ᐃᓅᓱᑦᑐᐃᑦ ᓇᔪᒐᕐᑖᖃᒻᒥᖓᑦ ᒪᓐᑐᕆᐊᒥ

ᓛᔨ ᒍᐊᑦ, ᑲᒪᔨᒻᒪᕆᖓ ᐅᖓᕙᒥ ᑐᓚᑦᑕᕕᐅᑉ ᐋᓐᓂᐊᕕᖓᓂ (UTHC), ᐃᓚᖃᕐᓱᓂ ᐃᓕᕐᖁᓯᕐᒥᒃ ᐊᑦᑕᓇᖕᖏᑐᒦᑦᑎᓯᒐᓱᐊᕐᑎᒥᓂᒃ, ᐳᓛᕆᐊᕐᖃᒥᓚᐅᕐᑐᖅ ᓄᑖᒥᒃ ᐃᓪᓗᒥᒃ ᓄᑕᐅᓯᓕᑎᕐᑕᐅᕉᑕᕆᔪᒥᒃ ᒪᓐᑐᕆᐊᒥ. ᑖᓐᓇ ᐳᓛᕆᐊᕐᓂᖅ ᑐᑭᓯᒋᐊᓪᓚᓂᐅᓚᐅᕐᑐᖅ ᐱᒻᒪᕆᐅᓂᖓᓂᒃ ᑖᑦᓱᒪ ᐱᓇᓱᐊᕐᑕᐅᔫᑉ ᓯᕗᓂᑦᓴᖏᓐᓅᓕᖓᑦᓱᓂ ᐃᓅᓱᑦᑐᐃᑦ ᐊᑦᓱᕈᕐᓇᑐᒃᑰᕈᑎᓖᑦ.

ᓇᔪᒐᐅᓚᖓᔪᖅ ᐊᑦᔨᐅᖏᑦᑑᓱᓂ

ᐱᓇᓱᐊᕐᑕᐅᔪᖅ ᓄᐃᑦᓯᓚᖓᔪᖅ ᒪᕐᕉᓂᒃ ᐃᓪᓘᓂᒃ ᐅᒃᑯᐃᖔᕐᑑᓂᕋᕐᑕᐅᔫᓐᓂᒃ(ᐱᖁᔭᑎᒎᕐᑐᓂᒃ ᒪᓕᒐᖃᓪᓗᐊᖏᑦᑐᖅ), ᐊᑐᓂ 12-ᓂᒃ ᐃᓪᓕᑕᓖᓐᓂᒃ. ᓯᕗᓪᓕᖅ ᓴᐳᒻᒥᕕᒻᒨᓕᖓᓚᖓᔪᖅ, ᐅᒃᑯᐃᖔᕐᑑᓂᕋᕐᑕᐅᓱᓂ ᐃᓂᒋᔭᐅᓲᖅ ᓱᕈᓯᕐᓄᑦ ᐅᑭᐅᓕᓐᓄᑦ 12-ᓂᑦ 17-ᓄᑦ. ᐁᑉᐸᖓ ᓇᔪᒐᐅᓚᖓᔪᖅ ᐃᓃᕈᑦᔭᐅᓯᒪᔪᓄᑦ ᓱᕈᓯᕐᓄᑦ ᓂᕕᐊᕐᓯᐊᓄᓪᓘᓃᑦ ᐅᑭᐅᓕᓐᓄᑦ 12-ᓂᑦ 17-ᓄᑦ, ᑭᖕᖑᒪᑦᓯᓂᐅᔪᑦ ᒪᓕᓪᓗᒋᑦ.

ᑖᓐᓇ ᐱᓇᓱᐊᕐᑕᐅᔪᖅ ᐱᒻᒪᕆᐊᓗᒃ ᐊᓪᓗᕆᐊᕐᓂᐅᓱᓂ ᐃᓂᖃᑦᓯᐊᖁᓪᓗᒋᑦ ᐃᓅᓱᑦᑐᐃᑦ ᐱᒍᑦᔭᐅᓂᖃᕆᐊᓖᑦ ᒪᓐᑐᕆᐊᒦᓪᓗᑎᒃ. ᑖᓐᓇ ᐃᓪᓗᑖᕐᖃᒥᖅ ᐊᖏᓂᕐᓴᐅᓚᖓᔪᖅ, ᖃᐅᒪᓂᕐᓴᐅᓗᓂ ᐅᐸᑕᐅᒋᐊᑭᓐᓂᓴᐅᓗᓂᓗ ᐃᓚᒋᔭᐅᔪᓄᑦ ᐳᓛᕆᐊᕐᑐᓄᓪᓗ.

ᑖᒃᑯᐊ ᑕᒪᕐᒥᒃ ᓇᔪᒐᐅᓚᖓᔫᒃ ᖃᓪᓗᓈᑦ ᓄᓇᖓᓐᓃᒐᓗᐊᕐᑎᓗᒋᒃ, ᑐᓚᑦᑕᕕᒃ ᑐᕌᒐᖃᕐᑐᖅ ᓄᐃᑕᑎᑦᓯᒐᓱᐊᓚᖓᒋᐊᖅ ᓄᓇᕕᒻᒨᓕᖓᔪᓂᒃ. ᓴᓇᔭᐅᒪᒍᓯᖓ ᐃᓪᓘᑉ ᐱᕕᖃᕐᑎᓯᓚᖓᔪᖅ ᐃᓅᓱᑦᑐᓂᒃ ᐃᓕᑕᕆᔭᒥᓂᒃ ᑕᑯᒐᑦᓴᖃᕐᑎᓗᒋᑦ, ᐱᑐᑦᓯᒪᖏᓐᓇᕈᑎᒋᓂᐊᕐᑕᒥᓂᒃ ᐃᓕᕐᕈᓯᕐᒥᓄᑦ ᓄᓇᓕᒻᒥᓄᓪᓗ.

ᓄᐃᑕᑎᑦᓯᒐᓱᐊᕐᓂᐅᔪᖅ ᐃᓂᒥᒃ ᐃᓅᓱᑦᑐᐃᑦ ᐊᓂᕐᕋᓯᒪᔫᔮᖁᓪᓗᒋᑦ, ᐊᕙᓗᒪᔭᐅᓗᑎᒃ ᓲᓱᒋᐅᑎᑦᓯᐊᓂᕐᒧᑦ, ᑐᑭᓯᒪᓂᕐᒧᑦ ᐃᓅᑦᓯᐊᖃᑎᒌᓐᓂᒧᓪᓗ.

ᐳᓛᕆᐊᕐᓂᖃᕐᑎᓗᒍ, ᓇᑕᑭ ᑳᓕᓐᔅ, ᑐᑭᒧᐊᑦᑎᓯᔨ ᐅᓪᓗᕆᐊᒥ ᓇᔪᒐᐅᓲᒥ ᒪᓐᑐᕆᐊᒥ, ᕿᒥᕐᕈᑎᑦᓯᓚᐅᕐᑐᑦ. ᑲᑎᒪᓂᖃᕐᓱᑎᒃ ᐅᖄᒍᑎᖃᕈᓐᓇᓚᐅᕐᑐᑦ ᑭᖕᖑᒪᒋᓲᖏᓐᓂᒃ ᐃᓅᓱᑦᑐᐃᑦ ᐱᒻᒪᕆᐅᓂᖓᓂᓪᓗ ᐃᓂᖃᑦᓯᐊᕆᐊᖃᕐᓂᐅᑉ ᖃᓄᐃᖕᖏᓯᐊᕐᑎᓯᒐᓱᐊᕐᓂᐅᓗᓂ.

ᑖᓐᓇ ᐱᒍᑦᔨᕕᑦᑖᖃᒻᒥᖅ ᒪᓐᑐᕆᐊᒥ ᐃᓂᖃᑦᓯᐊᑎᑦᓯᓂᕐᓴᐅᓚᖓᔪᖅ ᑭᖕᖒᒪᒋᔭᖏᓐᓅᓕᖓᑦᓯᐊᓗᓂ ᐃᓅᓱᑦᑐᐃᑦ ᐃᕕᕐᑎᕆᓂᒃᑯᑦ ᐱᑦᔪᔭᐅᒍᑎᖏᓐᓂᒃ ᑲᔪᓯᑎᑦᓯᓗᓂ ᐊᕐᕌᒍᓄᑦ ᖁᓕᓄᑦ ᐊᑦᑕᑐᕐᑕᐅᓚᖓᓗᓂ. ᓄᑖᑦ ᐃᓪᓗᐃᑦ ᐳᕕᕐᓂᑐᒥ ᓴᓇᔭᐅᓯᒪᓕᕐᐸᑕ ᐊᑐᐃᓐᓇᐅᓕᕐᐸᑕᓗ, ᑖᒃᑯᐊ ᐃᓅᓱᑦᑐᐃᑦ ᓅᑦᑎᑕᐅᓕᕋᔭᕐᑐᑦ ᓄᓇᕕᒻᒧᑦ.

ᐅᒃᑯᐃᑕᐅᓂᖓ ᑖᑦᓱᒪ ᓄᑖᑉ ᐱᒍᑦᕕᐅᔫᑉ ᐸᕐᓇᑕᐅᒪᔪᖅ ᐅᑭᐅᖑᓕᕐᐸᑦ 2027-ᒥ, ᓴᓇᓂᐅᔪᖅ ᐸᕐᓇᑕᐅᓯᒪᒍᑎᒥᒍᑦ ᑲᔪᓯᑦᓯᐊᑐᐊᕐᐸᑦ. ᑌᑯᖕᖓᑕᐅᓂᖓ ᐃᓅᓱᑦᑐᐃᑦ ᐱᒋᐊᓕᕋᔭᕐᑎᓗᒍ ᕕᕗᐊᕆᒥ ᒫᑦᔨᒥᓗᓐᓃᑦ 2027-ᒥ.

ᑕᕐᕿᓂ ᐊᓂᒍᕐᖃᒥᐅᔪᓂ, ᓄᓇᕕᓕᒪᒥ ᐃᕕᕐᑎᕆᕖᑦ ᐱᖑᑦᔨᕕᐅᔪᑦ ᐃᓅᓱᑦᑐᓂᒃ ᐃᓅᓯᕐᒥᒍᑦ ᐊᑦᓱᕈᕐᓇᑐᒃᑰᕈᑎᓕᓐᓂᒃ ᐱᓇᓱᐊᖃᑎᖃᕐᓯᒪᔪᖅ ᑐᓚᑦᑕᕕᐅᑉ ᐱᓪᓗᑯᒋᐊᖃᕐᑐᓕᕆᓂᒃᑯᑦ ᐱᒍᑦᔨᔨᖏᓐᓂᒃ, ᓄᓇᕕᒻᒥ ᐃᓗᓯᓕᕆᔨᒃᑯᓂᒃ ᓴᓇᔨᐅᔪᓂᓪᓗ Rodimax-ᑯᓐᓂᒃ ᓄᑕᐅᓯᓕᑎᕆᔪᓂᒃ ᐃᓪᓗᒥᒃ, ᐳᕐᑐᔫᒻᒪᑦ ᐃᓪᓗᖅ ᐱᖓᓲᔪᕐᑐᑕᖓ ᓇᑎᖏᑦᑕ ᓴᓇᒋᐊᓪᓚᔭᐅᑎᓪᓗᒍ.