓴᑐᐊᕐᒪᑦ, ᕿᓚᓈᕐᑐᑦ ᐃᑉᐱᓇᕐᓯᓲᑦ. ᐊᒥᓱᑦ ᐅᖃᐅᓯᖃᓯᑦᓴᐅᑎᒋᓲᑦ ᐊᐅᓪᓚᓂᕆᓛᕐᑕᒥᓂᒃ, ᐊᐅᓚᔨᔭᒥᓂᓪᓗ ᐅᐱᕐᖔᓯᐅᕐᓂᒋᖃᑦᑕᓯᒪᔭᒥᓂᒃ ᐅᓂᒃᑲᐅᓯᑦᓴᖃᓯᑦᓱᑎ ᑭᓯᑦᓯᓕᕐᓱᑎᓪᓗ ᐱᓇᓱᐊᕈᓯᕐᓂᒃ ᐅᑎᓛᕐᓂᒥᓄᑦ ᑕᒡᒍᖓ ᐊᓂᕐᕋᕆᐊᓪᓚᕆᔭᕐᑕᒥᓄᑦ. ᐃᓚᖏᓐᓄᑦ, ᑖᒃᑯᐊ ᕿᑲᕆᐊᕐᑐᓂᐅᔪᑦ ᐃᓚᒋᔭᐅᓪᓚᕆᑦᓯᒪᓕᕐᑐᑦ ᐃᓅᓯᖏᓐᓄᑦ ᐊᕐᕋᒍᓂ ᐊᒥᓱᓂ ᕿᓚᓈᕆᔭᐅᓂᕐᐸᐅᓱᑎᓪᓗ .
ᓇᑯᕐᒦᒃ ᓖᓴ ᑯᔪᑦᓱ Massawippi ᒪᙯᕝᕕᖓᓂ ᑲᒪᔨᒻᒧᑦ ᐃᑲᔪᕐᑎᒋᔭᐅᔪᖅ, ᑐᖕᖓᓱᑦᑎᓯᑦᓯᐊᓚᐅᕐᒪᑦ. ᐊᑦᔨᖑᐊᒦᑦᑐᑦ (ᓴᐅᒥᐊᓂᑦ ᑕᓕᕐᐱᒧᑦ) ᓛᔨ ᒍᐊᑦ, ᑲᒪᔨᒻᒪᕆᖓ ᑐᓚᑦᑕᕕᐅᑉ ᓯᐊᓯᑯᔩᓗ, ᐅᐱᕐᖔᓯᐅᕐᕕᒦᓲᖅ
Ayer’s Cliff-ᒦᑦᑐᖅ, ᒪᓐᑐᕆᐊᑉ ᐃᑎᕕᐊᓂ, Massawippi-ᐅᑉ ᒪᙯᕝᕕᖓ ᑐᖕᖓᓱᑦᑎᓯᓯᒪᓕᕐᑐᖅ ᐃᓄᓐᓂᒃ ᑎᒥᒥᒍᑦ ᐱᔪᓐᓇᓯᐊᖕᖏᑑᒍᑎᓕᓐᓂᒃ 1951-ᒥᓂᑦ. ᐱᐅᔪᕐᔪᐊᕌᓗᒻᒦᓱᓂ 19-acre-ᒥᒃ ᓄᓇᖓ ᐊᖏᓂᖃᕐᓱᓂ ᓯᑦᔭᖓᓃᑦᑐᖅ Massawippi-ᐅᑉ ᑕᓯᖓᑕ, ᒪᙯᕝᕕᒃ ᐊᑐᐃᓐᓇᐅᔪᖅ ᓄᓪᓚᖓᕕᑦᓯᐊᖑᑦᓱᓂ ᐃᓂᓪᓚᑕᐅᓯᒪᓂᖃᕐᓱᓂᓗ ᐃᓱᕐᕆᕈᑎᐅᒍᓐᑐᓂᒃ. ᐃᓄᐃᑦ ᑕᒡᒐᓃᑦᑐᑦ ᖁᕕᐊᓱᓪᓚᕆᒍᓐᓇᓲᑦ ᐅᐱᕐᖔᓯᐅᕆᐊᒥᒃ ᐊᑦᑕᓇᖕᖏᑐᑦᓯᐊᒥ, ᑐᖕᖓᓇᕐᑐᒥ. ᐃᓂᐅᑦᓱᓂ ᖃᓄᐃᖕᖏᓯᐊᕐᑎᓯᕕᒃ.
ᑕᒡᒐᓃᑦᑐᑦ ᖃᐅᔨᕙᑦᑐᑦ ᓱᖃᑦᓯᕈᑎᖃᕈᓐᓇᕆᐊᒥᒃ ᐃᓕᖓᔪᓂᒃ ᐱᒍᓐᓇᓂᕐᒥᓄᑦ ᐅᓇᒻᒥᒋᔭᕐᒥᓄᓪᓗ. ᐳᐃᑦᔪᕋᕐᓂᖅ, ᐃᒪᒃᑯᑦ ᓯᐊᕐᕆᔭᐅᑎᒃᑰᓂᖅ, ᐅᒥᐊᕐᑐᓂᖅ, ᓂᑦᔭᓗᑦᑖᓂᖅ, ᓴᓇᖕᖑᐊᓂᖅ ᐊᓯᖏᓪᓗ ᓱᖃᑦᓯᒍᑏᑦ ᐃᓗᓐᓀᓂᒃ ᐱᕕᖃᕐᑎᓯᔪᑦ ᐱᐅᔪᒥᒃ ᐊᑑᑎᒍᓐᓇᑎᑦᓱᒋᑦ, ᐃᒻᒥᓂᕿᒍᓐᓇᓂᒃᑯᑦ ᐱᕙᓪᓕᐊᓕᐅᒥᑎᑦᓱᒋᑦ ᐳᐃᒍᕐᓴᐅᖏᑦᑐᓂᓪᓗ ᐊᐅᓚᔨᒐᑦᓴᑖᕐᑎᓱᒋᑦ.
ᑕᒪᓐᓇ ᐊᑑᑎᔭᖓᑦ ᐱᐅᔪᒻᒪᕆᐅᒍᑎᖃᕆᐊᓪᓚᑐᖅ ᐊᑐᓂ ᒪᙯᕝᕕᒦᑦᑐᖅ ᐃᒻᒥᒍᑦ ᑲᒪᒋᔭᐅᒍᓯᖃᑦᓯᐊᒪᑕ. ᓇᔪᕐᓯᓂᖃᑦᓯᐊᓱᑎᒃ, ᐱᓇᓱᐊᕐᑎᑦ ᐃᑲᔪᕐᓯᒣᓐᓇᓯᐊᕐᑐᑦ ᖃᐅᑕᒫᑦ ᓱᓇᓱᐊᕐᑎᑕᐅᓕᕐᒪᑕ ᓇᐅᓕᒫᓪᓗ ᐃᓚᐅᒍᓐᓇᑎᑦᓯᐊᓱᒋᑦ ᓱᖃᑦᓯᓂᐅᔪᓕᒫᓂ. ᑐᖕᖓᓱᑦᑎᓯᓂᖓ, ᐃᓄᑦᓯᐊᖑᓂᖓᑦ ᑐᓂᒪᑦᓯᐊᓂᖓᓪᓗ ᐃᑲᔪᕐᓯᒪᓪᓚᕆᑦᑐᖅ ᕿᑲᕐᓂᓯᐊᒥᓐᓂᒥᒃ ᐃᑉᐱᓂᐊᕐᑎᓯᑦᓱᓂ ᑖᕙᓃᑦᑐᓂᒃ.
ᐅᖓᕙᒥ ᑐᓚᑦᑕᕕᐅᑉ ᐋᓐᓂᐊᕕᖓ ᐱᔪᕆᐅᑎᖃᓪᓚᕆᑉᐳᖅ ᐱᓇᓱᐊᖃᑎᖃᓲᖑᒋᐊᒥᒃ Massawippi-ᒥ ᒪᙯᕝᕕᒥᒃ, ᐱᒍᑦᔨᕙᑦᑕᑎᓐᓂᒃ ᐊᑐᕐᑎᑎᓐᓂᒃ ᐊᓂᕐᕋᖃᕐᑎᑕᑦᑎᓂᓪᓗ ᐊᑑᑎᑦᓯᐊᒪᕆᑦᑎᓯᒻᒪᑕ ᐊᑦᔨᐅᖏᑦᑐᒥᒃ. ᑕᒪᓐᓇ ᐱᓇᓱᐊᖃᑎᒌᓐᓂᓯᐊᕌᓗᒃ ᑫᓪᓗᑐᐃᓂᑐᐃᓐᓇᐅᖏᓪᓚ ᖃᓄᐃᖕᖏᓯᐊᕐᓂᖓᓂᒃ, ᐃᒻᒥᓂᕿᒍᓐᓇᓂᖓᓂᒃ ᐃᓅᖃᑎᒌᓐᓂᖓᓂᒃ ᑖᕙᓃᑦᑐᐃᑦ, ᑭᓯᐊᓂᓕ ᐱᕕᖃᕐᑎᓯᒋᕗᖅ ᐃᓚᖏᓐᓂᒃ ᓇᓪᓕᒋᔨᖏᓐᓂᓗ ᑕᙯᕐᓯᒍᓐᓇᕕᖃᕐᑎᓱᒋᑦ.
ᐊᕐᕌᒍᓂ ᐊᓂᒍᕐᓯᒪᓕᕐᑐᓂ, ᑖᓐᓇ ᐊᐅᓚᑦᔭᓂᐅᓯᒪᔪᖅ ᓱᓕᓪᓚᕆᑦᑐᒥᒃ ᐅᐱᕐᖔᓯᐅᕐᓂᒧᑦ ᐱᕐᖁᓯᕐᑖᕆᔭᐅᓯᒪᕗᖅ. ᖁᖓᓐᓃᑦ, ᐃᔪᕐᓃᑦ ᓄᑖᓂᒃ ᐱᖃᓐᓇᓕᐅᕐᓃᑦ ᐊᐅᓚᔨᒐᑦᓴᑖᕐᓃᓗ ᐃᓚᒋᔭᐅᔪᑦ ᒪᙯᕝᕕᒦᑦᑐᑦ ᐅᑎᕐᐸᓂᖓᓄᑦ, ᓱᓕᓪᓚᕆᑦᑐᒥᒃ ᓄᐃᑕᑎᑦᓯᒍᑎᐅᑦᓱᑎᒃ ᐊᑑᑎᔭᐅᔫᑉ ᐱᐅᔪᐊᓘᓂᖓᓂᒃ.
ᑖᕙᓃᒋᐊᕐᑐᓯᒪᔪᓕᒫᓂᒃ ᐊᓕᐊᓱᒻᒪᕆᖁᔨᕗᒍᑦ, ᓄᑖᓂᒃ ᑕᑯᔭᕆᐅᕐᓂᖃᕐᓗᑎᒃ ᐊᔪᒉᑦᑐᓯᐊᓂᓪᓗ ᐊᑑᑎᖃᑦᑕᓗᑎᒃ.
ᐊᑦᔨᖑᐊᑦ ᑕᑯᑦᓴᐅᑎᑦᓯᔪᑦ ᐱᐅᔪᕋᑕᕐᓂᒃ ᐊᑑᑎᔭᐅᔪᓂᒃ ᐱᒍᑦᔨᕙᑦᑕᑎᓐᓄᑦ, ᐊᑐᕐᑎᑎᓐᓄᑦ ᐊᓂᕐᕋᖃᕐᑎᑕᑦᑎᓄᓪᓗ ᕿᑲᕆᐊᕐᑐᓯᒪᑎᓪᓗᒋᑦ Massawippi-ᐅᑉ ᒪᙯᕝᕕᖓᓂ!
