ᓄᓇᓕᒻᒥᒃ ᐱᒍᑦᔨᔩᑦ ᓯᓚᒥ ᐃᒐᑦᓱᑎᒃ ᑲᓲᖃᑎᒌᑦᑎᓯᓛᐅᔫᑦ ᐃᓄᑐᕐᖃᕐᓂᒃ ᑐᓵᔨᐊᐱᒻᒥᐅᓂᒃ ᓄᓇᓕᒻᒥᐅᓂᓪᓗ ᐊᕐᐱᒃ ᔭᒻ ᖁᕕᐊᓱᖃᑎᒌᑦᑎᓯᓂᖓ ᑭᖑᓪᓕᐹᕐᓯᐅᓕᕐᑎᓗᒍ ᓂᕿᑦᓯᕕᒻᒥ 14-ᒥ.
ᑖᑦᓱᒪ ᐃᓱᒪᒋᔭᐅᒍᓯᖓ ᐊᖏᔪᐊᓘᖕᖏᑲᓗᐊᕐᓱᓂ, ᑭᓯᐊᓂ ᐱᒻᒪᕆᐅᓚᐅᔪᖅ ᖁᕕᐊᓱᖃᑎᒌᓐᓂᐅᔪᖅ ᐃᓄᑐᖃᕐᓅᖁᑦᓱᒍ. ᐊᒥᓲᓂᕐᓭᑦ ᑐᓵᔨᐊᐱᒻᒥᐅᑦ ᐅᐸᐅᑎᑐᐃᓐᓇᕈᓐᓇᔭᖏᒻᒪᑕ ᐊᒥᓱᓄᑦ ᑕᑯᑦᓴᐅᑎᑕᐅᔪᓄᑦ ᑯᑦᔪᐊᑉ ᑲᑎᒪᔨᖏᑦᑕ ᐊᓪᓚᕕᖓᓂ, ᑖᒃᑯᐊ ᓄᓇᓕᒻᒥ ᐱᒍᑦᔨᔩᑦ ᐱᓇᓱᐊᕐᑎᖏᑦ ᐱᕕᖃᕐᑎᓯᒍᒪᓯᓚᐅᔪᑦ ᐃᓄᑐᖃᕐᓂᒃ ᐃᓚᐅᒍᓐᓇᖁᑦᓱᒋᑦ ᐊᕐᐱᒃ ᔮᒻᒥ ᓱᓇᓱᐊᕐᑎᓯᓂᐅᔪᓄᑦ, ᓇᔪᕐᑕᒥᓃᓪᓗᑎᑦ.
ᑯᑦᔪᐊᒥᐅᓕᒫᑦ ᙯᖁᔭᐅᓯᒪᓚᐅᔪᑦ ᑖᑦᓱᒧᖓ ᓱᓇᓱᐊᕐᑎᓯᓂᐅᔪᒧᑦ ᓄᐃᑦᓯᖁᑦᓱᒋᑦ ᐃᓄᑐᖃᕐᓄᑦ ᑖᒃᑯᐊᓗ ᐃᓄᑐᙯᑦ ᐃᓚᐅᑦᓯᐊᖁᓪᓗᒋᑦ ᖁᕕᐊᓱᖃᑎᒌᓂᐅᔪᒥ. 150 ᐅᖓᑖᓄᑦ ᐃᓄᐃᑦ ᑲᑎᖃᑎᒌᓚᐅᔪᑦ ᑯᑦᔪᐊᑉ ᓯᓈᓂ ᓂᕆᖃᑎᒌᑦᓱᑎᒃ, ᓯᓚᒦ ᐊᓕᐊᑦᓱᑎᒃ ᑐᓵᑎᑕᐅᑦᓱᑎᓪᓗ ᑐᓴᕐᓂᔮᕐᑎᓯᔪᓂᒃ.
ᑐᓴᕐᓂᔮᕐᑎᓯᓚᐅᔪᑦ ᑳᑎ ᐊᐳᑎᐊᕐᔪᒃ ᓯᓅᐹ, ᐃᓚᖃᕐᓱᓂ ᔫᓕᐊ ᓘᑲᓯᒥᒃ, ᑖᓐᓇ ᐃᓚᒋᔭᐅᔪᖅ ᐊᒥᓱᓂᒃ ᐱᓯᑎᐅᒍᑎᓕᓄᑦ ᖃᓄᐃᖕᖏᓯᐊᕐᓂᓕᕆᔨᑦᑎᓄᑦ.
ᓯᓚᒥ ᐃᒐᓂᐅᑉ ᑐᓴᕐᓂᔮᕐᓂᐅᓗ ᐅᖓᑖᓄᒋᐊᓪᓚᒃ, ᑖᓐᓇ ᓱᓇᓱᐊᕐᑎᓯᓂᖅ ᐱᐅᔪᐊᓗᒻᒥᒃ ᐱᑕᖃᓚᐅᔪᖅ ᑲᑎᑎᑦᓯᓱᓂ ᐃᓄᑐᖃᕐᓂᒃ ᐃᓄᒻᒪᕆᓐᓂᒃ ᐃᓅᓱᑦᑐᓂᒃ ᐱᐊᕋᕐᓂᒃ, ᓱᖑᓰᐅᒥᑎᑦᓯᓱᓂᓗ ᐱᑐᑦᓯᒪᖃᑎᒌᓐᓂᖓᓂᒃ ᐃᓄᑐᙯᑦ ᓄᓇᓕᐅᓪᓗ.
ᓇᑯᕐᒦᒃ ᐃᓖᓇ ᒥᐊᓱ ᐃᓗᓐᓇᓕᒫᑎᓪᓗ ᓄᓇᓕᒻᒥᒃ ᐱᒍᑦᔨᔨᐅᖃᑎᒌᑦ ᑕᑦᓱᒥᖓ ᐱᐅᔪᐊᓗᒻᒥ ᐊᐅᓚᑦᔭᕆᐊᕐᓂᖃᕐᑎᓯᓚᐅᔪᒐᑦᓯ! ᓇᑯᕐᒦᒃ ᐊᕐᐱ ᔮᒻᒥᒃ ᑐᓵᔨᐊᐱᒻᒦᑎᑦᓯᒍᓐᓇᓚᐅᔪᒐᑦᓯ ᐃᓄᑐᙯᑦ ᖁᕕᐊᓱᖃᑕᐅᑎᑦᓱᒋᑦ ᓄᓇᓕᒻᒥ.
